Luka 24 - Alkawali Woiwoyi

Wo N Wye-wyeyi Lo Njesun

¹ Shi ofye ɓei gyi n Ladiwyi, anyikwoza yi ɓa kun n labmi-lbmi yi ɓa lo vingwo n omi asindnyai shi.

² Ɓa gye ala kuta pmiya n ko ɓei gu n vingwo gbe nyi.

³ Ntucenu ɓa lofi. Amma shi ɓa ɓei lofi to ɓa gye Yesu nayi shi m.

⁴ Shi ɓa ɓei gye lonu ɓaku je-je. Amma n sayi-sayi azaho ngun aba ɓa kunzhi n najei kpe n bu-bui pashau.

⁵ Edna kwa wo anyikozayi ɓa ce akwo-wko zhi, esanu azayi ɓei daɓo n ɓai ge, “Kni nu zhin fyei zan oza wye-wyei shin n azafi aba?

⁶ Ai wo to gnil lo ya m, wola lakala. Fye pa enya n wo ɓei gnafye woi ye nyi n Galili ge:

⁷ “Aɓa ga Oza Nugun n alaifida akun a zun wo du, amma woɓa laka dna n anyipyeyi tayi.”

⁸ Nsayi anyikozayi ɓa pa ɓedaye ɓo.

⁹ Ɓa jezelo api ɓa gna owo abara ngun awo-cei gmanyi ɓedo n azajei n mwa.

¹⁰ Ayi anyikwozayi Maryamu Magadaliya, Yuwannan ɓedo n Maryamu n wo zhin Yakubu ya nyi. Oɓa ɓedo n anyikoza ajeyi ɓa gna Yesu abara aɓoye vinya.

¹¹ Amma to Yesu abara ɓa ga ɓedayi gaiciya m, ɓai gye ge anyikozayi gbe akata fi ɓa nu ka wai.

¹² Amma Bitrus wa lakala wa busi lo vingwo n wohin, shi wo ɓei yawye shi wa gye aje nu kawai n ɓaɓei puwo nyi. Nsayi wa jezelo api woi zhin nubo si koɓa ze nwo lonu.

¹³ Nwyiyi kwa Yesu aviyi ngun aba ɓai fi n zokwo bai daɓo lonu Imwasu, Ezhi yi nyi ngye mil ngun tnaba nu n Urushelima yi.

¹⁴ Alo ɓai daɓo tu anya ɓo nɓa zhin vinya n Yesu tukwo.

¹⁵ Shi ɓa ɓei lo ɓai daɓo lonu Yesu wa yeɓe vi-viyi n ɓai ɓa lo ɓai gni zan-zan.

¹⁶ Shi ɓa ɓei gyewo to ɓa kpe wo ye m.

¹⁷ Yesu wa nyaɓa ge, “fye lo fyei da kniɓei nu laiʼa?” Ɓa ku pizhi n na wyebai wun fi.

¹⁸ Zaknayi n ɓa, ai yiwo ge Kiliyobas wa nyawo ge, “Oho nu bwace dnalo n Urushelima ye n ho ta kpe oɓoyelo n kwa zhin n anyipyei avun nya ye m?”

¹⁹ Yesu wa nya ɓa ge, “A kni ɓoya? A ciwo ge, anya n ɓa zhin n yesu yi n wo gmi n Nazarat nyi. Wo ɓei zhin anabi nu har ma Shekwoyi ɓedo n azai vinya ɓei ciwo ntu aɓo wo-woyi ɓo n wo ɓei zhin nyi.

²⁰ “Amma eyi aprist dnagmai ɓedo n ya begyi yi ɓa wan wo ɓa gawo ntuge azun wo du.

²¹ Yi ɓei n wyetu yi ge owo nu ɓa gni Israila. To nyipyei tayi nu shi aɓoye ɓei zhin.

²² “Anikozaho n yi ɓaku ɓeyi n nabari hoi to yi kpe ce yem, ɓa lo vingwo n labmi-labmi yi.

²³ Ɓa to gyewo nayi shi m, ɓa jezeɓe ɓai cige, ɓaku gye amalaika ho ɓai gna ɓa wo la lakala n vingwo.

²⁴ Azaho n i kuwa ɓai lo vingwoyi ɓai gye gaiciya nu, amma ɓato gyewo wye m.”

²⁵ Nsayi Yesu wa ciɓa ge, “Ai fye zhin a ma-ma nu kni nu zhin to fyei ga anabi ɓeda gaiciya n pye-pye n maʼa?

²⁶ Ai kwo ɓei zhin tile nu ntuge Masifu wa sin wahala ye n sayi walo owo daraja.”

²⁷ Nsayi Yesu wa wu ɓa enya nkwo kafi lo n wo tukwo n Littafi enya n kwo ya n Attaurat har kwoi lo annabi.

²⁸ Shi ɓa ɓei wo vi-vi n ezhi hoi n ɓa ɓei lo nyi, Yesu wa zhin ngye woye wa duya.

²⁹ Amma ɓa ɓawo ge wola wangye ngnisun n ɓai ntuge wyeshe ɓei la she. Ntucenu wa ye n ɓa nya, wa bmadna n gnisun n ɓai.

³⁰ Shi aɓei ɓe n nyagyi wa sase ngnisun ɓai, wa shin bredi wa zhin Shekwoyi godiya, wa gnakwo ajeya wa gaba.

³¹ Nsayi oɓa wye ɓa guya bmagyi ɓa gane ge Yesu nu gni, amma wa bwi ɓa wye n sayi-sayi.

³² Ɓaci aje ge, ai yi ɓei wo agmada pya ho esanu n wo ɓei daɓo n yi ɓe n zokwo nyi. Woi wu yi enya kwo kafi lo a Littafi nyi.

³³ Ɓa kukala ɓajeze lo Urushelima ɓagye owo abara n yezhi ngun awocei-gmanyi ɓedo n azajei.

³⁴ Ɓa cige, “Lalle Dagayi la lakala n vingwo gama wo ku wohin tukwo wu Siman.”

³⁵ Oɓa ngun aba ɓaku oɓanya da nya kwa zhin vinya n zokwo, n jesun shi ɓa gane n woi esanu wa gna brediya gaba nyi.

³⁶ Esnu n ɓa ɓo yezi ɓai da aɓoye sa fyewyi, ba je-je ɓa gye Uesu gni n ɓa tan-tansin kawai, wa ciɓa ge, “Bugbafu nfya ba.”

³⁷ Ɓazhi ednai wo ɓa ɓai gye ge zafun nukwoyi ho nu gni.

³⁸ Amma Yesu wa ciɓa ge, “Kni nu zhin fyei la damuʼa? Kni nu zhin to fyei ga gaiciya ma?

³⁹ Fye shi mi abwa awye n mi apitai fya kpe ge emi nu gni sosai. Fye to mi bwa fya gye gama zafun to n nayi m, bale a cige kwo bw asunkun, shi fye gye mi n cei nyi m.”

⁴⁰ Shi wo ɓei d lonu wa-wuɓa owo abwa n apita yi.

⁴¹ Amma to ɓa du-du ɓa ga gaiciya m, gama ɓa ɓei nuzhi n agmadai nu cei wo ɓa. Ntucenu wa nyaɓa ge, “Fye n nyagyi lo ya?”

⁴² Ɓa gawo wye sala ɓi ho.

⁴³ Wa gwo wa gyikwo gni nɓa bye vinya.

⁴⁴ Nsayi wa ciɓa ge, “Aɓoye nyi n mi ɓei gnafye esanu n mi ɓei kun-sun n fyei nyi. Nyaho-nyaho n kwo kafi lo n Musa Littafi n mi tukwo ɓeda n annabi ɓei ka har ɓedo n Zabura yi ɓa ku nu.”

⁴⁵ Nsayi wa guɓa tunaniya ntuge ɓa gane n nyai n kwo kafi lo n Littafi.

⁴⁶ Wa ciɓa ge, “Nya nyi nkwo kafi lo nge kwo zhin tile nu Masifu wa sin wahala har wa laka n vingwo n nyipyei tayi.

⁴⁷ Njesun ge dna wo eye nu aɓa zhin waʼazi ntuge aza ɓa bwa gafara n ɓa laifi. A zhin aza vinya, kwoi ya n Urushelima.

⁴⁸ Fye zhin asaida-da nu aɓoye vinya.

⁴⁹ “Emice, mi ɓa tnu fye n nyai n mi dada ku alkawali zhin. Amma fye ku pmi fi n zhimi ye saidai ikwo n kwo gmi nshe kola ɓe da fye.”

⁵⁰ Nsayi wa kunɓaya zhi nbmi wa vi zokwoyi n kwolo Baitanya nyi. Wa ku abwa wu nshe wa tuba anabarka.

⁵¹ Shi wo ɓei gni woi tuɓa anabarka yi Walakala tu she har wa bwi ɓa wye woi gun n sheyi.

⁵² Ɓa zhin wo sujada zhi ɓo, Nsayi ɓa jezelo Urushelima n nu-nuyi n agmadayi.

⁵³ Ɓaku fi adduwa nyakun n saho-sahoi vinya ɓai zhin Skekwoyi gwodiya.