ZEKARIA 4 - PATHIEN LEKHABU THIENGTHO (BSI)

Thaumei Kawihna leh olive kung nih

¹ Chun, vânsâwlchâk ei hopihpa kha a hungkit a, mi ipmu lai phawn bang mai in ei hun phawng a,

² Ka kawmah “Bang na mu?” ti’n ei dawng a. Kei chun ka dâwng a, “Ngaitie, Dangkaguo a kisiem thaumei tunna ka mu a, a sip a a thau kawihna ding kuong tawh. Thaumei sagih a dinga phita kikawih chule ka mu a,

³ Thaumei tunna kuong sik achun olive thing nih a um a, a sik tuoka chuh um ahi,” ka ti a.

⁴ Chun, Vânsâwlchâk ei hopih kawm achun, “Hepu, ziehaw hi bang ahi?” ka vak ti a.

⁵ Chun, vânsâwlchâk ei hopih chun ei dawng a, ka kawmah, “Ziehaw hi bang ahih na he puo maw?” a ti a. Kei chun, “Ka he puoi, hepu,” ka ti a.

Zerubabel kawma Pathien Thutiem

⁶ Chun, amah chun ka kawmah, zie hi Zerubabel kawma Lalpa thu chuh ahi: “Hatna hilo in, thilhih theihna le hi diek lo in, Ka thagau thilhih theih na zawk in la uo! Bangkim hihthei Lalpa chun a tii.

⁷ Nanguh tâng lien te haw bang na hiu hi? Zerubabel masang achun phaicham hung suok ding na hiu a; Ho-In chuh hun tungdawk kit in tin; Amah chun a suong pawimawh pên chuh hun ladawk in tin, a chunga ‘Zahngaihna, zahngaihna’ ti a kiko kawmin,” ti’n ei dawng a.

⁸ Zielo chun, Lalpa thu chuh ka kawmah a hungtung kita,

⁹ Ka kawmah, “Zerubabel khut in suongphum chuh a phum a, amah khut ngêi in a In chule sazo in tin; zie tieng chu leh ka mite chun Bangkim hihthei Lalpa’n na kawm u ah kei ei sawl ahi tih he ta’n au.”

¹⁰ Vânsâwlchâk chun ka kawmah, “Thaumei sagihte chuh Lalpa mit, khawvel pumpi ahin a vakviel sek uh ahi,” a ti a.

¹¹ Chun, kei chun ka dawng a, a kawmah “Thaumei tunna olive thing nih veilam leh changlam a te khu bang tihna ahi?” ti’n ka dawng a.

¹² “Chuleh, sana tuilawng nih te olive thau hung luonsukna te khu bang tihna a, zie apat chun sana sathau a hung pawtdawk seka?” ti’n ka dawng kita.

¹³ Amah chun, “Ziehaw hi bang ahiu em tih nangin helo na him?” ei ti a. chun, kei chun, “Hepu, ka he puoi,” ka ti a.

¹⁴ Ziephet chun, amah chun, “Zie chuh mi nih, khawvel pumpi a Lalpa nasem dinga Pathien in a tel leh thau a nuhte chuh ahiu hi,” ti’n ei dâwng a.