YOHANNA ƁEWYEGYE 16 - Alkawali Woiwoyi

Amalaika Ngun Tnaba

¹ Mawo begye yakwo kwoi gmi n aduwa-nyakun kwoi daɓo n na amalaika tnabayi, “Fyelo n saiye fye ze a papa tnaba Shekwoyi minagyi nya ya fi n na anyi.”

² Nlonu malaika kmisunyi wafa aduwa-nyakun wa ze papa kmisunyi yafi n anyi, a gbago, a cisa nukwoyi a sansanyi, ɓa kunkpe n na aza vinya, nɓa n Nyawan-nyawan lambayi lo ɓai ga wo mwa-mwa nwo nya zhin zhinyi.

³ Malaika bayi wa zewo papa yafi n anuwan yako, ɓaku ze ngye oza fifiyi ami, anya vinya nɓa fi n na nuwan yakwo ɓaku fi.

⁴ Malaika tayiwa ze owo papa yafi n na ala, n na adna ɓiyi vinya, ɓaku ze ami.

⁵ Mawo malaika a nuwanya woi gna, “Kwo wulo cewo shi ho tnu n wadaye pya yi, O, Oza Gyi-gyi-yi, nwo nyi wo ɓei nyi.

⁶ Gama aku ho aza gyi-gyi-yi n anabi yi wu ai ze oɓa ami ya fi n anyi, nsaiye, n kasun ho ka aza ami zeya nɓa ɓei wu Banyi, oɓa lada nu n kwo kunce n ɓai”.

⁷ Mawo malaika nwo gni n bagadi aba nyi woi gna, “E Dagayi, Shekwoyi ikoda oho tata wulo cewo dei-dei.”

⁸ Nnavun malaika nyiyi wa ze owo papa ya kpe n nyipyeyi, kwa gyi aza ena n kwo ena yi.

⁹ Zaho-zahoi vinya okwo ena aku gyiwo, ɓa tu Shekwoyi eye ekni n wa tnu n na anyasan dnagmayi nyi, to ɓa shan oɓa bugba don n ɓa aɓe zhin yin, ɓa gawo mwa-mwan.

¹⁰ Nna vun malaika tnuyi wa ze owo papa ya kpe n Nyawan-nyawan nkwo gmi n nuwanyi, a yakwo ebemi dna n wyegma, owo aviyi vinya ɓai gyi oɓa anyitala ntu n sansan ɓo.

¹¹ Ɓa tu Shekwoyi eshe nya ekni ntu nɓa aci ɓo n nyasanyi, ama to ɓa ye abwi n ɓa aɓe nukwoyi zhin ɓon.

¹² Malaika tnanyi wa ze owo papa yakpe n ela dnagmanyi. Affratis kwo wo n na bai asu n ɓa nyin n gabas ɓa bwa zokwo ɓa duya n ɓa asojayi ɓa lo nyipyeyi shin bwa ntna wahala.

¹³ Ma gye azafun nukwoyi ngun ata n wu ngye adug-ba ɓai kun n Dragon egbe, n Nyawan-nyawan egbeyi, n owo Anabi Katayi egbei.

¹⁴ A zafun, aɓo wowoyi zhinyi ye, ɓa si egbe do n asu anyi nyayi vinya, ɓa yeba zhi ɓa sunkun n Dagayi n nyipyeyi yakwoyi owadawyi, Shekwoyi ikoda nya.

¹⁵ “Fye wo, mi ɓei ɓe ntna esa; dnayi ngy evi, anabarkada nu aza vinya n ɓa kmimilo n ɓa nu ajei zhin shiri lo, ɓato n na a pmayi lo ɓai zan-zan n na bwotolo yin n vinyikwoyin.”

¹⁶ Ɓa ye a soja anyi nya zhi vinya n aba n na yi Ibrananciyi nge, Arma-giddon, Magiddo Epe.

¹⁷ Nnavun malaika tnabayi waze wo papa ya fi n ese, wyisa yakwo kwa gmi n aduwa-nyakun n eshe mi kwoi gna, “Aku zo zhin.”

¹⁸ Ogma sawyi kwa ci aɓo, kwa bmiyana, eknia shan-shan n nato shin kwo pya zhin dna n zanyi-kwoci asesemi n na anyin.

¹⁹ Ezhi yakwo Babila kwa gna aje ngun ata, azhi yakwo nɓa shegun ɓa miya laɓa n na anyi, nlo nu Shekwoyi wa pa Babila alaifi ɓo vinya n wo bugba mi, a tawo to a ce minagyi wan har owo minagyi kwa zo.

²⁰ A muse vinya ɓa busiya laɓa, Ape vinya ɓa ɓaya.

²¹ A gma kuta a yakwo ɓakun n eshe, agma kuta n woshan, har laba tagyi ɓa kaya kpe aza n anyi, ɓa tu Shekwoyi ekni ntu n na agmakuta a nukwoyi ye ɓo.