ZEKARIA 11 - PATHIEN LEKHABU THIENGTHO (BSI)

Mi nunsiete Pukna

¹ Aw Lebanon, na kawtkhakte hawng ah! na sidar thingte mei in a kâk tum theihna dingin.

² Aw châk thing, mau vungvung ah! Sidar chuh a puk tâk ziekin, A phapente chuh suksiet ahi ta ngâl a. Bashana gangpi thingte haw, kiko chuoi chuoi un! Gammâng thingte a puk zo ta ngâl a.

³ Belampute kahlemau git chuh ngaitie; a lopina teu chuh a sie zo ta ngâl a. Sakeibaknei kitum git khu ngaiin! Jordan gammâng chuh suksiet ahi ta ngâl a.

Belampu chi Nih

⁴ Lalpa ka Pathien chun hiti hin a gen hi: “Gancha guola thah zieng ding a umte chuh enkawl ah, a ti a.

⁵ A chawte chun a that sek u a, mawhchang in a kingai puou hi. A zuokte chun, ‘Lalpa chuh pahchak in um hen, ka hung hausa ta ngâl a,’ a tiu a; Belampute ngêi chun le amau chung achun lainatna a nei diek puou,” ti’n.

⁶ (“Lei chunga chêngte hi lainat lo ding ka hi ngâl a, Lalpa’n a tii; chun, ngaitiem u! mi cheng chuh a invengpa khut leh, a lengpa khuta chu pie ding ka hi: tichun, gam chuh susieu intin, a khut u apat in hukdawk puo’ng ka,”)

⁷ Khutichun, gancha guola thah ding a um mite chuh ka enkawl a, ganguolte laka a gimtheite ngêi chuh, Chun, mawlh nih ka la a, khat chuh, “Deihsakna” ka vawh a, khatzaw chuh, “Kipumkhatna” ka vawh a; tichun, belamte chuh ka vak a.

⁸ Belampu dang ei mudah thum te chung achun ka zaidawh zo ta puoh a, a bawn u chun tha khat sungin ka sumangthai vek ta a.

⁹ Chun, a kawmuh achun, “Nanguh chingpa hi puo’ng ka, a thi ding chuh thi hen la, sukmangthai a um ding chuh, sukmangthai in um mai hen. Chun, a thi mâwk cheng chuh, amau taksa kinetuoh u hen,” ka ti a.

¹⁰ Namte kawma ka thugawlh chuh phel a hih theihna dingin, ka mawlh, “Deihsakna,” ka vawh chuh ka la a, ka hekbawng a,

¹¹ Khutichun, thugawlh chuh zie ni chun sukbeih ahi ta a. Tichun, belam chaw a, zuokte chun ei en u a, ka thilhih apat chun, Lalpa’n ka kawmah thu a gen hi tih chuh a he tau a.

¹² A kawm u ah chun, “Pha na sak u chun, ka lawh chuh ei pieu inla, pha na sak loh u chun, nangun kawl un,” ka ti a. Khutichun, ka lawh dingin dangkaguo, sekel sawmthum a bûk dawk tau a.

¹³ Lalpa chun ka kawmah, “Kei man dinga pha a sak hun phet u chuh bêldêngpa pieu in,” a ti a. Chun, dangkaguo sekel sawmthum chuh ka laa, Lalpa In a bêldêngpa kawma chun ka pie ta a.

¹⁴ Khutichun, Juda leh Israel inkuon kikala ki-unau na chuh ka suktan theihna dingin, ka mawlh dang, “Kipumkhatna” ka vawh chuh ka la a, ka hekbawng a.

¹⁵ Chun, Lalpa chun ka kawmah, “Belampu mattâk lo pa matchâk chuh va la kit zel tie” a ti a.

¹⁶ Chun, ngaitie, gamsung achun belampu kawih ing ka ting, himahleh, amah chun a mangthaite le a hawl diek puo’n tin, a note chule hawl diek puo’n a, a liemte le sudam puo’n tin, a hatlaite le vak diek puo’n a. Khutih malak in, belam thau thau chuh a sa a ne a, a kengtin teu chuh a khetsiet sak zaw ding ahi.

¹⁷ Belampu mattakloh, a belam te taihsan te chung chuh a gik hi! Chemzâm chuh a khut leh a mit changlam achun chu hen la, a bân chuh gaw zo vek hen la; a mit changlam chuh thim chak kêi hen! ti’n.