ZEKARIA 3 - PATHIEN LEKHABU THIENGTHO (BSI)

Kilâknaa Thiempu Lien Muhna

¹ Chun, thiempu lien Joshua, Lalpa vânsâwlchâk maa ding leh, amah hêk dinga Setan, a changlam panga ding chuh ei etsak a.

² Chun, Lalpa’n Setan kawm achun, “Aw Setan, Lalpa chun hun gai zaw hen: Ahi, Lalpa Jerusalem tel pa chun hun gai he’n! Ziehi, meikuong laka pata thingkhuoh lâkdawk tawbang hilo ahim?” a ti a.

³ Tichun, Joshua chuh silhlechen nin taka kithuom in vânsâwlchâk ma achun a hung ding ta a.

⁴ Chun, a masanga dingte chuh vânsâwlchâk chun a vak hopih a, “A silhlechen ni’n chuh suoh sak un,” ti’n. Chun, amah kawm achun, na manlohnate chuh ka hun sukmang sak ta a, tuhin, silhlechen thak takin hun van ing ka, a ti a.

⁵ A nasemte chuh diel vam tak Joshua kawp sak dingin thu a pie a. Tichun, a luchang ah diel vam tak a kawpsak tau a, silhlechen in a van u a, zielai chun Lalpa vânsâwlchâk chuh a kawmah a dinga.

⁶ Chun, Lalpa vânsâwlchâk chun Joshua kawmah, Bangkim hihthei Lalpa chun hiti hin a tii:

⁷ “Ka lampite na hawh a, ka thupiekte na zawp chun, Ka insung vaihawm in na tin, Ka vaihawmna munte chule enkawl in na tin; Zie taka dingte laka tel theihna ding hi hun pie’ng ka.

⁸ Zieziekchun, nang thiempu Lienpen Joshua, ngaitha’n! Nang haw thiempu naseppihte haw, ngaithau in, masang hun lama thilpha hungtung ding etsakna na hi ngâl u a: Ka suokpa, a Bakpi kiti chuh hun sulang ding ka hi.

⁹ Ngaitie, Joshua masanga ka suong kawih chuh, suong khat achun mit sagih a um a, a chunga chun vih kuok thawh in lehkha zik ing ka ting, zie gam sunga gitlohna chengcheng hi ni khat thu’n lamang vek ing ka tih hi Bangkim hihthei Lalpa thugen ahi.

¹⁰ Zie ni a hungtun tieng chuleh, na lak u a mitin in, na invengteu chiet, ‘Ka grep huonteu leh, theipi ûmkimvel sunga muonna leh bitna hung matpih dingin hung un,’ ti’n chiel chiet ta’n lau,” Lalpa’n a tii.