ZEKARIA 2 - PATHIEN LEKHABU THIENGTHO (BSI)

Kilâknaa Tehna khau Muhna

¹ Chun, ka vak dâk dawka, kilâkna dang khat ka muh chun mi, a khuta tehna khau chawi hi ka mu a.

² Tichun, kei chun, “Khawia chieh ding na hi?” ka ti a. Amah chun ka kawmah, “Jerusalem hi a dung a vai bang tieh ahim tih he dingin, teh ah,” a ti a.

³ Tichun, vânsâwlchâk ei hopihpa kha, malam ah a chieh chawn deuh a, chun, vânsâwlchâk dang mah kituokpih dingin a hung pawt a,

⁴ a kawmah, “Tai inla, zie tangval kawma hin, Jerusalem hi mipi tam ziek leh ganguol tam ziek hin, kulh bâng nei theilo khawpa hung um ding ahi.

⁵ Tichun, Kei hi a kimvel ah mei kulh hi’ng ka ting, a sung achun lopi taka cheng ding ka hi ngâl a,” Lalpa’n a tii.

Saltâng Vaihkitna ding

⁶ Khaile hung pawt unla! mâllam apat in taidawk un. Lalpa’n a tii. “Van huih lite bangin ka hun hih zak ta ngâla, Lalpa’n a tii.

⁷ Nanguh Babulon chanu tawh cheng khawm te haw hung vaikit un la, Zion ah hung vaikit un!

⁸ Nanguh hun khawihkhate chuh, Ka mit naucha khawihkha ahi ngâl u a,” ti’n. Khutichun, Bangkim hihthei Lalpa chun, a mite delh zak haw namte kawma ding chun, zie thu haw hi tawh ei sawl ahi.

⁹ “Lalpa ngêi chun hun do in tin, tumasang a suok a na neih namteu chun hun thehzak un au,” ti’n. Zie chuh a hungtun tieng leh, mi cheng cheng in, Bangkim hihthei Lalpa chun ei sawl ahi tih he ta’n au.

¹⁰ “Aw Zion chanute, lâwpin la sau in! Na lak uh a cheng dingin ka hung ta ngâl a,” Lalpa’n a tii.

¹¹ Zie hun tieng chuleh, namtin in Lalpa lam hun zuon tau un tin; a mite hung hi ta’n au. Na laku ah cheng ing ka ting, tichun, na kawm u ahin amah ngêi in ei sawl ahi tih he ta’n la.

¹² Chun, Lalpa chun gam thiengtho a a chanvo dingin Juda chuh gochan in chang intin, Jerusalem chuh hun tel ina.

¹³ Mi cheng chengte haw, Lalpa ma achun thipkêi in um un. Amah chuh amun thiengtho a kipatin a hung kipan ta ngâla, ti’n va gen in, a ti a.