YOHANNA ƁEWYEGYE 9 - Alkawali Woiwoyi

Obwo Tnaceyi

¹ N navun malaika tnuyi wa bye owo mwayi, ma gye oza woi kaya n eshe dna n na anyi a gawo makuli obwo dnagmayi tna cei nya.

² Shiwo ɓei gu kwoya, awu ɓa kun ya ngye apinagyi yakwo ho, nyipyeyi n eseyi ɓa dna wyegma ntu n awui ɓo.

³ Aɓo ɓa kun ɓe n awu yi a ga ɓa iko ɓa kni aza ngye anapisi.

⁴ A gna ɓa ge ɓato kni agbe-gben, kwo shinwan doho-dohoyin, amma ɓa kni aza nɓa to n Shekwoyi hatimi yi tulo n ɓa nyikunmin.

⁵ Ato ɓei ye ge ɓa wu ɓan, amma ɓa wuɓa anyi apya ngun atnu shi napisin san n wu nyi.

⁶ Dna anyipyeyihi mi, aza ɓei zhin atna ɓa wu ɓahin, ama ɓato ɓei min efi to ɓei ɓen. Ɓa ɓei ye ɓa fi, amma efi ɓo la busi.

⁷ Aɓo hi ɓo wu ngye a dokwo n na zhin-zhinyi n gye ɓa lo kun, N na anya hoi kpe n ɓa tukwo n gye rawani zinariya nya, oɓa awyeba wu ngye aza nyikwoci nya.

⁸ Oɓa oyi n mwakpa ngye anyi-kwoza nya, oɓa anyikna n wu ngye a gaba nya.

⁹ Ɓa n na akpata yi shi ngye asunkna, oɓa abmina yi ci aɓo ngye a karusa kunsun nya lo okun.

¹⁰ Ɓa n na a zhin-zhin yi gyi ngye anapisi n ɓa sesiyi, oɓa kala ɓa ce oza apya ngun atnu fi n ɓa sesi yi nu.

¹¹ Oɓa esu nu zhin Esu obwo tnacei nya n na yiwo Ibranaciyi nge, Abaddon, n Helenanciyi Apollyo n, (n Nasara gbei Nyawunya yi.)

¹² Azhin gmanyi nku zo nu, acelo n gun aba.

Azafun Nukwoyi Ngun Anyi

¹³ Malaika tnanyi yi wa bye owo mwayi, ma wo begye kwoi daɓo n na amwayi ngun anyi n ɓa gyi n bagadi zinariya nya n kwo gmi n Shekwoyi esu-shinkpegye abye nyin.

¹⁴ Woi gna malaika tnayi yi, “Lo aljanu yakwoya n gun anyi n na ɓai pa kpe n ola yakwo Affaratis nyi.”

¹⁵ Aɓei zhin shiri zhi ntu n eye ye ɓo nu, n epya yi n nyipyeyi n esayi. Nsai ye, a loɓaya ɓa wu azanyi kwoci ajegna ngun ata nu anyi.

¹⁶ Ɓa ye a soja zhi miliyan tagyi n gun aba, (200,000,000) mi ɓei ku wo shi ɓaɓei nyi n sun.

^17-18 Magye oɓa adokwo ɓai gnami, dna n mi begye, oɓa gunyi n na akpata byei shi adoho wu ngye anyi – a doho wu ngye bmina-bmina, ena n adokwo tukwo nwu ngye agaba nya, awu n ena yi, n sulfa nagyi ɓai kun n ɓa egbe, ɓa wu aza ajegna gun ata vinya.

¹⁹ Oɓa iko efi nya to ɓei nyi n ɓa egbe nu gmanyin, ama n ɓa sesiyi, gama oɓa asesi yi ɓei wu ngye awa tukwo nu kpewu, kwoi sa aza har efi.

²⁰ Amma aza nɓa ɓei ce zhin n wye-wyeyi n nato wuɓa n nɓa anyasan dna-gmai yin, to ɓa ye ɓa ga Shekwoyi mwa-mwan. To ɓa na alijanu bauta zhin ɓon, kwo oɓa ashan n ɓa zhin n zinariya yi n azurfa yin, n sinkna byei, n na akutayi, n na ashinwan yin, n ɓa ta mi n zan-zan kwo ɓa daɓon.

²¹ To ɓa shan oɓa bugba do tu nɓa azokwo azawu nya, n aguzhenyi yi, anagbai n aviwyi yin.