Ezra 4 - Bible en Guidar

Wətoŋ wən net məzuzelɗe net mə Yudeɗi

¹ Adan məzuzelɗe net mə Yudeɗ, dit mə Benyaminɗe aprəmnən na, ɗiy məket aka balam nek tay ərkaŋ Gəla sən Yawe; Maŋgəlva na Israyel,

² ndəɗaŋ pay aza Zorobabel gəm azet migil gəleɗe, aɓsitin na: «Mam aka wərkan sap də munokum! Va mənokum nam pak mənam tat əkayan Maŋgəlva nokum, mənam tat əgəɗ sən matuyaɗe, təŋ səza Asarhadon, məlĩ na Asiri, akiyəm aŋka.»

³ Yaŋ may Zorobabel, Yosuwa, gəm migil gəleɗe na Israyel, anahaŋ sitin na: «Məɓap na karka Gəla na Maŋgəlva nam sap də munokum ɓa: mənamtə narka Gəla sən Yawe, Maŋgəlva na Israyel kaka'ə, va Sirus, məlĩ na Persiya aɗi səm wən nani.»

⁴ Ɗiy naka dələv nan azzoŋguk vi kamtan mekret də wəgeslne'et mə Yudeɗ dit məzərkanən Gəla vani.

⁵ Pay na Sirus, məlĩ na Persiya, gap an na Dariyus məlĩ na Persiya, ɗiy nek apsitinik koɓeɗ sit mətawanən wən aba məlyã, vi dətekingən dəzban an aziwginin naɗɗa.

Məzəmi kiyit mə Yudeɗ aza məlĩ Artazerses

⁶ Də wətəŋ əzəm məlĩ na Zerses, məveri nawzəm kiyit ɗiy na Yuda də Yerusalem.

⁷ Gəm aka pay na Artazerses, Bislam, Mitredat, Tabe'el gəm geleŋgiɗit meɓɓet avereŋ sənənək Artazerses, məlĩ na Persiya; letər van məverin də ma Aram, də ma net Aramiɗe'e.

⁸ Rehum, daya naba məlyã, Simsay məzuvere, avereŋ ɗerewel sən məlĩ Artazerses, aka wən na Yerusalem vaŋka:

⁹ «Rehum, daya naba məlyã, Simsay məzuvere, geleŋgiɗti, ɗiy na Din, na Afarsatak, na Tarpel, na Afaras, na Uruk, na Babilon, na Susan, na Deha, na Elam

¹⁰ gəm ɗiy meɓɓet məs Asnappar ɗəf metiŋgin gagdak arəm ake aka balam, azi a walaŋgəla-metiŋ na Samari, gəm addəvit walaŋgəleɗe meɓɓet dəggar ki Efrat gəm dəgil va ndən.»

¹¹ An məverən addəv ɗerewel van yaŋka: Sən məlĩ Artazerses, məɗɗaŋ wəza noko, dit Mədəgar ki Efrat, gəm dəgil va ndən.

¹² Mam aka əprəman sən məlĩ metiŋ wən net mə Yudeɗ, dəzzoŋ sənokda adak, azam aŋ a Yerusalem, tay ərkanən walaŋgəla-metiŋ məɓoŋgən məsdarawəŋka; warkanən zlava na dələv, gəm kawzeɓeɗ gebbet gəleɗe məɗiyiti.

¹³ Mam aka wəprəman sən məlĩ kan na, an walaŋgəlaŋ arkəka, zlavaɗe mərketi, afaɗaŋ na, an na makaryam ɓa, afaɗnən na nzalaka də an nawtoŋ mətaw sit ɓa, vasna tatwãh wasan a təki nawɗi arya na məlyã.

¹⁴ Sən wən nani kakaŋka, mənam məzuzəm bətu na na məlĩ da na, dədah mulagən ərba wil na məlĩ ɓa, vini məprəman sən məlyã,

¹⁵ vi dəkayanəngən addəv ɗerewel net efiŋgiɗko. Wakərəh addəv ɗerewel naɗɗumon wəna, gəm a kəsən na, walaŋgəlas na walaŋgəla məɓoŋni, appan wəraygən sit milyeŋge dit kiva dəlveŋge net ɗah ɓa, farfari hoyohoyo na walaŋgəla nani. Sən aski məraygən walaŋgəlas bolyoməŋka.

¹⁶ Mam aka əprəman sən məlĩ na, an məsilgəni walaŋgəlaŋka, mərketiŋ zlavaɗe nani, asən na zəga tay kədawrəh Dəgar ki Efrat ɓa.

Əzlan na məlĩ Artazerses

¹⁷ Məlĩ aslən əzlan sit na: «Maslay Rehum, məzuver, Simsay, gəm sit geleŋgiɗit meɓɓet na Samari, də madambərgən təki na dəggar ki Efratə. Zazay akokum, kakaŋka, gəm dəgil va ndən.

¹⁸ Ɗerewel kəslənaŋ suwənəŋ na, məŋɗani kotak gəm dayadaya abawa.

¹⁹ Nəɗiyək wən nani, məkayani gabbani mərəni na walaŋgəlas farfar van na məɓoŋni aket milyeŋge, əɓoŋ də əraki dəzəm məlĩ akani.

²⁰ Far lahəŋ na, milyeŋge məs gbogboŋɗe dəssoŋ a Yerusalem, ndəɗaŋ dəzəmaŋ məlĩ dəggar ki Efrat; ndəɗaŋ dədawtafnən zəga na makaryam, nzalaka, də an adawfaɗaŋ nawtoŋgo.

²¹ Kakaŋ na, aɗi wən nan dəziwginin wəza net ɗiyiski; adarkanən walaŋgəlas, an in nəɗi wən nan dəvaw ɓa ɓa.

²² Məsla zukum kədazgətaŋ ki wənəs, ka zəga an dəslə ɓa adawwan zən vi adaɗɗa mbərayən sit milyeŋge ɓa.»

²³ Səza məŋɗan ɗerewel na məlĩ Artazerses keret may Rehum də Simsay məzuvere, dit geleŋgiɗti, asilyoŋ də kakara addoŋ a Yerusalem azet mə Yudeɗi, atekin na gagay dəɗɗa wəza məza əppay met ɓa.

Wətəŋ wəza narka Gəla na Yawe

²⁴ Yaŋ wəza narka Gəla na Maŋgəlva a Yerusalem nak agəɗ zimbi' gap əzva masula'ən na Dariyus, məlĩ na Persiya.