Matta 3 - Alkawali Woiwoyi

Yohanna Batizma-zhinyi Nla Wo Tnu-Tnu Ya

¹ Ɓai ye fi n Nazarati, Yohanna Batisma zhinyi wa ya waʼazi zhin dna zhabui Yahudiya nya. Owo ɓeda tukwo nu ɓonyi cici,

² “Fye fa a laifi, fya pmi ɓe Shekwoyi aba ntu ge Shekwoyi ebe la ga ɓe.”

³ Anabi Ishaya ɓo ku Yohanna tnu-tnu ɓo da aye n mwa begye kafin a mawo. Wa ka ge, “Mawwo begye n kalayi Idna n zhabui, ‘Zhin Dagayi zokwo aba, la zokwo cefye cewo n wo ɓa ɓe wa zan-zan tu’.”

⁴ Yohanna aje ɓo luluyi n lakumi jeyi nu, owo gigyi zun nya epa nu ɓei, woi pa n wo shin. Owo nyagyi ɓo zhin abigyi nu ɓedo n osu yi.

⁵ Aza ɓai knu n Urushelima, n Yahudiya yi, n nazhi yi n ɓa she Urdun gnu, ɓai lo Yohanna aba n zhabui ɓai-wo wo waʼazi.

⁶ Bai da ɓa alaifi woi zhin ɓa batisma n Urdun ela.

⁷ Ama shi wo ɓo gye a Farisiyi n Sadukiyi ɓai ɓe ntu ge azhin ɓa batisma, wa nya ɓa ɓo. “Efye awa aɓi! Nyika gna fye ge fye ɓa pwo Shekwoyi minagyi n kwo ɓelo nyi a?

⁸ Kafin a zhin fye batisma, tile fya wu ge fye ku alaifi fa fyei zhin ɓe manayi.

⁹ Fye to zhin shaula zhin ge fye kni-kniyi lo, ntu ge fye zhin a Yahudawayi Ibrahim aɓi m. Deye ta gni fye m. Shekwoyi n ikoyi lo wa zhin akuta ye ɓa ze a Yahudawayi.

¹⁰ A la gbakun tu a zun shinwan doho-dohoyi ya n kwo to ga gyi-gyi m, a ɓa zun kwo ya a gyi ko ʼna.

¹¹ “Aza n ɓa ye abui, mi zhin ɓa batisma n nuwan yi, ama ozado ɓe lo n wo du mi lo, owo abuada mi ta mi ma shin (mi ta mi ma la wo tnu-tnu m) owo nu ɓa zhin fye batisma n Zafun Gyi-gyi-yi ɓedo n ena yi.

¹² Wo ɓei gna awyi aje n akpalayi, wo gyi akpala ena n kwo ta shan wun, awyi ʼwo fi n wo dobui.”

Yesu Baptizma Zhin

¹³ Avun Yesu wa gmi n Galili wa ɓe Urdun ntu ge Yohanna wa zhin wo batisma.

¹⁴ To Yohanna wa ye ntu ge wa zhin wo batisman, wa gna deye to wu lo dai-dai m, Emi nu ye batisma n ho aba.

¹⁵ Ama Yesu wa gna, “Suku, zhin mi, ntu ge tile nu ma zhin enya n kwo bmiya.” Yohanna wa ye wo batisma zhin ɓo sayi.

¹⁶ N sayi-sayi yi shi a ɓo zo Yesu batisma zhin, wa gmi ɓe n nuwan. Eshe kwa guya, Zafun Shekwoyi nya kwa ɓe ngye lukpe kwa ya tu n wo.

¹⁷ Begye kwa gmi n ʼshe kwa gna, “Emi Nugun ye-yei nu nyi, owo nu n mi bwa gmada woyi.”