Markus 1 - Alkawali Woiwoyi

¹ Nabari manayi Yesu Kristi Shekwoyi Nugun nya kwo ya nlayi nu.

² Ngye shi a cei kafi dna Anabi Ishaya Litafi, Shekwoyi ɓei da ge, Wo ɓa tnu Wo ɓi yi dna nanyi, ama owo tnu-tnu dai ɓa ɓe na bye wa zhin anyi zhi ntu wo ɓe-ɓe ɓo.

³ “Tnu-tnu dai ye ɓei dna zhabui nu, wa da nabari ge aza vinya ɓa zhin ɓa sese aba kafin Dagayi wo ɓe,” nya nu Ishaya ɓei da.

Yohanna Batizma Zhinyi

⁴ Tnu-tnu dai ye nu ɓo zhin Yohanna Baptisma zhin-yi. Wo ɓo dna zhabui nu woi wu ge, aza vinya ɓapmi avun wu laifi, n na ɓai Shekwoyi wa zhin ɓa gafara, a zhin ɓa baptisma, kwa wu ge lallei ɓa la vun pmi wu laifi.

⁵ Azayi knu n Urushelima n Yahudiya yi, ɓai zanzan fi Yahudiya bmana ɓa gye, ɓai wo Yohanna. Sa n ɓa ɓei yabui, wa zhin ɓa baptisma dna Urdin ʼla.

⁶ Laknumi pa nu ɓei zhin wo je o wo shinpanya epanya nu. Aɓo, n ʼsu zhabui nyai nu ɓei zhin wo nyagyi.

⁷ Wo ɓei zhin wo zhin waʼazi lai nu! “Zaho ɓe lo safyewyi nwo du mi lo, har mi to knuce lo ma zhin wo baram.

⁸ Mi zhin fye baptisma n nuwan yi, ama wo ɓei zhin fye baptisma n Shekwoyi Zafun yi.”

⁹ Nwyi-hoi Yesu wa gmi n Nazarat n Galili. Yohanna wa zhin Wo baptisma n Urdun ʼla.

¹⁰ Sa Yesu ɓei gmi ɓe n nuwan, wa gye eshe a guya, Zafun Gyi-gyi-yi n gye lukpe kwoi yatu Wo.

¹¹ Begye kwa gmi she, kwa cige, “Oho nu zhin Mi Nugun yeyeyi, Oho nu zhin Ma Gmada.”

¹² Nsayi-sayi yi, Zafun Gyi-gyi-yi wa lo woi n bmana.

¹³ N zhabui mi Owa nyipyei shinyi n wo gmanyi yi akpe a nyafanya. Shaitan woi zhin Wo jaraba, N na vun amalayika ɓe ɓa zhin Wa tna.

¹⁴ Nsa dohoyi, Esu Hiridus, woi la Yohanna wan, Yesu wa lo Galili, waʼazi zhin Shekwoyi nabari manayi nya.

¹⁵ Wa ci ge, “Esa lasi n sayi, Shekwoyi bemi la wo vivi, fye pmi avun wu fya laifi, fya gwo Wo nabari manayi ye.”

Yesu Wa Yi Aɓnu-Tnuyi

¹⁶ Nwyi-hoi, sa Yesu ɓei zan-zan lo n Galili ʼla gbe, Wa gye Siman n wo zadoyi, Andarawus, ɓai wan awyesala ntuge oɓa bwaze nu ɓei nu.

¹⁷ Yesu wa yi ɓa, “Fye ɓe fya vi Mi Miɓa zefye a zawan-yi.”

¹⁸ Nsayi-sayi yi, ɓa fwa ɓa ʼsa, ɓa lo ngnisun woi.

¹⁹ Nɓa bye fyewyi, Wa gye Zabadi aɓi, Yakubu n Yohanna yi, ɓai zhinɓa asa aba.

²⁰ Wa yi ɓa ce, Nsayi-sayi yi, ɓa fwa ɓa dada Zabadi, dna n ʼya, n na kodogoda yi n wo ɓei yi ɓa ɓa viwo nyi.

²¹ Yesu n Wa nugundoyi, ɓa ɓe Kafarnafum Nsatiwyi, nlabmiyi ɓa lo a Yahudawayi aduwa nyakun Wa zhin waʼazi.

²² Ca wo aza mwa, ntu ge Wo ɓei daɓo n ikoi gbo n na zaje nya yi. N tu ge Wo to ɓei shan azam.

Aza Cbo-gbo Ba Bwa Kagna

²³ Ezaho n alijenu ɓei dna n aduwa nyakun wa ya wyiɓe.

²⁴ “Knihin nu zhin Hoi gna yi gnagna ya, Yesu Nazaratiyi, Ha ɓe Ha wuyi nu? Mi kpe Ho ye lo, Shekwoyi Nugun Gyi-gyi-yi.”

²⁵ Yesu wa gna alijanu yi ge, wola ce pi wa pmi wa gmiya ɓe n zahi mi.

²⁶ Zafun nukwoyi ho, wa sa wyi wa pmi wa she zahi ya, wa gmiya ɓe n sayi.

²⁷ Ca wo aza mwa, ɓa daɓo ɓai cige, “Kni adini woi-woyi nu nyia? Har a zafun nukwoyi wo Wo begye.”

²⁸ Nabari deye kwa gnami, har Galili kni vinya.

^29-30 Sa n ɓa ɓei fwa aduwa nyakun, Owo, n wa barayi ɓa lo Siman n Andarawus yi puva. Ɓa gye Siman yezhi dna n nayi-napye kaladayi, ɓa gna Yesu wo ɓo n sayi-sayi yi.

³¹ Walo wo gado gbe, Wa shiwo bwa Wa bmawo zhin wa sase, nayi-napye yi ho kwa fawo, wa laka n sayi wa zhin ɓa nyagyi.

^32-33 N wyeshe yi a kpemi ɓa nu, na nyasan yi n na lijanu dayi, n na bai Wa ka ba gna. Aza n mwa begye ɓa kun n Kafarnafum zhimi n na bayi ɓa gye Wo.

³⁴ Yesu wa ka aza gna n wyeshe-yi n mwa. Wa gnakni alijanu ge ɓa kun na za mi. (Amma woto ɓei ye ge alijanu da ɓom, ntu ge ɓa kpewo-ye lo.)

³⁵ N labmi yi Wa kpesa, Wa laka Wa lo zhabui, Wa zhin aduwa.

^36-37 Nsa dohoi Siman n na zajeyi ɓa lo Wo zanyi, ɓa gna Wo ge, “A za nya Ho ɓo lo.”

³⁸ Ama Wa dna ɓegbe ge, “Dole ya lo a zhido, Mi gna ɓa nabari ce, gama Maɓe ntu cenu.”

³⁹ Wa zan laɓa n Galili kni, woi zhin waʼazi n na aduwa nyakun, woi lo a zaya mwa na lijenu iko.

⁴⁰ Nsa hoi Kuturu wa ɓe wa yashi n Wa bye wa gyi Wo wye ge, Wo kawo gna. “Nhaye, Ho bami Ha kami gna.” Bma mi Zhin.

⁴¹ Yesu wa gye wo sun-sun Wa towo bwa Wa cige, “Mi laye, la kagna!”

⁴² Nsayi-sayi yi, wa kagna bwa.

^43-44 Yesu wa gnawo, “Lo Ayahudawayi pirist aba wo dnahowye. To kpe gni ha da ɓo n zayi n zokwom, lo n nyaga yi shi n Musa ɓei zun tu kuturu n wo la kagna bwa n nabayi a za kpe lallei hola lafiya bwa.”

⁴⁵ Ama sa n wo ɓei lo n zokwo, wa ya wyidna ge wola lafiya bwa, n tu cenu aza shekna Yesu har to wami nwo lo ezhi doho-doho yim, sai dna zhabui mi azayi knu na bai gbo-gbo ɓai ɓe dawo ɓo.