Atasalunikayi II 3 - Alkawali Woiwoyi

La Gaiciya Shibwa

¹ To, mi ye ma zo nu, mi azaje, shi mi zo n wasika ye nyi, mi, ye fya zhin aduwa ntu yi ɓo. Fya zhin aduwa n na abai Dagayi ɓeda ɓa gyi abye, kwoi gyi nasara abaho-bahoi n kwa lo. Kwoi gyi nasara aba vinya shi kwo ɓei zhin esa n kwo ɓei ɓe fye aba nyi.

² Fye zhin aduwa, ya pwo n na aza nukwoyi akun, gama aza vinya nu taye Dagayin.

³ Ama Dagayi zhin egbe-nuyi nu, wo ɓa ga fye kala wa gu fye n Shetan agam.

⁴ Yi n gaiciya ga yi lo ge, fye zhin aɓolo n yi ɓei wu fye nyi, fya zhin ɓa cici.

⁵ Dagayi ɓa ga fye awyega fya gane n Shekwoyi ye-ye yi, n hakuri yi n kwo gmi n Kristi aba nyi.

⁶ Wyidna nyi n yi ga fye, omi azaje, dna n eyi Dagayi Yesu Kristi eye n wo ikoyi. Fye to gyi nugundo n Yesu-viyi doho-doho yi n wo wo bwato, to woi ye wa vi tnu-tnu zhin zbo n kalai, ngye shi yi ɓei gna fye nyin.

⁷ Gama fye kpelo tilas fya vi eyi fye, n fye ɓei gye to yi ka nkwo nyin.

⁸ Yi to gwo nyagyi n zaho aba to yi-i gba won, ya zhin tnu-tnu mwa, n sukwoyi n nyipyei n na abai ya bwa agyiwye, n yi ɓei cei pma ya zhin apma n cei nyi, ntuge yi to ɓei cei pma ya tu fy akayan.

⁹ Kwo to wu ge yi to ɓei n izini yi nu ya nyafye fya gayi nyagyin, ama yi ɓei cei pma ya wu fye, shi fye ɓa zhin tnu-tnu n tu fye asese ɓo.

¹⁰ Esa n yi ɓei nyi n fye aba nyi, yi ɓei ga fye wyidna ye ge, “Oza n wo ta zhin tnu-tnun wo to gyi nyagyin.”

¹¹ Ama yi wo lo ge, aza ho n fye mi ɓa wo bwato lo, to ɓai ye ba zhin tnu-tnun, ɓai wun esaya dna n na agnagba zhin nu.

¹² Dna n Dagayi Yesu Kristi eye, yi gna aza ye pya, yi gaɓa wyidna, ɓaku zhi pi, ɓa zhin tnu-tnu ɓa bwa nyagyi.

¹³ Ofye nfye ce nyi, omi azaje, ato ɓe fye n ɓemanayi zhin yin.

¹⁴ Oza n wo to vi ɓeda n yi cei kafi n a wasika ye nyin, fya kawo wye, fya pmiya nwo aba, n na bai n vinyikwo ɓa wowo.

¹⁵ Fye to shi wo awye ngye efye nuɓaim, ama fye daɓo n woi ngye ozado n wo ye a wuwo zokwo n galgadiyi.

¹⁶ Dagayi bugba fu nya, wo ga fye owo bugbafu, kwo knidoi nu bwa fya, Dagayi wo kunsun n fyei vinya.

¹⁷ Nsaiye omi gnaɓi nyi nmi ka n mi abwayi, shi mi shin zhin n mi wasika, kwa wu nge emi nu na ka, emi abwa nu kakpe n ya.

¹⁸ Eyi Dagayi Yesu Kristi anabarka ɓa kpe n fye tukwo vinya. Amin.