ZEKARIA 5 - PATHIEN LEKHABU THIENGTHO (BSI)

Lehkhabuziel Leng

¹ Tichun, ka vak dâk dawk kit leh, ngaitie, tuhin chuh lehkhabuziel leng dul dul hi ka mu a!

² Chun, amah chun ka kawmah, “Banga na muh?” a ti a. Kei chun ka dâwng a, “Lehkhabuziel leng ka mu a, a dung chuh tawng sawmnih ahi a, a vailam chuh tawng sawm ahi,” ka ti a.

³ Chun, amah chun ka kawmah, “Zie chung ahin gam pumpi chunga hansie chiehdawk chuh a kizik hi, langkhat a chun, ‘Tu apat in gucha taphawt chuh, sukmang hi ding ahi ngâl u a,’ tih a chuong a, a sik langkhat achun, ‘Lepchieh a kipautiem a taphawt chule sukmang hi’n au.’ ti’n a kizik hi.

⁴ Sawl dawk ing ka ting, guchate leh ka min a lepchieh a kipautiem te In achun lut in tin, chun um zing intin, a sidar thingte leh a suongte pum in sumang vek ina,” tih hi bangkim hihthei Lalpa kamsuok ahi.

⁵ Chun, vânsâwlchâk chun a hun naih kit a, hiti hin a gen a, “En in, thil dang khat a hungtung kit hi,” a ti a.

⁶ Kei chun a kawmah, “Zie chuh bang ahi?” ka ti a. Amah chun, “Zie chuh ephah ahi a; zie hi gam pumpi gitlohna chuh ahi,” a ti a.

⁷ Bawm chun a sitna suongthik a kisiem a nei a. Ka et zing lai chun, a sin chuh a hung kihawng a, a sunga chun numei ephah chunga chu a uma!

⁸ Chun, amah chun, “Zie hi nunsietna chuh ahi,” a ti a. Tichun, bawm sung achun a sawn lut kit a, a sin kit ta a.

⁹ Ka vak dâk dawk kit leh, numei nih kei lam zuona hattak a hung leng hi ka mu a. A thau achun huih a um a; a tha chuh vacha tha tawbang ahi a, chun ephah chuh lei leh van kal ah a khaidawk u a, a lênmangpih tau hi.

¹⁰ Ziephet chun, vânsâwlchâk ei hopih chuh ka dawng a, “Ephah chuh khawilam a a tawhmang dinguh ahi?” ka ti a.

¹¹ Chun, amah chun ka kawmah, “Shinar gama In sa dingin, In chuh zawh a hih tieng leh zie tak achun amah mun ngêi ah kawih un au,” a ti a.