Aibraniyi 10 - Alkawali Woiwoyi

Domwi Woiwoyi N kwokwoyi

¹ A Yahudiyi awyidna ɓei bmiya amma kwo ɓei zhin foto nu, kwo ɓei zhin ofun nu anya manayi n Kristi ɓei zhin ntu yi ɓo. A ɓei zhin a ga sadaka cici, eye dohodohoi.

² Sadaka yi ɓei gna ge kwo ɓa gni aza nu, to ai ɓei ga cici m. Kwo bmiya mwa-mwa ga yi wa ze gyigyiyi nyalo-nyalo, to wa zhin tunani laifi nya m.

³ Amma sadaka to ɓei mi kwa nya ɓa tunani nukwoyi ya m, kwo ɓei zhin kwa pa ɓa a laifi ɓo nu cici.

⁴ Kwo to ɓei zhan ɓa a laifi ya m. Anakwo ami, na ana miyi ta mi ɓa zhan za a laifi ya m, sai dai Yesu Kristi ami gmanyi.

⁵ Ntu cenu Yesu wa ɓe anyi mi, Yesu ɓei da ɓo nu anabi ho aba wa ci ge, “Anyakpa ami ta siho ebemi — O Shekwoyi, ntu cenu hoi ga mi nayi ye, Emi nayi nu n ho ye sadaka.

⁶ Sakada anyakpa nya to ga ho bugbafu m, kwo sadaka a pirist nya ɓata mi ɓaga ho bugba fu m.”

⁷ N deye avun, fye gye, “Mi la ɓe ma ga mi wye-wyeyi ntu naza laifi ɓo. Nyanu n littafi ku da ntu mi ɓo.”

⁸ She Kristi ɓei ku da ge, anyakpa ami ta mi kwa ga yi enya n Shekwoyi ye nyi m, njesun sadaka n na gyina ntu na laifi ɓo nyi ɓa ta fu wo bugbam, A Yahudaiyi awyidna ta dawo bugba m.

⁹ Yesu wa je ɓo da n jesun wa gna, “Mi la ɓe ma ga mi wye-wyeyi, Mi ga kwo ntu n naza laifi ɓo nu. Ala zokwo kwo-kwoyi gaya. Ala ɓe n woi-woyi.”

¹⁰ Shekwoyi wo ku gafara zhin yi n zokwo woi-woi. Wola ya laifi zhanya nyalo-nyalo. Yesu nu na zhin aɓo deye ntu yi ɓo, sanu wo ɓei fi ntu ya laifi ɓo nyi.

¹¹ Nsa kwokwoyi sa, pirist ɓei zhin wa laka gni n nabye fyegyi-fyegyi, wo ɓei zhin wa ga sadaka ntu naza laifi ɓo, ama kwo ta mi kwo gni za m.

¹² Ama Yesu ɓo ga wohin zun gmanyi ntu sadaka ɓo ga Shekwoyi, wa ga wo nayi ntu ya laifi ɓo. Wo tu lo naba duduyi vinya n iko yi n kun-sun Shekwoyi n shemi.

¹³ Wo tu lo naba iko nya n kun-sun Shekwoyi yi, Owo anuwun yi ɓo fi n wo sunta. Enya nu n wo pmi, wo ɓei gyibe tu ʼɓa tukwo nyalo-nyalo.

¹⁴ Wo ku yi ze aza gyi-gyi-yi n Shekwoyi aba. Owo ami layi alaifi zhanya har nyalo-nyalo.

¹⁵ Zafun nu zhin yi seida n ge yi gyi-gyi-yilo.

¹⁶ Zafun Shekwoyi nya gna ge, “Alkawali woi-woyi nyi nɓa zhin na Israila yi. Nɓa kami awyidna kpe nɓa bugba, nɓa ku awyidna ya fi ɓa n ɓami, deye ɓa zhin ɓa kpe mi nufi ye ɓa vi ma wyidna.”

¹⁷ Wo ɓei je da ge, “Mi ku ɓa zhin gafara. Mi ta je ɓa laifi ɓo pa m, kwo kwa oɓa ɓonukwoyi zhin.”

¹⁸ Mi ku fye zhin gafara, mi ku fye alaifi ze, amwi nyalo-nyalo, kwo zhin ɓo gboloyi nu fya ga sadaka ntu fya alaifi ɓo. Yesu ku deye zo zhin n wa mi yi.

¹⁹ Emi azaje, yi ɓa mi ya lo Shekwoyi aba, Yesu ami la zokwo guya gayi.

²⁰ Yesu la zokwo woi-woyi guya gayi. Kwo zhin kwa ga wye-wyeyi, Wo la zokwo zhin yi kwoi lo Shekwoyi aba. Owo nayi ɓedo n wo ami yi nu ɓei zhin zokwo ye.

²¹ She Yesu Kristi wo nu zhin Pirist Dnagmayi, woi gyi ɓe tu n Shekwoyi puwa nyi.

²² Emi azaje, yi lo Shekwoyi aba n bugbayi guguyi ya. Yi ku gaiciya ga n ge wo ɓa gwo yi, ntu ge Yesu ami layi zhanya sarai. Zafun kwa woi zhan yi ya cici.

²³ Yi zhin aza gniyi nu kuma yi wyewyeyi lo. Yi to zhin shakka, n yi gnigni yi m, gama eyi Gni yi zhin za gaiciya da nu wohin kwa wo ɓa nu owo alkawali.

La Wye Ce N Bemanayi Zhin

²⁴ Yi zhin godiya ntu nya ɓo Yesu ku zhin gayi nyi. Yi yenajeyi, yi bma aje zhin yi ce aje bwa. Deye ɓa wu ge yi zhin Yesu abara nu hin-hin.

²⁵ Ema zaje yi to ci aduwa ɓo wyegba m, enya nu n na zaho zhin, amma yi ce aje bwa yi dna aje zokwo, Yesu jezeɓe ɓo kwo la wu viwyi.

²⁶ Yi to gyi abye fi n na laifi m, ntu ge yi kpe gaiciya ye lo. Amma n ya gyi abye n laifi zhin, Shekwoyi ta zhin yi gafara m, ya zhin yi gwo kpe m.

²⁷ Shekwoyi ɓa ta za nwa gyi abye n laifi zhin yi, Wo zhin Shekwoyi nuwun yi nu. Shekwoyi minagyi ɓo zopui nwo anuwun yi n nyipyeyi kmaknayi.

²⁸ Aɓei tu aza dole ɓa vi Musa awyidna, aza n ɓa ɓei zungna nyi ɓaɓei ku fi n tna sun-sungye. Sa n za ɓei zhin laifi, sai a bwa aseda da ngun aba kwo ngun ata laifi kwa tabbata.

²⁹ Aza ho lo ɓai kpe Shekwoyi ɓi apita, ɓai zhin aɓo ngye owo ami to ɓai gyi-gyi-yi m. Ɓa la Zafun Gyi-gyi-yi la minagyi ka. Oza n wo zhin aɓo deye pya, wo ɓa gwo tata dnagmayi, wo to ɓei lo Shekwoyi bemi m.

³⁰ Shekwoyi ɓei da ge, “Tagba kwo zhin mi nya nu. Nɓa ga ɓa amsa.” Nɓa ka aɓei da ya. “Nɓa da aza owa, nɓa ta aɓenukwoyi zhin yi.”

³¹ Nkanu ɓa kpe Shekwoyi minagyi ɓo ye a? Kwo zhin ɓo dnawoyi nu oza lo Shekwoyi wada.

³² Ho kpe sa lo n ho ɓo ya Yesu vi ncei yi? Emazaje, fye to ze wyihi amwi m. Anyipyeyi gmada nya n naɓo wowoyi: Fye ku wahala sin ntu Yesu eye ɓo, amma fyehin kwa fye, ku hakuri bwa. Fyeto na wo aɓo m amma fye vi wo cici.

³³ Mi pa salo naza ɓei zhin ɓai lu fye, ɓai ma fye san. Fye gye aza sun-sun nɓa ɓei zhin ɓai sin wahala n gye fye nyi, kwo zhin hali manayi nu. Shekwoyi kwa wo dagma lo n fyei.

³⁴ Fye ɓei sin wahala ɓedo n naza yi n ɓafi n kurkuku. Fye to ɓei damu sa n na ɓei ku fye akaya m, fye ɓo ku Shekwoyi kpeye har fyei kpema wo. Fye kpe lo ge, gyiba dnagmayi lo kwoi pmi fye nʼshemi.

³⁵ Fye to fa kpema Shekwoyi ɓo m, kwo n wuso-wuso, fye to fa m. Shekwoyi n lada yi shi fye lo n ʼshemi.

³⁶ Fye zhin peceiye, fya zhin hankuri. Deye fye zhin Shekwoyi ɓeye nu. N fya zhin Shekwoyi ɓeye, fye ɓei gwo lada n mwa.

³⁷ Sa fyewyi, Yesu jezeɓe lo, wo ta mwa sam. Fye zhin hankuri fya pmi wo.

³⁸ A Yesu viyi zhin Shekwoyi aɓi nu vinya, dole ya zan-zan dna n gaiciya ga. Nna ɓo vinya la kpema wo fyeto fa Dagayi vi ɓom, Shekwoyi ta wo agmada n nazai n ɓa jeze n navun yi m.

³⁹ Ama yi zhin wo aviyi nu ɓehin-hin nya. Yi to ye ya jeze navun yi m Eyi gaiciya ga kwo ci seda lo ge yi wye-wyeyi nyalo-nyalo nya yi lo.