VAIHAWMTE 9 - PATHIEN LEKHABU THIENGTHO (BSI)

Abimelek Chanchin

¹ Chun, Jerubaal chapa Abimelek chuh Sekem khuo a a nu suohpih te kawmah a va chieh a, a nu inkuon pih chengcheng chuh a hopih a, hiti hin a gen tai.

² Sekem khuo a mite chengcheng zak in thugen in la, “Gideon chate mi sawm sagih te’n na chung u a vai a hawm uh ahim pha na sak zawk uh, mi khat in na chung u a vai a hawm ti tiem u Chun, keile na guh leh pheh ngêi uh ka hi tih hezing un,” ti’n a kawm u ah a gen a.

³ Chun, a nu inkawte chun Sekem khuo a mite zak in zie thu chuh a gen u a, tichun, “I inkuon pih pau ahi,” ti’n Abimelek chuh zui dingin thupukna a siem tau a.

⁴ Chun, Baal-berith In a kipat chun amah chuh dangka sawm sagih a pieu a, zie chun Abimelek chun mi dukdaklo leh ngaihsam taktak haw chuh a guoi u a, amau haw chun amah chuh a zui tau a.

⁵ Chun, Ophrah a a pa In ah a va chieh a, Gideon chapate, suohpih sawm sagih te chuh suongpi khat chungah a bawn un a that a; ahi’n Jerubaal chate laka a naupang pên Jotham chuh a na kiselguk ziek in thah loh in a suokcha a.

⁶ Chun, Sekem khuo a mi chengcheng leh Beth-millo a mi chengcheng chuh a kikhawm u a, Sekem a gangpi thingbul nuoi achun leng dingin a siem tau hi.

Jotham Tehkal thu

⁷ Chun, zie thu chuh Jotham a hilh u a, tichun Jotham chuh a chiehto a, Gerizim tângsip ah a va dinga, aw ngeih tak in a kiko a, a kawm u ah, “Nang haw Sekem mite haw, ka thugen hih ngaitha tiem u, khutileh Pathien in na thuu a na ngaitha ding ahi,

⁸ Khatvei chuh thing hawn hih a leng ding uh thau nuh dingin a kuon dawk tau a; olive thing kawmah, ‘Ka chung u a vaihawm in hung pang tie,’ a tiu a.

⁹ Himahlele, olive thing chun a kawm u ah, ‘pathien leh mihing te’n ei zahna pên uh thau ka piekdawk hi haihsan in, thing dangte pahchak mai a um ding ka him?’ a ti a.

¹⁰ Chun, thing haw chun theipi kung kawma hin, ‘Hung inla, ka leng un hung pang tie,’ a va tikit u a.

¹¹ Himahlele, theipi kung chun a kawm u ah, ‘Ka thumna leh ka gah phatak hi taihsan in thing dang chungah ka chawm vielviel dinga ahim?’ a ti a.

¹² Chun, thing haw chun grep gui kawmah, ‘Hung inla, ka leng un hung pang tie,’ a va tikit u a.

¹³ Chun, grep gui chun a kawm u ah, ‘Pathien leh mihing sukipak sek ka tui thum tak hi taihsan in thing dang chungah ka chawm vielviel ding a ahim?’ a ti a.

¹⁴ Khutichun, thing haw chun lingbawk kawmah, ‘Hung inla nang ka leng un hung pang tie,’ a tiu a.

¹⁵ Chun, ling chun thing haw kawm achun, ‘Na leng ding uh a sathau nei nuh takzet u chun ka lîm a hin hung châwl tau u leh; khutichuh ahih loh chun ling bawk a chun mei hung pawt in Lebanon tânga sidar thing haw chuh katum vek hen,’ a ti a.

¹⁶ “Khutichun, Abimelek na leng ding uh a na tel u hih, tihtakzet leh diktaka na hih uh ahih chun, Gideon leh a inkawte chuh phatak a na bawl u a, a kilawm hun pheta hih na hih u a;

¹⁷ Ka pa hin na gâl uh a hun do saka, a hinna a na pie hiel a, Midian te khut apat in a hun hukdawk ta a.

¹⁸ Tuni hin ka pa inkawte chungah na hung kiphin u a, a chapa sawm sagihte suongpi chungah na that u a, na suohpih pau ahih ziekin a suoknu chapa Abimelek hi Sekem ah leng ding in na siem ngâl u a.

¹⁹ Tuni hin Jerubaal leh a inkawte chung a tihtakzet leh diktaka hih na hih u chun Abimelek chung ahin kipâk unla, tichun, amah le na chung u ahin kipâk hen.

²⁰ Khutibang chuh ahihloh chun Abimelek apat hin mei hung kuong hen la, Sekem a mite leh Beth-millo a mite chuh katum suok kêi hen; chun, Sekem khuo a mite leh Beth-millo a kipatin mei hung kuong dawk henla, Abimelek chuh katum hen,” a ti a.

²¹ Khutichun, Jotham chuh a taimang a. Beer lam ah a um ta a, a suohpih pa Abimelek a lauh ziekin zie tak achun a um zing ta a.

²² Chun, Abimelek chun Israel chate chungah kum thum vai a hawma.

²³ Chun, Pathien in Abimelek leh Sekem khuo mite kikal achun kimuh thiemlohna thagau a hun sawl a, tichun Sekem khuo a mite chun Abimelek chuh a mudah tau a.

²⁴ Zie chuh Gideon chapa sawm sagihte a thah ziek u a a chung u a phuba lâkna a hung tun theih na ding leh, amau haw that pa, a suohpih pau Abimelek chung leh, a suohpih te that dinga a khut uh a na hih hât sak Sekem te chunga thiemlohna a um theih na dinga hung um ahi.

²⁵ Zie phat chun, Sekem a mite chuh amah chânggu dingin tângsip haw achun a kawih u a, zie lampi hawh taphawt chuh a na suom sek u a; zie thu chuh Abimelek a hilh u a.

²⁶ Chun, Ebed chapa Gaal chuh a suohpih te tawh a hung kuon u a, Sekem khuo ah a lut u a, Sekem te chun amah chuh a muong mah mah u a.

²⁷ Chun, Sekem khuo mite chuh lo lam ah a va chieh u a, grep haw chuh a lo u a, a chil u a, guolvak a bawl u a, a pathien teu In ah a lut u a, a neu in a dâwn u a, Abimelek chuh musit takin a bawl tau a.

²⁸ Chun, Ebed chapa Gaal chun, “Abimelek chuh kuo a? Sekem chule kuo ahi a eihaw’n a na I va sep sak dinguh ahi? Jerubaal chapa hilo ahim? Zebul hi a lawiupa hilo ahim? Sekem pa Hamor mite nasem zawi tiu. Bang ziekin em amah na chuh I sep dinguh?

²⁹ Zie mite haw hih ka thu’n hung um leu chu aw, Abimelek hih nawhdawk zieng ding ka hi,” a ti a. chun, Abimelek kawmah, “Na sepaih lakbeh inla, hung kuon ah,” a ti a.

³⁰ Chun, zie khuo a vaihawm Zebul chun Ebed chapa Gaal thugen chuh a zak in a lung a hung na phut ta a.

³¹ Tichun, Arumah a um Abimelek kawma chun, “Ngaitie, Ebed chapa Gaal leh a suohpih te Sekem ah a hung u a; na chunga kiphinna siem guo’n khaw mite a tîldawk hi.

³² Khutichun, na mite tawh a zan a zan in hung kipan unla, phullak ah a na châng pang un.

³³ Tichun, hiti hi hi’n tin, zingkala ni a hung suok tieng kipan unla, khuo chuh hun do mai in; Gaal leh a mite chun hun do thuk ding ahiu hi. Pha na sak bang bangin a chung uh ah hun bawl mai in,” ti a hilh dingin mi a sawl a.

³⁴ Khutichun, Abimelek leh a lawite chengcheng chuh a zan a zan in a tho u a, pawl li a kikhen in Sekem khuo chuh a huol tau a.

³⁵ Chun, Ebed chapa Gaal chuh a va pawt a, khawpi lutna kawt achun a va dinga; chun Abimelek chuh a mite tawh a chângpannau apat chun a hung pawt u a.

³⁶ Chun, Gaal in mite a vak muh phet chun Zebul kawmah, “Ngaitie, tâng chung lama pat in mipi a hungsuk ui,” a ti a. Chun, Zebul chun a kawmah, “Zie a tâng lim haw khuh mihing banga na muh hoh ahim?” a ti a.

³⁷ Chun, Gaal chun, “Vak en ta’n la, gam lailung tak a khun mipi a hungsuk ui, pawl khat vang chuh Meonenim gangpi thing umna lampi ah a hung ui,” a ti a.

³⁸ Tichun, Zebul chun a kawmah, “Abimelek chuh kuo ahi a a na a va sep sak dinguh ahim, ti a na gen te kha hilo ahiu hi? a ti a. Ziehaw hih na mi muhsit te ngêi kha hilo ahiu maw? va pawt inla va do ta leh,” a ti a.

³⁹ Tichun, Gaal chuh Sekem te masang achun a va pawt a, Abimelek chuh a va do ta a,

⁴⁰ Chun Abimelek chun a hun delh a, tichun a masang achun a taisie ta a. Khawpi lutna kawtkhak tieng chun mi tamtak chuh liem in a puk lemlum mai tau hi:

⁴¹ Chun, Abimelek chuh Arumah mun a chun a um ta a; tichun, Zebul chun Gaal leh a suohpih te chuh Sekem a cheng theilo dingin a nawhdawk tai.

⁴² Chun hiti hi ahi a, a zing chun mipite chuh phul achun a va pawt u a, tichun, Abimelek a hilh u a.

⁴³ Chun, mipi haw chuh a pui a, hawn thum in a khen a; phul achun a chânggu tau a; chun, mipite chuh khawpi apat a hung pawt a muh phet un a na do u a, a na that u a.

⁴⁴ Chun, Abimelek leh a lawite chuh khawpi lutna kawtkhak lam achun a tai u a, lawinih te chun phul a umte chuh a va do u a, abawn un a that tau a.

⁴⁵ Chun, Abimelek chun zie ni chun khawpi chuh ni tum in a do a. Tichun, khawpi chuh a la a, a sung a cheng te chuh a that a; khawpi chuh a susie a, chi a thehkhum ta a.

⁴⁶ Chun, Sekem kulh a um chengcheng te chun zie thu chuh a na zau a, Baal pathien a ho nau kulh dettak sung achun a lut vek tau a.

⁴⁷ Chun, Sekem kulh a chun mi chengcheng a lut suok kêi ui tih Abimelek chuh a hilh u a.

⁴⁸ Khutichun, Abimelek leh a kawma um chengcheng te chuh Zalmon tângah a chieh to u a; Abimelek chun heicha a chawi a, thingbâk a tham tha a, a pu ta a; a lawite kawm achun, “Ka hih dân na muu a, ka hih bang hin nangun le hih meng un,” a ti a.

⁴⁹ Chun, mi chengcheng chun thingbâk a tham tha chiet u a, Abimelek chuh a zui tau a, kulh pang achun a kawih zel u a; chun kulh chuh a halkhum tau a. Khutichun, Sekem kulh a um chengcheng te chuh a thi vek tau a, pasal leh numei sangkhat hiel ahiu hi.

⁵⁰ Tichun, Abimelek chuh Thebez khuo achun a chieh a, Thebez khuo chuh a huol a, a la ta a,

⁵¹ Amahvang chuh, zie khawpi sung achun insawng a um a, zie tak achun pasal leh numei chengcheng leh khawpi sunga um chengcheng chuh a tailut u a, a kikhakkhum tau a, insawng sung achun a um tau hi.

⁵² Chun, Abimelek chuh insawng lam achun a va chieh a, a va do a, mei a hâl guo’n kulh kawtkhak bul lam achun a va chieh ta a.

⁵³ Chun, numei kuo ahim in buh gawih gawpna suong hih Abimelek lu chung achun a vak khetha a, a luguh a kek ta a.

⁵⁴ Ziephet chun gâlvan chawi tangval chuh kintak in a vak sama, a kawmah “Na chemzâm khah zûk dawk inla ei sunlum tie, mite’n numei thah ahi ei tih loh na dingun,” a ti a. Tichun, tangval chun a sunlet zawt a, a thi ta a.

⁵⁵ Chun, Israel te chun Abimelek a thi tai tih a het phet un, mitin a mau In lam chiet ah a chieh vek tau a.

⁵⁶ Abimelek in a suohpihte sawmsagih nunsie taka a thah a, a pa chunga a hih dân chengcheng kha Pathien in a dinthuk tai.

⁵⁷ Chun, Sekem khuo a nunsietna chengcheng khale Pathien in a hun dinthuk ta a; tichun Gideon chapa Jotham hansie khah a chungah a hung chu tai.