Yohanna 18 - Alkawali Woiwoyi

Ala Yesu Wan

¹ Esa nu Yesu ɓo la pwo aɓeda ye daɓo, wa pi Kidron nuwan ya, ɓedo n wo abara yi, ɓa lo fi n ofwa ho ɓo.

² Yahuda, nwo ɓo kun Yesu nyi, wo ɓei kpe abahi aba, ntu ge Yesu ɓei zhin woi lo ɓo cici nwo abara yi.

³ A malami dnagmayi ɓedo a Farisiyi, ɓa ku asoja ga ɓa gni lo n Yahuda yi. Ɓa lo n na fitila yi, n anabwi-yi, n nanyagalayi ɓa lo ofwahi.

⁴ Shi Yesu ɓo ku kpe ɓoye nkwo ɓa zhin wo, wa gmi lo wa nya ɓa ɓo ge, “Fye ye nyika na?”

⁵ Ɓa ci wo ge, “Yesu” wa gna ɓa ge, Omi nu zhin wo. (Yahuda zabwi za ɓo gni ngnisun nɓai).

⁶ She wo ɓo gna ɓa ge, “Omi nu zhin wo,” ɓa ce ɓa miya zhi nkni navun yi gbudu-gbudu.

⁷ Wa je ɓa ɓo nya ge, “fye ye nyika?” Ɓa ci ge, “Yesu n wo gmi n Nazarati nyi.”

⁸ Yesu wagna ɓa ge, “Mi ku gna fye ge omi nu gni nyi,” shi fye bwa mi nu ye nyi, fye fwa aza deye ɓa lo ɓa nya.

⁹ Wo ɓo da deye, nabai owo i ɓeda kwa nu nu ge, “Aza nha ga mi nyi, kwo gmanyi kwo to bwi m.”

¹⁰ Bitrus wa wa obe-yakwo, wa ka Malkus tnubua bwai-zhe-nya ya n i cei. Wo ɓo zhin malami dnagmanyi fyenu nu.

¹¹ Yesu wa gna Bitrus ge, “La ho beyakwo ya dna n kwo apui. Kwo to zhin tile nu ma sin wahala n Dada la ga mi nyin?”

¹² Elo nu, abusi-ɓiyida, nna sojayi nɓa tukwoda yi, ɓa wan Yesu ɓa pa wo nna wun yi.

¹³ Ɓa lo n woi n Hannana aba, Kayafas yezhi nwo nu ɓo zhin malami dnagmayi dna eyehi.

¹⁴ Kayafa nu ɓo gna a Yahudiyi atukwoda ge, “Kwo bmiya lo zaknayi wa fi ntu azaje ɓo.”

¹⁵ Siman Bitrus wa vi lo n navun, ngnisun n bara dohoyi. Barahi ɓei dami n malami dnagmayihi, ntu ce nu a fwa wo wa lo dna ngnisun n Yesu yi n awada ʼba.

¹⁶ Ama Bitrus da wa kpegni n nabokunmi gbe. Bara dehi wa gmi lo, wa da ɓo n ɓinyikwoi bokunmi-guyi ge wo du ɓe n Bitrus yi.

¹⁷ Binyikwoihi wa nya Bitrus ge, “ho to zhin Yesu bara nu m?” Bitrus wa ci ge, “Awo, mi to zhin kwo num.”

¹⁸ Ese ɓeifu, ntu ce nu, aza ɓo zhi ɓai wye ona, a fyenu ɓedo a sojayi. Bitrus wa kpe gni n kunsun n ɓai woi wye ona.

¹⁹ Malami dnagmayi, wa ya Yesu aɓo nya, tu nwo abara tukwo ɓedo nwo nyawu yi.

²⁰ Yesu wa dna ɓegbe wa ci ge, “Aza kpe mi nyawu ɓeye lo vinya, Ma ku waʼazi zhin dna nna duwa-nyakun, a Yahudiyi atukwoda ɓai wo. Mi to wu nyaho n vim, ma wu kwo pei-pei nu.

²¹ Ntu kniɓeyi hoi nya mi ɓo a? Nya aza ɓo nɓa ɓo wo mi nyi. Ba kpe ɓeye lo n mi ɓo da.”

²² Shi Yesu ɓo zo ɓeda lo nu, soja ho wa ce wo pmi, wa nya wo ge, “Beda pya nu nho ɓa dna Malami Dnagmayi ɓegbe ncei?”

²³ Yesu wa ci ge, ngye mi ta da gaiciya nu m, ha da ma wo, ama ngye mi da gaiciya nu, knidonu ɓa zhin ha ce mi pmi a?

²⁴ Hannana wa tnu n Yesu yi n Kayafa aba n pa-pa-yi, wo nu nwo ɓo zhin Malami dnagmayi nyi.

²⁵ Siman Bitrus woi gni woi wye ʼna, Zaho wa nya wo ɓo njesun ge, “Ho to zhin zahi bara nu m? Wa ci ge, Awo.”

²⁶ Ama Malami Dnagmayi fyenu ho wa nya wo ɓo ge, “Mi to ɓo ku gye ho, n kunsun Yesu yi dna n fwa n?” Fyenu hi ɓa ɓei zhin ʼbye nu n zahi n Bitrus ɓo ka wo tnubua ya nyi.

²⁷ Bitrus wa aɓo na njesun, Nsa-sayi pise-nugba kwa ce ku.

Ala Lo N Yesu Yi N Bilatus A ba

²⁸ Kayafa ɓo pwo Yesu owa da ɓo n labmiyi nu. Ɓa la wo ɓa lo nwoi n a Romayi gwamna garko. A Yahudiyi nɓa ɓo lo Yesu yi nyi, to ɓa ye ge ɓa lo fi n garko-him, ge kada ɓa tu cegye to ɓa mi ɓa gyi Paska nyagyi m.

²⁹ Bilatus wa gmi ɓe, wa nya ɓa ge, “Oza deye, wa zhin fye knihi na?”

³⁰ Ɓa ci ge, “Wo to ɓein laifi ye lon, to yo wan wo ɓe cei nho aba m.”

³¹ Bilatus wa gna ɓa ge, “fye da wo owa nfyehin yi.” A Yahudiyi ɓa ci ge, yi ta mi ya wu oza m, yi ye ha ga yi ʼgbe.

³² Deye ɓo zhin lo nu, ntu ge Yesu ɓeda kwa nu nu, esa nwo ɓo da efi pya cei nwo ɓa fi nyi.

³³ Bilatus wa jeze lo wada-bokun, Wa gna ge aduɓe n Yesu yi, wa nya wo ge “ho nu zhin a Yahudiyi osu?”

³⁴ Yesu wa nya wo ge, “ho nu nya ɓeye nhohin tukwo ko aza na gna ho a?”

³⁵ Bilatus wa ci ge, Ho gye ge mi zhin Yahudiyi-za nu? Oho aza nu na ɓe nhoi, ɓedo nna malami dnagmayi. Ha zhin ɓa kni a?

³⁶ Yesu wa ci ge, “Mi to zhin esu anyi nya nu n. Mi ɓo zhin esu anyi ye nya nu omi aviyi ɓo sunkun ga mi, esa nu a Yahudiyi ɓo wan mi nyi.”

³⁷ Bilatus wa nya wo ge, “Ho zhin Esu nu?” Yesu wagna wo ge, “E, ntu ce nu a ma mi. Ma ɓe ntu ge ma wu gaiciya. Minu zhin gaiciya, aza nɓa da gaiciya ɓa nu zhin omi aviyi.”

³⁸ Bilatus wa nya ge “Knidonu zhin gaiciya?” Wa gmiya lo bmi da a Yahudiyi wa gna ɓa ge, “Mi to bwa laifi ho nwo abam.”

³⁹ Kwo zhin fye kun-nu, ma gmi oza gmanyi ya ga fye n kurkuku n Paska sayi. Fye ye lo ma lo a Yahudiyi esu ya ga fye?

⁴⁰ Ɓa kni aku, “ɓai gna ge, awo a ga yi Barabbas nu.” Barabbas hi ɓeizhin evi nu n zaje yi.