Əgilye 38 - Bible en Guidar

Təki na matuya gəm ŋgefleŋ nabburo

¹ Yaŋ azaɓ təki nawzaɓ-Maŋgəlva naɗɗa əvəl nawzla kurmbuɗuk na wəlaŋga na duvurnohõ, zezek nan tay metər sula də mani, slosloprok nan tay metər sula də mani, asanək təkzlumən poɗo dakadaka, əɓay nan a disiŋ tay metər taka də mani.

² Aka əŋzla nan poɗogən pakə, aɗɗek mohõŋɗe assoŋguk sler dəndəni. Akkəɗ sit təbəz pepreŋge.

³ Aɗɗek zəgeɗ na təki nawzaɓ-Maŋgəlva, kasliɗe na moŋglo, ziginɗe, məɗawaɗe naksu' mbeli, zəgeɗ ma yorkok nampa sluwa, met kasliɗe, də təbəz pepreŋ aɗɗe zəgeɗis pakə.

⁴ Ahũk gazway na təbəz pepreŋ sən təki nawzaɓ-Maŋgəlva, ammba ma təki nawzaɓ-Maŋgəlva təŋ səza gabbani gap wəɗak nawɓay nani.

⁵ Avotuk ndemeɗ gugriɗe na təbəz pepreŋ poɗo aza ma gazway poɗogən pakə, nawgul zleŋɗe addəvti.

⁶ Yaŋ azaɓ zleŋɗe na wəlaŋga na duvurnohõ, akkəɗ sit təbəz pepreŋge.

⁷ Agulik zleŋɗe addəvit ndemeɗ gugriɗe naka maŋgava təki nawzaɓ-Maŋgəlva naka, kawslani, aɗɗak kutuk kutuk dit wəleŋɗe.

⁸ Agəɗək kasli ŋgefleŋ metiŋgin na təbəz pepreŋge, tələn na təbəz pepreŋge, dit zəgeɗ nawla heret gil məzəɗɗaŋ wəza ama gizlirke nalma də Maŋgəlva.

Məzlzlaraɗe na daŋgla

⁹ Azaɓək daŋgla a ma gəla nassa vani. Kəla dohoŋ va ənəh na də mbana, təkzlumən taka pak alewik helegeɗ kukulfut na ngərayã məɗimti, aka zezek na ma daŋgla van metər kaklaw sle'i.

¹⁰ Dədəkeɗ net kaklaw sula də tilit kaklaw sula na təbəz pepreŋge, məŋgba'aɗe net dədəkeɗ dit mətəlawaɗe net assoŋguk na təbəz babara.

¹¹ Də tapaslay pay də gazga, aka zezek na metər kaklaw sle'i, dədəkeɗ net də tilit na təbəz pepreŋge, kaklaw sula sula, məŋgba'aɗe net dədəkeɗ dit mətəlawaɗe net tahəŋ na təbəz babara.

¹² Də ma pehe: Helegeɗ kukulfut na ngərayã məɗimti, aka metər kaklaw sula kiyən sle'i, dədəkeɗ net kəlawə, də tilit kəlawə, məŋgawaɗe net dədəkeɗ dit mətəlawaɗe net tahəŋ na təbəz babara.

¹³ Ya dəmmba pay nampum dəmmbra paya: metər kaklaw sula kiyən sle'i.

¹⁴ Dəka persleken taka pakə, məzlzlaraɗe tahəŋ aka metər buhul də man dit dədəkeɗ net hoku gəm tilit hoku.

¹⁵ Gəm dəka persleken mbərni, dahãdahã na kirit memeŋgle na, məzlzlaraɗe tahəŋ aka metər buhul də man dit dədəkeɗ net hoku, gəm tilit hoku.

¹⁶ Məzeŋgeɗe na daŋgla dəwənnet tərwəsl pak, na ngərayã kukulfut məɗimtiŋgə.

¹⁷ Təlit dədəkeɗ na təbəz pepreŋ əŋgə, məŋgawaɗe net dədəkeɗ dit zleŋɗe net na təbəz babara. Kiyit məkkəɗən də təbəz babara, dədəkeɗ na daŋgla vet pak məslereti dit zleŋɗe na təbəz babara.

¹⁸ Məzlzlara na kirit memeŋgle na, nan tay metər kəlawə, wəza na məzuhõ, iŋkile nan va əffiyo na muŋgus, pepreŋ witwiti, hõlhõ hõlhõ na ngərayã kukulfut məɗəmni; zezek nan tay metər kəlawə, əɓay nan a disiŋ metər sula də mani, sloprok va məzlzlara na daŋgla.

¹⁹ Dədəkeɗ net poɗo, tilit na təbəz pepreŋ poɗo, məŋgawaɗe net na təbəz babara; kiyit dit zleŋɗe net məkkəɗit də təbəz babara.

²⁰ Məmpaɗe na gəla də an na daŋgla sulək pak na təbəz pepreŋgi yi.

Ənɗa net təbzeŋge en məɗɗa wəza dənɗaŋ

²¹ Əŋɗa na an məzan vi gəla nawɗi ɗerewel na wənmiyna; məŋɗani va Moyis aɗi wən nani, wəza net mə Leviɗe yi məs va Itamar wətən məsdələv Aron agəɗə.

²² Besalel wətən Uri, wətən Hur səddəv mahəlfa na Yuda, aɗɗak an Yawe aɗi wən nan sən Moyis pakə.

²³ Oholiyab wətən Ahisamak na mahəlfa na Dan tay dəndəni, məslmə gərma gəm məveren zəga, məbay gawla aza gabaga də ənɗeren pəreŋ pəreŋ, pepreŋ witwiti gəm holhõ holhõ gəm ngərayã kukulfuto.

²⁴ Əŋɗa na meleŋge pak an məɗɗa wəza na gəla na Maŋgəlva məs dəde səza əvəl də əzokoni, kilo səkat dodopoɗo də kaklaw buhul kiyən buhul də gəram səkat hoku va wəzəm nan naddəv gəla na Maŋgəlva.

²⁵ Koɓeɗ na əsap net ɗiy en məŋɗeti: kilo gabal hoku də kəlaw kiyən buhul də gəram səkat buhul də kaklaw sle'i, va adawzəm aka pay nan addəv gəla na Maŋgəlva.

²⁶ Aka ɗəf pak gəram na təbəz babar sle'i, va wənəh na: pəɗak na va adawzəm addəv gəla na Maŋgəlva. Zel məŋɗet pak gabal səkat sləre də hoku də səkat sle' də kaklaw sle'i, təŋ səza əzva kaklaw sula əmbat abe.

²⁷ Məɗɗay wəza də təbəz babar kilo gabal hoku ammba tilit dədəkeɗ na gəla na Maŋgəlva gəm tilit məzlzlaraɗe səkatə, tələn pak tay kilo kaklaw hoku.

²⁸ Də kilo kəlaw kiyən buhul gəm gəram səkat buhul də kaklaw sle' aɗɗa məŋgawa net dədəkeɗi, akkəɗək kiyti, ndən slergiti.

²⁹ Təbəz pepreŋ dəde səza əvəl də əzokon agəɗək kilo gabal sula də səkat də kaklaw sula kiyən poɗo.

³⁰ Aɗɗak təl maddamba na gizlirke nalma də Maŋgəlva dəndəni, təki nawzaɓ-Maŋgəlva na təbəz pepreŋge, gazway nan na təbəz pepreŋ, dit zəgeɗ na təki nawzaɓ-Maŋgəlva pakə.

³¹ Təl zlava na daŋgla suləkə, təl maddamba na kirit memeŋgle dit məmpaɗe na gəla vani, gəm məmpaɗe na zlava na daŋgla suləkə.