Əgilye 26 - Bible en Guidar

Gəla na Maŋgəlva

¹ Kəɗɗagən təki nassa dit gabagaɗe na ngərayã kukulfut məɗimit kəlawə, mənɗerit va əffuyo na muŋgus, pepreŋ witwiti, gəm hõlhõ hõlhõ dit maslay kerubaɗe azan məs məsənaŋ zəga ahoŋgu.

² Zezek na gabaga məveren van dəsangən metər kəlaw kiyən poɗo. Slosloprok na gabaga məveren van dəsangən metər sula. Zezek də slosloprok net dəssoŋgən məstaka.

³ Gabagaɗe məveret vet dəssoŋgən mərmehẽt ama zit sle'i, meɓɓet əmpa ama zit sle'i.

⁴ Kəgəɗgən helegeɗ minɗerit va uffuyo na bəbərət mətuwək ama gabaga məveren maddaabəŋ, ama əsap nani, vaski kədaɗɗa də an masulane'e.

⁵ Kəgəɗgən helegeɗ kaklaw sle' ama an maddaabəŋ gəm kaklaw sle' ama an masulani, helegeɗ vet dəslaŋgən dit en na masula'a.

⁶ Kəɗɗaŋgən məŋgba'aɗe na meleŋge kaklaw sle', kəsleretgin gabagaɗe nek ama zit teptep dit məŋgba'aɗe neki, vi gizlirke dəsangən taka.

⁷ Sissiŋ kəgəɗgən gabagaɗe də zeŋze na hawã, vi kaɗɗa gizlirke maɓɓan aka təki nassa. Gabagaɗe kəlaw kiyit taka kədawhõ.

⁸ Zezek na gabaga pak dəsan: metər kəlaw kiyən sle'i. Slosloprok nan, metər sula. Gabagaɗe kəlaw kiyit taka pak dəssoŋ dakadaka.

⁹ Kəsapetgən gabagaɗe sle' ka zit temme, sləre meɓɓet əmpa ka zit temme, kəlapgən masləre'etiŋ kəla ba gizlirke vani.

¹⁰ Kəgəɗgən helegeɗ kaklaw sle' ama gabaga maddaabəŋ, aka an məsapan bayma faɗə, gəm helegeɗ kaklaw sle' əmpa ama gabaga masulan aka an məsapan bayma faɗə.

¹¹ Kəgəɗgən məŋgba'aɗe kaklaw sle' na təbəz pepreŋge, kəgulgin məŋgba'aɗe aket helegeɗ kawsapan gizlirke dəsangən taka.

¹² Gabagaɗe naka gizlirke vet dədayaŋgən kiyən gizbit gizbiti: pəɗak na gabaga an gizbitte nak dəvoŋgən dərɓaga gəla van

¹³ dəka mezezeke gabaga na gizlirke, dahãdahã pak dədaygən va ɗəf ərga taka taka, vasna gizlirke van wasərət moggoni.

¹⁴ Kəgəɗ səngən zəga nawpak aka gizlirke van dit gəbeɗe net ndergeyẽɗ məhimti, gəm zəga nawpak maɓɓan də gəbeɗ zəgeɗ neret iŋkile adawyaŋ na dofeŋ.

¹⁵ Sissiŋ Kəzaɓgən dədəkeɗ na gəla van dit wəleŋɗe na duvurnohõ, mətukit dətuku.

¹⁶ Bəlaŋ pak zezek nan dəsangən metər sle'i, slosloprok nan wassan tay ɓa siɗikke səddəv metər.

¹⁷ Bəlaŋ pak dəsangən kiyən dahãdahã hurzluŋgo hurzluŋgo, heret seksek aza ziti, kəɗɗegin bəlaŋɗe na gəla van vas pakə.

¹⁸ Səzet bəlaŋɗe na gəleŋki, kəgəɗgən kaklaw sula, kəla dohoŋ, də mbana.

¹⁹ Sit bəlaŋɗe kaklaw sula neki, kəgəɗgən tilit na təbəz babar kaklaw poɗo: Vasna ammba bəlaŋ pak tələn sula sula mugulit aza kiyən hurzluŋgo hurzluŋgo.

²⁰ Dəka təkzlum gəla də gazga, kəgəɗgən bəlaŋɗe kaklaw sula.

²¹ Tilit na təbəz babar kaklaw poɗo: ammba bəlaŋ taka pak tələn sula sula.

²² Dərɓaga gəla kəla ma pehe na, kəgəɗgən bəlaŋɗe sləre;

²³ kəgəɗgən bəlaŋɗe sula, vi dəpsənəngən gbogboŋ sən kigəla, kəɗɗegin dəmmba təkiya;

²⁴ Aza gabban na wassoŋ ɓa'ɓa'ə, aza kiyən na dəsapaŋgən a təki taka addəv gokko maddaabəŋ hara: vas adassoŋ sulegit pakə, dəssoŋgən napsən gbogboŋ sən kigəla vani.

²⁵ Bəlaŋɗe wassoŋ dodopoɗo də tilit na təbəz babara: tilit kəlaw kiyit sləre, bəlaŋ taka pak tələn sula, tələn sula əmpa ammba bəlaŋ maɓɓani.

²⁶ Sissiŋ kəgəɗgən mərawaɗe net wəleŋɗe na duvurnohõ: əraw sle' aket bəlaŋɗe dəka maddaabəŋ na təkzlum gəla,

²⁷ əraw sle' aket bəlaŋɗe əmpa, dəka masula təkzlum gəla, əraw sle' aket bəlaŋɗe əmpa dəka təkzlum gəla dəmmba təki kəla ma pehe,

²⁸ gokko naka dedeket bəlaŋɗe, dəssan tərwəzlə.

²⁹ Kəkkəɗgən meleŋge sit bəlaŋɗe, gokko nawgul kiyit məziyeɗ addəvən dəssangən na meleŋge, kəkkəɗgən meleŋge sit məziyeɗ pakə.

³⁰ Kəmpagən gizlirke van, va tive nan mərban suk aka gərəməŋka.

³¹ Sissiŋ kəgəɗgən zəga nawpak akan, iŋkile nan va əffuyo na muŋgus, pepreŋ va gozoy, ɗiwɗiwi, məɗəmən na helege na ngərayã; kawveren zən dit maslay kerubaɗe muhẽt duhẽ.

³² Kəlawgən dit makalawɗe na meleŋge azet marzeɗ dədəkeɗ na duvurnohõ poɗo, məɗɗet dit məŋgba'aɗe na meleŋge, məziwgit aka tilit na təbəz babar poɗo.

³³ Kəsləkgən zəga nawpak nak ammbet məŋgba'aɗe, dərɓaga zəga nawpak əmpa na, kəgulgən akoti na wənmiyna. Zəga nawpak nak wagohon sukum təki salala an faɗə.

³⁴ Kəmpangən ma akoti na wənmiyna a təki salala an faɗə,

³⁵ kəɗigən tabəl aba məzlzlara, zəga nawɗi lalamɗe akan dəsan aba tabəl, dəmmba pay na mbana na gəla; tabəl na, kəɗigən də tapaslay pay də gazga.

³⁶ Kəgəɗgən məzlzlara na metive na gizlirke, iŋkile nan va əffuyo na muŋgus, pepreŋ va gozoy gəm ɗiwɗiwi, məɗəmən na helege na ngərayã: wəza net məhoŋ zəga adawsani.

³⁷ Kəgəɗgən zleŋɗe sle' na duvurnohõ kawlaw məzlzlara aketi, kəkkiɗgin makalawɗe net gəm məŋgba'aɗe net də meleŋge, kəvotgən tilit na təbəz pepreŋ sle'i.