Matta 8 - Alkawali Woiwoyi

Yesu Woi Ka Anyasan Gna Gbo-gbo

¹ Shi Yesu ɓo shin zhi n ʼpe, aza mwa begye ɓa vi wo shin zhi.

² Ho gye! Kuturu ɓelo. Wa ya shi wa ga Yesu mwa-mwa, wa gna, “Eza dnagmayi, n ha ye, ho ɓa mi ha kami gna.”

³ Yesu wa towo bwa wa gna, “Mi lla ye, gwo kagna.” Nsayi-sayi Ikuturu nyasan fa wo.

⁴ Yesu wa gna wo ge, “To kpe gni ha daɓo n zaho-zahoi yi m, lo ho wu hohin na malami aba, ha lo n nya gai shi, ngye shi Musa, wa da tu naza ɓo n kuturu nyasan ku ɓa fa, ntu seda ɓo naza ɓa gye ho la kagna bwa.”

^5-6 Yesu wa lo Kafarnafum, Romayi za-asoja tukwo da, wa ɓe wo aba wa gyi wo wye ge wo ɓe wo puwa wa ka wo ɓi gna n wo shi n nyasan yi, n nayi fi-fiyi.

⁷ Yesu wa gna, “E, miɓa ɓe ma ka wo gna.”

^8-9 A soja tukwoda ci ge, “Eza dnagmayi, mi to kunce lo ha ɓe mi puwan, (kwoi to zhin tile nu ha ɓe m.) Mi kpe lo ge n ha bwa ho nya gni ya ha cige, ‘Wo kagna.’ Emi fyenu ɓa bwa lafiya. Ntu ge mihin mi dna n iko sinta nu, aza lo n kpe n mi she. Mi n ikoi lo tu mi a soja tukwo, esa n ma gna eza deye ge lo, wa lo, eza do ɓe, wa ɓe. Ma ci mi fyenu nugbayi zhin deye, wa zhin. Mi kpe lo ho ikoi lo ha gna, wo nyasan ge kwo lo, kwa lo.”

¹⁰ Yesu wa kpe gni cei wo-wo. Wa igna aza yezhi. “Dna Israila kni vinya, mi to shin gye eza n gaiciya gai la yi m.

¹¹ Ma gna fye, abye do n mwa begye (ngye Romayi za ye) ɓa ɓei kun n nanyi laɓa ɓa ɓe Shekwoyi bemi, ɓa sase n Ibrahim yi, n Ishaku yi, n Yakubu yi.”

¹² Ama aza n obe zhin ɓa nya nyi, a ɓei ku ɓa she ya fi nwyegma, aba nɓa ɓei cibwi ɓai gyi anyikna.

¹³ Yesu wa gna Romayi soja tukwoda ge, “Lo apyi, kwo ku zhin ngye shi ha ga gaiciya.” Dna sahi, eɓi ho, wa kagna.

¹⁴ Yesu wa lo Bitrus puwa, wa gye Bitrus yezhi nyikwoza da wangye tu n gado, n nayi nagnu yi zagyi.

¹⁵ Ama Yesu wa to wo bwa nyasan kwa wo fa, wa laka wa zhin ɓa- nyagyi.

¹⁶ N wyeshe yi aɓe nazafun nukwoyi dayi n Yesu aba, shi Yesu ɓo daɓo kawai azafun nukwoyi ɓa busi, anyasan yi vinya ɓa gwo kagna.

¹⁷ Deye ɓo ku nu anabi Ishaya ɓo da ge, “Wa la eya nyasan tu wohin.”

Anuwan Kma Ngun Aba-ba

¹⁸ Shi Yesu ɓo gye aza yezhi ɓai mwa, wa gna wa bara ge ɓa zhin shiri ɓa piya lo kmayi.

¹⁹ Esa fyewyi a Yahudawayi Malami ho wa ɓe wa gna, “Malam miɓa vi ho abaho-bahoyi ha lo.”

²⁰ Ama Yesu a ci ge, A cam-cam nɓa bai lo, alu nɓa ma yi lo, ama Emi, Masihu, to napi lo n mi ɓa dna imihim tukwo m.

²¹ Owo viyi ho wa je ci ge, “Zadnagmayi, pmi mi la mi dada bi kpa.”

²² Ama Yesu wa gna wo, “Vi mi n sayiye, Fa aza nɓa fi-fiyi dna n zafun ɓa bi aje.”

²³ Wa lo dna n ʼya wa ya piya ɓedo n wa bara yi.

²⁴ Sa fyewyi ese kwa laka n kala yi n nuwan dokwo yi har to ai gye eya wye m. Ama Yesu ɓei la wangye.

²⁵ Abara lo ɓa yi wo ge wo kun agyewyi ɓai nawyi ge, “Dagayi, gni yi! Gye yi ye ya bwi nuwan.”

²⁶ Yesu wa ci ɓa ge, efye agaiciya-gai ɓi-ɓiyi da, kniyi nu zhin fyei wo edna? Wa laka wa gnakni ese, n nuwan yi, har ɓa ce pi.

²⁷ Ce a wo abara ɓa nya ge, “Nkanu n za deye yi har ese n nuwan yi ɓai wo wo ɓeda?”

²⁸ Shi ɓa ɓo si kmayi dna Gadara ʼkni a zafun nukwoyi da ngun aba ɓa shegun ɓa. Oɓa sese ba na vingwo nu, aza to ɓo zhin ɓa mi diya n bwayi m, ntuge ɓa ga aza wahala.

²⁹ Ɓa ya aku fi, “Ho ye kniyi n ʼya, O Shekwoyi Nugun? Esa to si n ho ɓa ga yi wahala n cei kpa m.”

³⁰ A burutu garke ɓei fyi ɓai gya nyagyi n kpai.

³¹ A zafun nukwoyi a gna Yesu ge, “N ha kun yi ya, ha tnu yi na burutu garke yi.”

³² Yesu wa gna ɓage, “To fye kunya lo.” Ɓa knu na zahi ɓa lo fyi na burutu, aburutu vinya ɓa ku bwi nuwan.

³³ A burutu knayi ɓa busi lo zhimi n nabariyi ɓo kwa zhin.

³⁴ Aza vinya knu ɓe ɓa gye Yesu. Ɓa gna wo ge wo lo, wa ɓa kni fa ɓa.