Luka 20 - Alkawali Woiwoyi

¹ Nwyihoi, esanu Yesu ɓei dna n aduwa nyakun woi wu aza nya woi zhin ɓa waʼazi nabari manayi nya a prist dnagmai, ɓedo n atukwoda yi ɓa ɓe owo aba.

² Ɓa ciwo ge, “Gnayi gaiciya, Nyikado nu nagaho iko nge ho zhin aɓoye pya?”

³ Yesu wa ciɓa ge, “To mi cei pma lo ma nyafye ɓoho ce.

⁴ “Fye gna mi Yohanna iko batizma zhin nya mwa, kwo ɓei gmi n Shekwoyi aba nu ko ka n azanyikwoci aba?”

⁵ Ɓa zhin nubo ɓa cige, “N ya ciwo ge n Shekwoyi aba, to, wa nya yi ge kni nu ɓei zhin to ya gawo gaiciya ma?

⁶ Amma n ya ciwo ge n a zan-yikwoci aba nu, to, a zaye n ɓa zhi laɓa nyi, ɓa kniya akuta n sa, ntuge ɓa n gaiciyai galo ge Yohanna ɓei zhin anabi nu.”

⁷ Ntuce nu ɓa ciwo ge, “Yita kpe abalo n wo iko ɓei gmi m.”

⁸ Yesu wa ci ɓa ge, “To mita gnafye ce aba n mi iko gmi mi-i zhin aɓoye pya m.”

⁹ Nsayi Yesu wa gna aza misali ye wa cige, “Ozaho ɓei nufwa wa ga akodogo da nge ɓa zhinwo aba, owohin ce wa laka wa lo ozan n kpai har wa mwasa.

¹⁰ Shi wo ɓei zhi, wa tnu owo fyenu ho nge wo lo akodog da yi aba, woi gwo ampanyi ɓe n cei n ɓaɓei bwa n ofwayi. Amma akodogo da yi ɓa wan fyenu yi ɓa luwo ɓa jewo zeya ntna nyaho.

¹¹ Nsayi maigida yi waje fyenu ho tnu. Amma a kodogo da yi ɓa wan wo ɓa luwo sosai, ɓai zhin wo aɓo nkwoto kamata m, ɓa jewoze ya n tna nyaho.

¹² Nsayi maigida yi wa tnu n fyenu tahi. Amma a kodogo dayi ɓa jewowan ɓa luwo ɓa shewoya shi lonu n tna nyaho.

¹³ “Nsayi maigida yi wa zhin nubo wa cige, ‘Miɓa zhin wunaʼa? Miɓa tnu nmi ɓiyi. Ai shiɓa ɓo gye wo ɓato ɓei zhin wo nyaho m.’

¹⁴ Amma shi akodogo dayi ɓei gye wo, ɓa cige, Owoɓi nu ɓeya sosai nya. Yi la wo wu ntuge n ya wu wo, anyagye vinya ɓaku ze eyi nya nu.

¹⁵ Ntucenu ɓa wan wo ɓa shewoya shi n of-wagbe ɓa wun wo. Nsayi Yesu wa nyaɓa ge, ‘To Maigida ye ɓa zhin kni nu n akodogodayeʼa?

¹⁶ “ ‘Ai ko zhin dole nu waɓe wa wu azeye vinya, wa ga zado ofwa ntuge ɓa zhin wo aba.’ ” Shi aza ɓei wo lonu ɓa cige, “Shekwo to ye ya zhin aɓeye pya m”.

¹⁷ Nsayi Yesu wa shiɓa wye wa cige, “To Littafi da kniɓeyi nu ge, Kuta n anyakun miyi taye m, okonu laze kuta bwakonu nya?

¹⁸ Ozaho-zahoi wa ce bonyi n kutayi wo ɓa bmaya, amma ozaho-zahoi nkutayi kwa kayatu wo, woɓa viya dugu-dugu.”

¹⁹ A pirist dnagmai ɓedo n amalami ɓei cei pma ntuge ɓa wan wo, gni nu abayi ntuge ɓa ɓei cei kpe ge aɓo vinya n Yesu ɓei da nyi, wo ɓei datu n ɓa tukwo nu. Amma ɓa wo aza dna n mwa.

²⁰ Ntucenu ɓa zhi ɓai dna esa manayi wye. Ɓa tnu azaho ntuge ɓa lo ɓai nya Yesu aɓo, ngye aza manayi n nabai n Yesu ɓa da ɓoho nukwoyi n nabai ɓa lo n woi n a sheria ba.

²¹ Azayi n aɓei tnuɓa nyi ɓa lo ɓa nya Yesu ge, “Malami, yi kpelo ge anya vinya n ho da hoi wu aza nyi gaiciya nu. Yi kpelo ge hota wo oza dna m, amma ho da gaiciya cici. Hoi da nya n Shekwoyi ye ntuge aza ɓa zhin.

²² Gnayi kwo bmiya lo ya gba a Romayi godu ko kwa yito gba ma?”

²³ Amma Yesu wa ku oɓa ɓemwi kpe wa ciɓa ge:

²⁴ “Fye wumi agyiwye ho.” She ɓa ɓei wu wo wa nyaɓa ge, “Nyikado hoto ɓedo n eyei nu tuya?” A cige, “Esu Roma nya.”

²⁵ Nsayi Yesu wa ciɓa ge, “To, Fye ga Esu Roma nya enya ko zhin owo nya. Nsayi fya ga Shekwoyi enya n kwo zhin Shekwoyi nya.”

²⁶ Ɓato ɓei mi ɓa wan wo gniɓo n azaba m, ntu cenu ɓaku ce pi cei wo ɓa shi wo ɓei gaɓa amsa n wu.

²⁷ A Sadukiyi ho ɓa ɓe Yesu aba (Eɓanu ɓei zhin ɓai cige, azafi kalaku to lo m.) Ɓa nyawo ge.

²⁸ “Mallam, Musa ɓei gayi wyidna ye ge, Nza fi wa fa owo nyikwo gni ntna ɓi, to, owo mado wa la nyikwoyi ntuge wa bwa oɓi n woi ga owo dnagma.

²⁹ “To, ko ɓei zhin lonu n aza ngun tnaba. Oɓa dnagma vinya wa la nyikwo amma wa fi to woi bwa oɓi m.

³⁰ Ntucenu owo mado n wo ɓei yatu wo nyi, wa la nyikwoyi.

³¹ Har oza tayi har oɓa ngun tnaba lonu, zaho-zahoi nɓa wa ku mula pa n nyikwo yi, aku fi to ɓai bwa ɓi m.

³² Nyikwoyi wa ɓe wa wonya fi ce.

³³ “To, ewyi n aɓei ku azafi kala ma, wo ɓei zhin nyikado nyikwo nuʼa? Gama oɓa vinya ɓei ku mula pa n woi.”

³⁴ Yesu kwa wa ciɓa ge, “Aza n ɓa fi n anyimiye nyi, ɓa zhin ɓa pa mula.

³⁵ Amma aza nɓa ɓei kuka n vingwo nyi nɓa ku kunce ntuge ɓai bwa wye-wyei n anyi deyi ɓato ɓei pa mula m.

³⁶ Ɓa wu ngye amalaika nu ɓa ta mi ɓa shan fi m. Ɓa zhin Shekwoyi aɓi nu ntuge ɓala kuka n vingwo.

³⁷ “Amma ntu fye ɓo nya ɓo, ko efi kalaku lo. Musa ɓei ku wufye dei-dei nge aku aza kala vingwo, ntuge ɓa bwa wye-wyei nu. Aba n Musa nabari kafilo woi gni n aba ena ɓei kpe n gbe-gbe amma to koi gyi na nyi m, wa cige Shekwoyi zhin Shekwoyi Ibrahim nyanu ɓedo n Ishaku yi ɓedo n Yakubu yi.

³⁸ Deye kwa wu ge wo zhin Shekwoyi aza wye-wyeyi nya nu. Toge aza fifiyi nya m, ntuge aza vinya ɓa n wye-wyei lo n Shekwoyi aba.”

³⁹ A malami ho n ɓa ɓei zhi ɓo ɓa cige, “Malam ho la ɓo dnagbe dai-dai.”

⁴⁰ To aza shan wo ɓenya njesun n sayi m.

⁴¹ Yesu kwa wa nyaɓa ge, “Aɓa mi a ci n wuna ge Masifu wato Kristi wo zhin Dawuda yawyi nuʼa?

⁴² Ntuge Dawuda n wohin tukwo wa ci dna n Zabura ge, Dagayi wa ci omi Dagayi ge, La sase tu n mi bwazhe bwa.

⁴³ Sai miku oho anuwuyi ze oho apita kpe ɓa, ɓa ye fi n ho apita sinta.”

⁴⁴ Wato Dawuda ɓei yi wo ge Dagayi nu. To Masihu ɓa zhin Dawuda yawyi n wuna?

⁴⁵ Esanu aza ɓei zhi ɓai knawo ɓeda tnubua waci owo abara ge,

⁴⁶ Fye zhin peceiye n ɓa Yahudawa malami yi n ɓa cei pma ɓa lo n aje dnagmai kpe nyi, ɓa cei pma a ɓi ɓa gna n mwa-mwai gni n gniko gbe. Ɓa zhin ɓa sase kpe n aba manayi nu n aduwa nyakun ɓedo n abai n aza zhi ɓai zhin agmada.

⁴⁷ Ɓa zhin ɓa zhin aduwa n mwakpa, n mwa-mwa gayi, ɓa ngbayi shi ɓa gyi anyigbayi fi, ɓa gwo ɓa duciya. Oɓa ta-ta ɓei la mwa.