Isaya 21 - Bible en Guidar

Əzbər na Babilon

¹ Əpel aka kapta-muyã dəsan a maŋgava pehe. Va vẽŋvil sə kəla dohoŋ məzəɓlaŋ aket iŋkile məzuzel tay əzzan sə kapta-muyã, səka dələv mədə pəlu ɗəfa.

² Maŋgəlva dərbet su zəgeɗ məgeslnegənən ɗəfa: Məzəm ki ɗəf tay əzəmən, məzan zəga tay əzani! Elam apeŋgi! Medə asərŋgəsla! Wanəɓətgən ənɗəs pakə.

³ Vi vaski geslne arma magizewa, wəssa arməwək va guluk dawɓay uwa. An nədaprəm tay əɓlawa, an nədawla tay əzlbuwa.

⁴ Kiyu tay gərəŋgərəŋgə, geslne arəmwək azlbuka. Moskoy yi wəga nawa akkpaŋgək viyu ka nakkerguwa.

⁵ Məkini əzəma məpektiŋ kukurɗe, tay əzəmaŋgə gəm əsaŋgə. Məpeli gurzik dawnah na: misili deyeɗe, məppay mẽl sən baray!

⁶ Vi vaŋki, an Daya anah suwa: dok aɗi məga, dətəlgən ma aka an awələ!

⁷ An awələk mawta nawgay ammbet pelseŋge sula, ɗiy məpeŋgit aket korɗe, awaniɓa ɗiy məpeŋgit aket zlogomoɗi, dəslagən zəni, dəgəɗgən maɗɗula diyɗa!

⁸ Aŋgəslək vaŋvəl va ɓoolu na: Daya nawa, pay pak in tat ɗewwe əga a maddamba, dəfəɗ pak in tat əga.

⁹ Ɗəf yandak əzzan aka mawta nawgay mətokun ammbet pelseŋge sula. Tay ətəlma, tay ənah na: askotko, Babilon askotko! Zəgeɗkamaŋgəlva net aŋgrofoŋguk afuŋgu!

¹⁰ Mərgetiŋ ɗiy naw va hay a kelle, aski məs nəprəm səza Daya Məzuɓappak Maŋgəlva na Israyel. Ndəni nənah sukum.

Əttəlan Edom

¹¹ Əpel aka Duma. Məyəwi daga sə Se'ir na: Məga, mbar dəfəɗ atoŋ di? Məga, mbar dəfəɗ atoŋ di?

¹² Məga azlanək na: «Təki addaŋka, ya dəfəɗ tay əzzani. An əttok kəzzoŋ əttok na, kəzzoŋgən pay mbərən.»

Əttəlan Arabi

¹³ Əpel aka dələv na Arabi. Addivit geslembeɗi, a muyã na Arabi mədafna kimi, məpeŋgeŋ zlogomeɗ na Dedan.

¹⁴ Ɗiy naka dələv na Tema, məddoŋ ələm sit ɗiy en məzəmtaŋ sit meme dit iŋkile məddoŋ ələm sit məzənzoŋ də əzəma.

¹⁵ Vi anzoŋguk səba masalam, səba masalam məptuwən, səba bile minslinin, səba vakvak na əlpa.

¹⁶ Vi vaŋki Daya anah suwa: Addəv əzva taka əvoŋ dəŋɗedəŋɗe əmpa gagdak na Kedar pak waggrakə.

¹⁷ Əŋɗa net məsənaŋ bəle na Kedar siɗikke dədammbraŋgə. Vaski Daya, Maŋgəlva na Israyel dəpeli.