ZEPHANIA 2 - PATHIEN LEKHABU THIENGTHO (BSI)

Lunghei Dinga Sapna

¹ Aw nam zahchâkna dân helote haw!

² Pakcha guola na vuoi u a, na thihna ding niu a hungtun ma leh, Lalpa lungnatna nasatak chuh na chung u a a hungtun ma leh, a lungnatna lauh-um tak chuh a hun etsak ma hin, heu in!

³ Nang haw, leia mi kingainiem chengcheng, a thupiek zuite haw, Lalpa chuh hawl un! Diktatna hawl un la, a masanga chun kingainiem un Tichun, Lalpa lungnatna ni achun na suokcha kha mawh ding u!

Israel te Kimvela Namte Tawpna chuh

⁴ Gaza khawpi achun khat chale nutsieh in um puo’n tin; Ashkelon chuh taihsan in um in a. Sun lai takin Ashdod khuo mite chuh nawhdawkin um un tin; Ekron khuo mite chuh a khawpiu apat in delh dawkin um un au.

⁵ Luipi panga cheng, Kareth namte, na chunguh a gik hi! Aw Kanaan, Philistia gam, Lalpa chun na chungchâng thuu a tan tai! Hun sumangthai vek intin, khat chale nutsieh in um puo’n lau!

⁶ Chun, tuipi pang chuh hamhing mun hi’n tin, belam chingte giehbuk leh, belamte huong hi’n au.

⁷ Tichun, Tuipi pang gam chuh Juda inkuon umna lai sunte’n luoh un tin, zie tak achun a belam hawnteu chuh tau un tin, nitâk lam leh Ashkelon khuo hawa chun giek un au. Lalpa a Pathien u chun amau haw chuh hun tawhtha kit intin, a saltannau apat chun tungdawk kit ina.

⁸ Moab mite elhona leh Ammon-mite’n ka mite a sukminsietnau leh a eu launau leh a gam uh a lâksaknau chunga a chapo danteu chule ka he tai.

⁹ Khutichun, Sepaihte Lalpa, Israel Pathien chun, “A hi’n a ka hin sung chuh, Moab chuh Sodom tawbang hung hi’n tin, Ammon te chuh Gomorra mite bang hung hi’n au; thakhai mun leh chi khuk leh kumkhuo luoh loh hung hi’n a. Ka mi a na um nalaite chun amau haw chawmgam un tin, a gam u chuh luoh un au.”

¹⁰ Zie chuh Moab mite leh Ammon mite chun kiletsak leh chapo taka Lalpa Sepaihte Lalpa mite a sukminsiet ziek u a, gawtna chuh hi ding ahi.

¹¹ Amau a dingin Lalpa chuh tizat-um tak hi’n tin, leia pathiente chuh sumangthai vek in tin, tichun, namtin a masang ah khun un tin, mitin in amau mun chiet apat in Amah chuh ho ta’n au.

¹² Nanguh Ethiopia mite le ka chemzâm a thah a um ding na hiu hi.

¹³ Lalpa chun Asuria te sukmangthaina dingin a thilhih-theihna suoh in tin, Ninevi khuo chuh khawpi siesa leh taihsansa leh thalek, tui um lohna bangin siem in a,

¹⁴ Tichun, a sung achun gan hawnte leh ganhing chi tinte giek un tin, Simbute chuh thilsie lak achun cheng un tin, a tukvan haw achun hâm un au! Chun, vangawngsau leh sakuh te chuh a pindan chungnung ah giek un tin, Sidar thinga In kisa haw chuh suksiet hiding ahi ngâl a.

¹⁵ Ziehi a thilhih theihna kisuonpih a, a lungthim un, Kei ka hi, chun kei tih loh midang a um puoi, a ti a. Himahleh, khawpi taihsan leh, a sunga gamsate chênna mun a hung hi zaw tai! A kawm hawh taphawtte chun hipsa kawma chekkhum in, a luchang uh thinkhum un au!