Əgilye 40 - Bible en Guidar

Əɗi wən nampa gizlirke gəm kawɗi sən Maŋgəlva

¹ Yawe apel sənək Moyis, amna:

² «Də təla maddaabəŋ, də wəvoŋ nan taka kəpagən gəla gizlirke nalma də Maŋgəlva.

³ Kəɗigən akoti na miziwe adaka, kəzlzlargən məzlzlara arani.

⁴ Kəkiygən tabəl kəzaɓangəni, kəɗigən zəga nakani, kəkiygən zəga nawɗi lalam akan kəsɗegin lalamɗe nani.

⁵ Kəɗigən təki nawzaɓ-Maŋgəlva na meleŋge nawzla tursan aba akoti na miziwe, kəɗigən məzlzlara na maddamba nawtoŋ a təki nassa.

⁶ Kəɗigən təki nawzaɓ-Maŋgəlva naɗɗa əvəl nawzla kurmbuɗuk aba gizlirke nalma də Maŋgəlva.

⁷ Vasna kəɗigən ŋgefleŋ aka walaŋ gizlirke nalma də Maŋgəlva də matuya, kəɗigən iŋkile adaka.

⁸ Kəhergən məzlzlaraɗe na daŋgla kiyən tərwəsl, kəhergən məzlzlara a maddamba na kirit memeŋgle.

⁹ Kəgəmgən mẽl nappay na mahenziŋ, kəmangən aka təki nassa də zəga naddəvən pakə, kəpeslgəni, asna ndən dit zəgeɗ nan pak wassoŋ salala.

¹⁰ Kəppay səngən təki nawzaɓ-Maŋgəlva naɗɗa əvəl nawzla kurmbuɗuk dit zəgeɗ nan pakə, kəpeslgəni, asna matuya wasan matuya salala sawɓa.

¹¹ Kəpeslgən ŋgefleŋ də gabban nawɗiyən pak də əppay mẽl na mahenziŋ.

¹² Kəkiygin may Aron dit kirtin go'o də maddamba na gizlirke nalma də Maŋgəlva kəslsleygin aret iŋkile.

¹³ Kəgulgən lukutɗe na matuya sən Aron, kəppay səngən mẽlẽ, kəpeslgin dəɗɗa sugən wəza na məsdəlva.

¹⁴ Kəkiygin kirtin go'o kəgul sitgin lukutɗe mə gəŋtəŋgeɗi.

¹⁵ Kəpeslgin də əppay sit mẽl na mahenziŋ va kəppay sən efiti, dəɗɗaŋ suwəngən wəza na məsdəlva. Əppay mẽl na mahenziŋ net wasan sit ka na wəza na məsdələv faɗ vi seyiti.»

Moyis aɗiyək təki na mahenziŋ

¹⁶ Moyis aɗɗak va Yawe aɗi sən wən nan pakə.

¹⁷ Aka təla maddaabəŋ na wəzva masulan də wəvoŋ taka na təla, təki nassa aziwi.

¹⁸ Moyis ampak təki nassa, aɗiyik təlni, bəlaŋɗe nani, apekik məziyeɗ nani, ndən ziwziwgit dədəkeɗ nani.

¹⁹ Ndən gizlirke papar aka təki nassa naka, aɗiyək məmbəka na gizlirke akan a disiŋ va Yawe aɗi wən nan sən Moyis.

²⁰ Agimik kalaɓɗe na miziwe azi addəv akoti, ndən zleŋɗe sek aka akoti, aɗiman akan kəla disiŋ.

²¹ Akiyək akoti a təki nassa aɗɗak məzlzlara, apparək aka akoti na miziwe va Yawe aɗi sən wən nan sən Moyis.

²² Yaŋ aɗi tabəl addəv gizlirke nalma də Maŋgəlva aka təkzlum təki nassa kəla disiŋ, dəppaka na məzlzlara.

²³ Aɗiyək ədor na peŋ taka aba Yawe akani, va Yawe aɗi wən nan sən Moyis.

²⁴ Yaŋ aɗi zəga nawɗi lalam akan addəv gizlirke nalma də Maŋgəlva aba tabəl təkzlumun kəla dohoŋ.

²⁵ Asɗek lalamɗe aba Yawe, va Yawe aɗi wən nan sən Moyis.

²⁶ Aɗiyək təki nawzaɓ-Maŋgəlva na meleŋge addəv gizlirke nalma də Maŋgəlva aba məzlzlara.

²⁷ Azlak tursan akan va Yawe aɗi wən nan sən Moyis.

²⁸ Aynanək məzeŋge ama təki nassa.

²⁹ Səza aɗi təki nawzaɓ-Maŋgəlva na əvəl nawzla kurmbuɗuk ama təki nassa na gizlirke nalma də Maŋgəlva, aɗɗak əvəl nawzla kurmbuɗuk gəm əvəl na zəga na mabardaw va Yawe aɗi wən nan sən Moyis.

³⁰ Aɗiyək ŋgefleŋ aka walaŋ gizlirke nalma də Maŋgəlva də matuya, aɗiyək iŋkile adak naslslaya.

³¹ Moyis gəm Aron dit kirtin dədawɗanən vet də tilit dənɗaŋ adaka.

³² An tay ətoŋgoŋ a gizlirke nalma də Maŋgəlva, gəm pay adawzaraŋ aza təki nawzaɓ-Maŋgəlva na, ndəɗaŋ əslslayaŋ va Yawe aɗi wən nan sən Moyis.

³³ Ampak daŋgla tərwəsl ki təki nassa də təki nawzaɓ-Maŋgəlva, aynanək məteŋge na maddamba na kirit memeŋgle. Vas Moyis aslak ma wəza.

Gagdak na Yawe aknahək təki nassa

³⁴ Slaybuwən agulunək gizlirke nalma də Maŋgəlva, gagdak na Yawe aknəhək təki nassa.

³⁵ Moyis dəɓap ətoŋ a gizlirke nalma də Maŋgəlva ɓa, vi slaybuwən asanək akan də gagdak na Yawe aknəhək təki nassa.

³⁶ An slaybuwən asilik aka təki nassa, mə Israyelɗe əsmeŋ sə gəleti.

³⁷ Ya an slaybuwən dəslan zən a disiŋ ɓa, asmeŋ sə gəlet ɓa, hã gap pay asili.

³⁸ Vi slaybuwən na Yawe tay də kapay aka təki nassa, offo tay addəvən də dəfɗa, a maheret mə Israyelɗe beymet addəv əsme net pakə.