ZEKARIA 12 - PATHIEN LEKHABU THIENGTHO (BSI)

Jerusalem Hukdawkna ding

¹ Israel chungchanga Lalpa thu puokgik chuh! Lalpa, vante kaimalh a, leisiet kingakna phumpa leh mihingte kawma thagau pie thu pawt chuh hiti hi ahi.

² “Ngaitiem u, Jerusalem chuh a kimvela namte a ding in uain khamna khawn tawbang in siem ding ka hi. Khutichun, Jerusalem chuh huola a um tieng leh, Juda khawpi a chêngte chule huol khum in um un au!

³ Himahleh, zie hun chuh a hungtun tieng leh, Jerusalem chuh suongtum gik tak tawbang in siem ing ka ting, kuo namte hitaleh, a dawpkang guo taphawt chuh amau leh amau kisuliem un tin. Tichun, khawvel a nam chengte chu amah do dingin kipunkhawm un au.

⁴ “Zie ni chuleh sakawl chengcheng chuh zêp lau ka ting, a chung a chuongte chuh sungawl ing ka ting; himahleh, Juda inkawte chung achun ka mit hak ing ka ting, a melmateu sakawl haw chuh a mit uh sudûk ing ka,” Lalpa’n a tii.

⁵ Tichun, Juda lalte chun, a lunggil un, “Jerusalem luohte hi, Bangkim hihthei Lalpa a Pathien uh kawm achun ka hatna ahiu hi,” a lungthim un hun ti’n au.

⁶ Zie ni chuleh Juda lalte chuh thing kitik kuong laka bel so vutvut bangin siem ing ka ting; buhpawl mei in a kâk bangin siem ing ka. Tichun, changlam leh veilam a cheng, namte cheng chuh kâng tum ina. Chun, Jerusalem mite chuh amau mun ngêi khawpi a chun bit takin um zing un au.

⁷ David suonte lopina leh Jerusalem luohte lopina chuh, Juda khela suklata a um loh na dingin, Lalpa chun Juda puon-In haw chuh hukdawk masapen ina.

⁸ Zie ni chuleh Lalpa chun, Jerusalem luohte chuh humbit intin; zie ni chuleh, a lak u a hatlo pên chule, David tawbang a hât hung hi’n tin, Tichun, David insung chuh Pathien tawbang hung hiu un tin, amau haw masang achun Lalpa vânsâwlchâk tawbang in ma pui un au.

⁹ Zie ni chuleh hiti hi hi’n tin, Jerusalem hun do guo namte cheng chuh sukmang na dinga hawl ing ka.

A Messia’u Sûnna

¹⁰ Chun, David inkawte chung leh Jerusalem a chêngte chung achun lungsietna leh ngetna thagau sungtha’ng ka ting, chun, a sut pau hi hun en un tin, tichun, mi’n a chapa neihsun a sun bangin sun un tin; mi’n cha lutîl chunga a thuok bangin thuok un au.

¹¹ Zie ni chuleh Jerusalem achun sûnna nasatak um intin; Megiddo guoma Hadadrimmon muna sûnna bang khah hiding ahi!

¹² Tichun, a gam chun sûn intin, a inkuon chietin sun un tin; David suon inkawte’n a chuom in, a ziteu in a chuom in, Nathan suon inkawte’n a chuom in, a ziteu in a chuom in.

¹³ Levi inkuon in a chuom in, a ziteu in a chuom in, Shimei suon inkawte’n a chuom in; a ziteu in a chuom in, zie guol chun, inkuon dang cheng chun le sun un au!

¹⁴ Inkuon dang cheng chengin le a chuom in, inkuon tina pasalte leh a ziteu chun le a chuom chietin sûnna nei un au!