Isaya 56 - Bible en Guidar

Əmilye net mə Israyelɗe a Siyon ( 56:1—66:24 ) Ɗəf tay nazga ɓa

¹ Vaŋki Yawe anahə: Mərma an dəslə, məgəɗ an təstəsə, vi wəkõh naw go'oy əzzani. Təstəs naw warbə.

² Əzaɓi aza ɗəf məzəɗɗa aŋka, aza ɗəf məs dəziw akani, məzərma pay naffete vi adawraygən ɓa, məzuga zən vi adaɗɗa məs dəslə ɓa ɓa!

³ Molhõyõ məs dəppan kiyzən sən Yawe adawnah na: Yawe uɗak adawɗakaw dit ɗiy nani ɓa! Ɗəf mərgan adawnah na: awle naw wəlaŋga məklakan nani ɓa.

⁴ Vi an Yawe anah sit ɗiy mərget yaŋka: An armanənək pay naffet nawa, an awelinik an nəŋgələ, an aziweŋgik aka wənmiyna nawa,

⁵ asna eŋgil anawda gəm addəv zlava naw na wanəpsit təki gəm iya na sləma day kiyən net kirin mezeŋgleket dit muguluŋgiti. Iya an faɗ nədapsiti, azə na ɓa.

⁶ Molhõyẽɗ məs dəsapaŋ aza Daya vi kawgəɗ sən wəza, məs dəŋgluwən iya na Yawe vi kasso məgəɗ sənən wəza, naway di pak məs dərma pay naffet məza əraygən ɓa gəm məs dəziweŋ aka wənmiyna nawa,

⁷ wanneken aka mossorgo metiŋ na salala nawa, wanənneken sit zit addəv gəla nakkam nawa, vasna əvəl nawzla kurmbuɗuk neti gəm əzaɓ-Maŋgəlva nawrəh zazay net məs adaŋ a matuya nawa. Vi kawyani gəla naw na gəla nakkam viyit ɗiy pakə.

⁸ Daya Yawe, məzəkkelet ɗiy mərɓehet na Israyel aɗiymani: nəkkeletik səkayə, wanəkkelet meɓirit əmpa.

Ɗiy gugriɗe məs dəslaŋ nawɗiyit ɓa

⁹ Mide, mənokum zəgeɗ nawra gəm zəgeɗ na muyã pakə, kəzəmaŋgəni.

¹⁰ Məgaɗe net daŋgerɗeŋ pakə, baymet pak zəga tay asənaŋ ɓa, kirɗe mə ɓatɓatəŋgə, aɓapaŋ na əhar ɓa. Tahəŋ ɓəlohɓəloh əssineŋgi, aŋglaŋgək əleŋge.

¹¹ Kirɗe məs memeyẽɗiŋgə awbaŋ ɓa. Məzuteɗeŋgeŋgə, ya zəga tay asənaŋ ɓa, naway pak əzban tive nani. Naway pak tay əkayan ərəh nan kaka'ə.

¹² Ənahaŋ na: Məgapə, məsəgən mbazla na megezlembirke. Məsəgən mbazla tatrãhã! Vaska'a adawsan pummo! An dəpəl diyɗay yi!