Yohanna 15 - Alkawali Woiwoyi

Gnai Gaiciya Nya

¹ Omi nu zhin anab wunuyi gaiciya nya, omi Dada nu zhin of wa-da woi zhin kwa ba.

² Wo zhin wa gbe abwala ya nɓa ta ga gyi-gyi m. Njesun wa zhin abwala manayi aba, ntu ge ɓa ga gyi-gyi ndudu.

³ Wo la fye zhin aba nmi ɓeda yi, nmi da nfyei cici nyi.

⁴ Fye sase fi nmi, omihin nfye mi. Ntu ge bwala ta mi kwa ga gyi-gyi to kwoi kpegyi n shinwan-gnai num. Fyehin ta mi fya ga gyi-gyi, to fyei sase fi nmi m.

⁵ Omi nu zhin shinwan-gnai, fya zhin abwala. Oza nwo sase dna nmi, omihin ndna nwo, wo ɓa ga gyi-gyi nmwa, ntu ge ntna mi, fye ta mi fya zhin nyaho-nyaho yi m.

⁶ Oza nwa kpeya nmi, a ɓa she wo ya ngye bwala ntna apma, nkwo zhin kwa wo akawu, abwala ye pya a zhin a ye ɓa zhin a dna ɓa ʼna, ɓa gyi ʼna.

⁷ Ndei fye sase fi nmi, fyei vi mi aɓeda, fye nya nyaho-nyahoi ɓo nfye ye aɓa ga fye kwo.

⁸ Omi abara gaiciya nya, zhin ɓa ga gyi-gyi dei-dei, Deye zhin kwa e Dada n latu yi.

⁹ Mi ku fye ye, ngye shi Dada wa ye mi. Ntu ce nu fye ku sase fi nmi ye-ye.

¹⁰ Esa fya vi mi aɓeda, fye sase fi nu nmi ye-ye, ngye shi mihin mi ye Dada mi-i sase dna nwo ye.

¹¹ Ma gna fye aɓo deye nabai, fya bwa omi agmada, efye agmada njesun ɓa nu.

¹² Mi ye fya ye najeyi, ngye shi mi ye fye nyi.

¹³ Yeye dnagmayi to lo kwa du deye m, shi oza ga wohin wye-wyeyi ntu wo anugundo ɓo m;

¹⁴ Fye zhin omi anugundo nu, ndei fya zhin ɓo nmi ye.

¹⁵ Mi to yi fye lo ge afyenu m, ntu ge puwada to zhin wa zhin shaula nfyenu yim, Fye zhin mi anugundo nu, ntu ge mi ku aɓo gna fye vinya n Dada wa gna mi nyi.

¹⁶ Ofye ye nu to kni mi m! Omi nakni fye! Nabai fya lo fye ga gyi-gyi manayi. Nabai nyaho-nyahoi nfya gyiwye dna nmi eye, Dada ɓa ga fye kwo.

¹⁷ Mi cei pma fya ye najeyi.

¹⁸ Ndei anyi wun fye nu, fye kpe ge a ku mi nu wunnu nnabye.

¹⁹ Fye ɓo gna fye zhin anyi nya nu, ɓo ye nfyei, ama fye to zhin anyi nyanu m, ntu ge mi la fye kni nɓa. Ce nu zhin anyi ɓai wun fye nu.

²⁰ Fye pa ɓo lo nma gna fye nyi? Fyenu ta du wo puwa da m. Shi ɓa ku wahala ga mi nyi, kwo wu nu ge, ɓa ɓa ga fye wahala ce. Ɓa gna ɓa mi aɓeda gwo, ɓo la ofye aɓeda gwo.

²¹ Aza n anyi ɓa ga fye wahala, ntu ge fye zhin oma nya nu, gama ɓa takpe Shekwoyi ye lo, nwa tnu nmi nyim.

²² Mi to gna ma ɓe ma daɓo nɓa yim, to ɓo n laifi lo m. Ama nsayi ye, ɓa to nna gma kun yi lo, ntu ɓa laifi ɓom.

²³ Oza nwo wun mi nu, wo wun mi Dada nu lo ce.

²⁴ Mi to gna ma zhin aɓo wo-wo-yi, naza to shin zhin, to ɓo n laifi lo n. Ama ɓaku gye aɓo wo-woyi ye wye, ɓai du-du ɓai wun mi nu ɓedo nmi Dada yi.

²⁵ Deye ku ɓeda nu, n anabi ɓei da tu Masihu tukwo ge, ɓa ɓo wun mi nu ntna dalili.

²⁶ Ama nɓa tnu fye n Tnazhinyi, wato Zafun Gyi-gyi-yi, Wo ɓa gmi n Dada aba nu, Wo nu zhin Zafun gaiciya nya, Wo ɓo gna fye aɓo vinya n mi tukwo.

²⁷ Tile, fya gna zaho-zahoi omi nabari, ntu ge fye ku kunsun n miyi tunyi n kmisunyi.