1Milyeŋge 10 - Bible en Guidar

Məlyaŋgək nammba pay nampum tədek ula Salomoŋ

¹ Adan məlyaŋgək naka dələv na Saba təprəm sləma Salomoŋ agil ammba iya na Yawe na; yas təde vi kawsla nazan də asənasəna.

² Tədek a Yerusalem dit ɗiy ammbat diyɗa may dit zlogomeɗi də tursanɗe, təbəz na meleŋge may gərmeŋge na sləma aketi. Adan təde ana Salomoŋ da, tənah sənək wən na makrat pakə.

³ Yaŋ Salomoŋ azlan a met əssõhɗe nat gərakə: tay dəmbər təttaka məs dəɓap əzlan aman ɓaɓa.

⁴ Adan məlyaŋgək na Saba tula maɗɗula na Salomoŋ pak, zev gəla an arkə,

⁵ wəzəm nabani, gəla net məzəlpaŋ nani, zev əɗɗa wəza net ɗiy neŋgil ananda də əgul neti, məzəpsənən zəga nawzəma, əvəl nawzla kurmbuɗuk məs adawda addəv gəla na Yawe na, əmpəs nat suku.

⁶ Yaŋ təɓsən məlĩ na: «Əpel an nəprəm akok də maɗɗula nok səka dələv anawdaŋ gesiŋgi.

⁷ Lahəŋ nətaf an adawnahaŋ kəta ɓa, va nəde sən kiyu ɓa, haraw dula vaŋ ɓa; mbara pəɗak nan dayday mənah suwi ɓa! Kədayək ki an va nəprəm wən akokuŋka.

⁸ Əzaɓi azet ɗiy noko, əzaɓi azet məɗɗaŋ wəza nok məs məzəssoŋ abok ɗayɗay əprəm əɗɗum noko.

⁹ Soko sən Yawe Maŋgəlva nok məs dənnek də is nawɗiyuk aka mazaŋga na məlĩ na Israyel; vi Yawe aŋgluwək Israyel hã faɗə, ndəni aɗiyuk ka məlĩ vi kaɗɗa zəga də tiven təstəsə.»

¹⁰ Təpsənək təbəz na meleŋge sən məlĩ gap kilo gabal hoku də səkat sle'i, tursan diyɗa məza əŋɗa nan ɓa gəm gərmeŋge na sləma. Siske na, tursan dəde ɗah əmpa diyɗa gap an məlyaŋgək na Saba təpsən sən Salomoŋ ɓa.

¹¹ Bəlayɗe na Huram məs dəkenin meleŋge sə Ofir, akiyaŋgək wəleŋɗe adawyaŋ na Saŋtal diyɗa gəm gərmeŋge na sləma sə Ofir.

¹² Məlĩ ampek wəleŋɗe adawyaŋ na Saŋtal nek ama zəray naddəv gəla na Yawe gəm ama an naddəv gəla na məlyã, may azaɓək gaŋgara də gəzləŋtəndəŋ sit miyaŋ gəlya. Wəleŋɗe adawyaŋ na Saŋtal dəzzoŋ ɗah əmpa ɓa, muleti ɗah ɓa hã va dəpaŋka.

¹³ An mat məlyaŋgək na Saba asan akan təssõh pakə, məlĩ Salomoŋ apsətəka, mbəksa an apsət də vani. Sissiŋ ndət buryok əmbat aka dələv nat dit məɗɗaŋ wəza nata.

Wən temtem aka arya na Salomoŋ

¹⁴ Gagdak na meleŋge, məs Salomoŋ arah addəv əzva takas kaka', agəɗək meleŋge kilo gabal kaklaw sula,

¹⁵ mbəksa an məbbalaŋɗe na guwa gəm məmanən veti, milyeŋge nammba pay na moskoyo gəm an deyeɗe na kivadələv naka dələv adawkiyaŋgə, nan mənɗani ɓa.

¹⁶ Məlĩ Salomoŋ avotuk barayɗe gugriɗ səkat sula, na meleŋge abeye, sən baray taka pak, meleŋge kilo sləre,

¹⁷ gəm barayɗe meɗmeɗ səkat hoku, na meleŋge abeye, ammba taka net pak kilo taka də mani, məlĩ ambat əziyit addəv gəla naddivit Wəleŋɗe Rəɓ na Liban.

¹⁸ Məlĩ azaɓək mazaŋga metiŋgin na məlyã, də slay bekne, akkəɗ sən meleŋge saksakə.

¹⁹ Mazaŋga van tay də hara wəlaŋ maha nan sləre, məgese nan duləŋgay yi; mazaŋga van tay də təki naklak va ɗəf dahãdahã. Ɓooliɗ sula tahəŋ məzeɓit a maŋgava təki naklak va ɗəf dahãdahã,

²⁰ gəm ɓooliɗ tahəŋ məzeɓit kəlaw kiyit sula, məɗiyit aka hara wəlaŋ maha sləre naka. Tay məs məɗɗan vas aka dələv net milyeŋge va assoŋ ɓa.

²¹ Hiliŋgiɗ nawsa zəga na məlĩ Salomoŋ pak na meleŋgeŋgə, gəm zəgeɗ meɓɓet naddəv gəla net muguguleɗ na Liban pak məkkəɗ siti meleŋge mədani: zəga tay na təbəz babar kpak ɓa; aka pay na salomoŋ na, təbəz babar awla va zəga nawtər wəray ta'sa ɓa.

²² Vi məlĩ tay dit bəlayɗe a pehe nadda a Tarsis məzəddoŋ sap dit en na Huram, ama wəzva hoku pak bəlayɗe vetis tahəŋ əzzoŋ təl taka sə Tarsis əkiyaŋ meleŋge, təbəz babara, slay bekneɗi, bəryeŋge dit doloŋgozoyɗe.

²³ Məlĩ Salomoŋ dəsan daykiyit milyeŋge nammba dələv pakə, dəwəlsən arya gəm dəwəlsən maɗɗula.

²⁴ Ɗiy naka dələv gboŋ met aka ula Salomoŋ, vi kaprəm maɗɗula, an Maŋgəlva apsən akanəŋka.

²⁵ Naway pak tay əki əvəl nani: zəgeɗ na təbəz babara, na meleŋge, lukutɗe, gulomɗe, zəgeɗ nawda tursan, pilseŋge, koropilseŋge; vasna təl taka aza əzva pakə.

²⁶ Salomoŋ asepetik mawteɗ nawgay dit pilseŋge. Tay dit mawteɗ nawgay gabal də səkat poɗo, məŋkoroŋ pilseŋge gabal kəlaw kiyit sula, ake a walaŋgəleɗe gugriɗ nawzi mawteɗ nawgaya gəm azan a Yerusalem.

²⁷ Məlĩ yi dəɗɗa təbəz babar asan diyɗa a Yerusalem va gərmeŋge gəm muguguleɗ diyɗa va korvoŋɗe na Bagərma.

²⁸ Sə Eziptə gəm sə Kewe adawkinin pilseŋge na məlĩ Salomoŋ; məmanən vet na məlĩ sə Kewe adalbihini.

²⁹ Mawta nawgay dəde sə Eziptə pak əlbəh nan tay, təbəz babar səkat sləre, pələs tamə səkat də kaklaw sle'i. Məmanən vet vetis vas adawki sitin milyeŋge net mə Hitɗe gəm en na Aram.