Markus 8 - Alkawali Woiwoyi

^1-2 Nwyihoi, aza je yezhi n mwa-begye, nyagyi a kuɓa zo. Yesu wa yi Wo abara Wa gna ɓa ge, “Mi gye a zaye sun-sun lo ntu ge, oɓa nyipyei tahi nu nyi naiye nyagyi yi to ye ɓai celo ba gyim.

³ Nma tun ɓai n na pyi to ɓai gyi nyagyi mm ɓa ɓa cafyi zokwo. Ntu ge aza lo ɓai knu naba kpai.”

⁴ O wa ɓara nyawo ge, “Yi ɓa bwa nyagyi n zhabui ye a gaɓa ɓa gyi?”

⁵ Yesu wa nya ɓa ge, “Fye n bredi yi shi n gnu a kniya?” Ɓa ciwo ge, “N gnu tnaba.”

⁶ Wa gna aza ge ɓa ku sase zhi kni. Wa go bredi wa sa Shekwoyi ami, Wa sa kwo ya, Wa ga Wo abara ɓa gna za.

⁷ Awyisala ɓei nyi fyewyi, Yesu wa kuɓa Wa tuɓa anabarka Wa ga Wo abara ɓa gnaza.

^8-9 Aza vinya, ɓa gyi nyagyi nubo a kuɓa fu. N navun Wa gna ɓami ɓa lo apyi. Aza ɓei yezhi nlo dubu gun anyi (4,000) Sa na ɓei ye awyiwoyi zhi a bwa a ceknu dnagmayi ngun tnaba.

Fye ye Aɓo Wo-woyi Ngun Akninya?

¹⁰ N sai-sayi Wa lo ʼnwo abara yi ɓa ɓe Dalmanuta kni.

¹¹ Sa na Yahudawayi tukwoda ɓei kpe ge Wo la ɓe, ɓa ɓe Wo aba n na bai ɓa na ɓo n woi. Ɓa ciwo ge, “Zhin yi oɓo wo-woyi ya gye! Zhin nyaho kw zhin n nanyi bmana! N na bayi ya gaho gaiciya!”

¹² Wa do ʼmi n mwa sa Wo ɓei wo lonu wa ciɓa ge, “Mi ta zhin m, fye ye a tnu-tnu a wo-woyi nshan-sun gnu akninya?”

¹³ Wa je eya lo Wa fa ɓa Wa piya lo ola pma deyi.

¹⁴ Owo abara ɓa ku zamwi to ɓa la nyagyi m, ɓa bwalo n bredi yi shi gmanyi nu n ʼya.

¹⁵ Sa ɓaɓei lo ɓai pi ola ya, Wa gnaɓa, “Fye zhin peceiye n yeast Esu Hiridus nya n na Farisawayi nya yi.”

¹⁶ Ɓanya ge, “Wo da kniɓeyi na? Kpekni Wo da bredi nu ɓo n ya zamwi nyi.”

¹⁷ Yesu wa ku kpe ɓeye n ɓa da, Wa ciɓa ge, “Mi ta da cenun. Fye to kpe ɓo ye nmi dan? Efya bugba dna kala lo nu to fye kpe awyegan?

¹⁸ “Shi Ishaya da, ʼFye na wyei gyi n wyeba gye ye a tun-tnu a wo-woyi nshan-sun ɓo wye ma? Knihi nu zhin to fyei gu atnubua ya fya wo ɓo ma? Fye ta pa ɓo lo m?

¹⁹ Aza dubu n gnu atnu (5,000) Mi ɓo fuɓa nubo na bredi yi ngnu 5 nyi ma? Fye ɓo ye apisayi zhi acekun ngnu akninya?” Ɓa cige, “Aceknu awo-cei-aba.”

²⁰ “Esa nmi ɓei kpa aza dubu ngun anyi (4,000) n bredi yi ngun tnaba, knidonu ɓo ce a?” Ɓa cige, “acekun ngun tnaba.”

²¹ “Fyei gye ge Mi damu lo shi fyeto bredi yi shi lon?”

²² Sa ɓa ɓei si Baitsaida, azaho ɓa ɓe n wyebuayi, ɓagyi wo wye ge Wo kawo gna.

²³ Yesu wa la wyebuayi yi Wa gmiya gni woi n piwun Wa kni akni kpewo na wye Wa tu wo ɓa bwaya, Yesu wa nya wo ge, “Ho gye nyaho lo sayi?”

²⁴ Zahi wa shi awye laɓa wa cige, “E, mi gye azalo, ama mita gyelo dei-dei n, ɓa wulo ngye ashinwa gbigbi nu zan-zan laɓa.”

²⁵ Yesu wa tuwo ɓa bwaya njesun, Shi zahi ɓei cewa wye zun, awye kna woya vinya, wa gye nyaho-nyahoi sarai.

²⁶ Yesu wa tnu woi nwo aza ʼba. Wa gnawo ge, “To jezelo kauye ho kpam.”

Ho Nu Zhin Masifu

²⁷ Yesu nwo aɓarayi, ɓa fa Galili ɓa lo Kaisariya Filibi akauye. Shi ɓa ɓei zan-zan lo, Wa nya ɓage, “Aza zhin nubo ge Mi zhin nyikado na? Ɓa dalo gena n Mi tukwoa”?

²⁸ Ɓa ciwo ge, “Azaho zhin nubo ge Ho zhin Yohana Baptisma zhinyi nu, aza ho cige Ho zhin Iliya nu, azaho cige Ho zhin anabi sapainya ho nu nwa lakala n vingwo.”

²⁹ Wa nya ɓa ge “Fye gyege Mi zhin nyikado na?” Bitrus wa cige, “Ho nu zhin Kristi.”

³⁰ Wa gnaɓa ge ɓato gna zaho-zaho yim.

³¹ Wa ya ɓa a wahala gna n ɓa ɓa sun Wo, njesyn a za yakwo, n na prist tukwoda yi, n na Yahudawayi tukwoda yi, ɓa ɓa nawo aɓo, har ɓa wuwo, ama Wo ɓei lakala n vingwo nu anyi-pyei at avun.

³² Wagnaɓa ce pei-pei. Bitrus wa la Wo lo ceyi n sepa gmanyi wa gnakni Wo, wa ciwo ge, “Kwo to bmiya Ho da a Be ye pyam.”

³³ Yesu wa pmiwyeshi Wo abara Wa gnakni Bitrus Wa ciwo ge, “shetan, la pmigni Ma vun. Ho da zanyikwoci ɓeda nu, to ge Shekwoyi nyam.”

³⁴ N navun Wayi Wo abara ɓedo n deji yi ge ɓa ɓe ɓa wo. Wa gnaɓa, Fye wo, eza n woye wa vi Mi, wo la anyida yashi wa lami zundu wa vi Mi n bugbayi gmanyi.

³⁵ N ho ye ha gni ho wye-wyei, ho ɓa bwi kwo nuwan, Sai aza n ɓa she ɓa wye-wyei ya ntu Mi ɓo, n Nabari manayi yi, ɓa ɓa kpe nyaye na yige wye-wyei bwa.

³⁶ Mi gye eza gyiba, wa bwa anyi vinya ama owo wye-wyei kwa bwi dace?

³⁷ Nyaho lo ndu ʼza wye-wyei?

³⁸ Eza nwa womi vinyikwo n Mi nabari yi dna na nyipyei nukwoyi ye tna gaiciya ga nya, Emi, Kristi, sa Mi ɓei jeze ɓe dna Mi Dada mwamwa n na malalka gyi-gyi-yi Mi ɓei wo zahi vinyikwo ce.