ZEPHANIA 1 - PATHIEN LEKHABU THIENGTHO (BSI)

Lalpa Lungnatna Ni

¹ Juda leng Amon chapa Josia lal laia Lalpa thu Zephania, Kushi chapa, Gedalia chapa, Amaria chapa, Hezekia chapa kawma Lalpa thu hungtung chuh ziehi ahi.

Lalpa Thutanna Ni

² “Lei chunga thil chengcheng hi a bawnin sumangthai vek ding ka hi, Lalpa’n a tii.

³ Mihing leh ganhingte chuh sumangthai ing ka ting, vanthamzawl a vachate leh tuipi a ngate le sumangthai vek ing ka ting. Minunsie te puksietna ding chuh hih ding ka hi. Mihing chengcheng chuh sumangthai ing ka, Lalpa’n a tii.

⁴ “Judate leh Jerusalem luohte chengcheng chung achun ka khut lam ing ka ting zie mun apat hin Baal ana um nalaite Kemarim min chuh a thiempute pum in thiel dawk ing ka.

⁵ A inchung a kaldawk a, nisa te, tha te, aksi hote chuh sumangthai vek ding ka hi. Kei ei ho a, ginum taka um dinga thutiem bawl a, himahlele, zie nunga chuh Milkom min a kihâksielna neite chule sumangthai vek ing ka.

⁶ Kei ei kiheimangsan a, ei zui lote leh, amau haw pui dinga ei dawng lote chuh sumangthai ding ka hi,” ti’n.

⁷ Lalpa ni chuh a nai ta a, Pathien in a nasep ding a hun sepna ding ngêi chuh: zieziekchun, a masang achun thip kêi in um un!

⁸ “Zie kithawhna ni a chun,” Lalpa chun a tii: “Milien te chuh gawt ing ka ting, leng chapate leh nam dang mite thilhih entawn taphawtte chuh gawt ing ka.

⁹ Milim hote banga ho a, a pute in gâllâk thila a suk dim theihna dinga gu a, thatte cheng chuh gawt ing ka.

¹⁰ “Zie ni chuleh, nga kawtkhak apat a kiko thawm te, Mishnah apat a kah git te, tâng chunga gi hum hum te hun za’n lau, tih hi Lalpa kamsuok ahi.

¹¹ Maktesh-mite haw, sumkawlveite chengcheng chuh a manthai ziekun kap chuoi chuoi un Dangkaguo bûkna a bûkte chengcheng chule suktawp a hi ta ngâl a!

¹² “Chun, zie tieng chuleh, thaumei hâl in Jerusalem hawl dawk ka ting; mi, amau kisulungkim a, muong taka um maimai a, a lunggil u a, ‘Lalpa chun a hih pha puoh a, hih le a hihsie diek puoi,’ tite chuh gawt ing ka.

¹³ A thuomphuo teu chuh gukmang hung hi’n tin, a inteu chuh sie’n tin; ahi, inte sau intin, mahleh luoh diek puo’n au. Grep huonte bawl un tin, himahleh, uain chuh dâwn diek puo’n au.”

¹⁴ Lalpa ni lopitak chuh a nai tai! a nai ta a, hungtung vak ding ahi! Lungkhamna ni hi’n tin, zie tak a chun, mi hangsan pên chule lungdawng in mau vungvung ina.

¹⁵ Zie ni chuh lungnatna ni hi’n tin, lungkhamna leh gimtheihna ni, sietna leh hawm na ni, thimna leh khawnîm ni, mei leh thim sah tak ni hi’n a.

¹⁶ Kulh a ki-um khawpite chunghaw leh, gâlven kulh sangte chunga kidona pengkun leh galdo kiko thawm a dimna ni hi’n a.

¹⁷ Lalpa chun, “Mihingte chungah gimtheihna tun sak ka ting, mitdûk bang mai in kimai viel dut dut un au. Ka chunga a gitloh tâk ziekun a thisan u chuh tui bangin sung tha’ng ka ting, a thi luongteu chuh tuol ah muot zeng zung in a.”

¹⁸ Lalpa lungnatna ni chun, a sana teu, a dangkaguoteu ahim in la amau haw hukdawk thei puo’n tin; gam pumpi hi a lungnatna mei chun ka zo vek in a. Gamsung a um chengcheng sumangthai ding ahi a, ahi, manthaina huoisie tak tung ding ahi ngâla.