VAIHAWMTE 7 - PATHIEN LEKHABU THIENGTHO (BSI)

Gideon in Midian te a Zawhna

¹ Khutichun Jerubaal (zie chuh Gideon tihna ahi) leh a kawma mipi um chengcheng te chuh zingkal matak in a tho u a, Harod lui pang achun a kikulh tau a Midian te kulh chuh a umnau mâllam panga Moreh tâng bul phaicham achun a um a.

² Chun, Lalpa’n Gideon kawmah, “Na kawma um mipite khah a khut u a Midian te ka piek na dingin a tam taluou hi; khutilochun, Israel chate’n, ‘Keimau khut ngeia kihukdawk ka hiu a puo,’ ti’n ei uon khum kha’n au.

³ Zieziekchun, mipite zak ah, ‘Na lak u a kuole lau leh kilîng ta chuh vaikit henla, Gilead tâng akipat hin vaikit u hen,’ ti’n,” a ti a Ziephet chun, mipi singnih leh sangnih a vaikit tau a, singkhat a um nalai u a.

⁴ Chun, Lalpa’n Gideon kawmah, “Mipite khah a tam taluo nalai ui; lui ah puisuk inla, keimah ngêi in zie mun achun nang a dingin amau haw chuh patepna nei ding ka hi. Hiti hi hi ding ahi, zie pa hin hun zui hen ka tih taphawt chuh na kawmah hung henla, zie pa hi chuh na kawma hung kihe’n ka tih taphawt chuh hung kiu hen,” a ti a.

⁵ Khutichun, mipite chuh lui achun a puisuk a; tichun Lalpa’n Gideon kawmah, “Ui tui liek a, a lei u a tui liek taphawt chuh a chuom in kawih inla, khutibang mah chun, khun a, khupdin a, a khut u a tui chip thawh te chule,” a ti a.

⁶ Chun, a khutpêk a tui luok a liek a liek thawhte chuh mi zathum ahiu a, midang cheng chuh khun a, khupdin a chîp thawh ahiu hi.

⁷ Tichun, Lalpa’n Gideon kawmah, “Khutpêk a tui luok a dâwn mi zathum te mai mang in Midian te chuh na khuta hun pie ding ka hi; midang cheng chuh amau puon-In chietah chieh kit vek u hen,” a ti a.

⁸ Khutichun, mipite chun a tuiûm teu leh a pengkun teu chuh a kilak u a, mipi dang haw cheng chuh amau puon-In lam chiet ah a sawl kit ta a; mi zathum te chu vang a um sak a, Midian te kulh chuh a thang tak u a phaicham a chuh um ahi.

⁹ Chun, tihi a hung hi a, zie zan chun Lalpa’n a kawmah, “Kipan inla, a giehbuk lam u ah va chieh suk tie, amau chuh na khuta ka pie tai,” a ti a.

¹⁰ “Amahvang chuh, va chieh suk ding na lauh chun, na suok Purah hi tawh a kulh u achun va chieh un, a ti a.

¹¹ Tichun, a thugen uh va zau in na tin; zie tieng chuleh na khut chuh sukhat in um intin, kulh achun chieh ngam ta’n la,” a ti a. Khutichun, Gideon chuh a suokpa Purah chu tawh melmate kulh lama chun a va chieh suk tau a.

¹² Chun, Midian te, Amalek te leh khawsak chate chengcheng chuh phaicham achun khaupe bang mai in a hawn in a um u a, a sangawngsau teu chuh simsen guolloh in tuisuohgiet panga pîlnel bang hiel in a tam a.

¹³ Chun, Gideon a va tun phet chun, mi khat in a lawipa kawmah a mang a na gen pet chuh a za a, “Ngaitie, mang ka nei a, ka mang chun buhman chângthâk tâng hih Midian te kulh ahin a hung kilik a, puon-In chuh a sep kha a; a puk a, puon-In chuh lei ah a chimtha kêi zieng a,” a ti a.

¹⁴ Chun, a lawipa chun a dâwng a, “Zie chuh Israel mi, Joash chapa Gideon chemzâm ahi chuh; Pathien in Midian te leh a sepaihte chengcheng chuh a khut ah a pie ahi ta chuh,” a ti a.

¹⁵ Chun, hiti hi ahi a, Gideon in zie pa mang leh a umzie chuh a zak in a khupbawk a Pathien a ho ta a; tichun, Israel te kulh lam achun a vaikit a, “Kipan u le, Midian sepaih haw chuh Lalpa’n na khut u ah a hun pie tai,” a ti a.

¹⁶ Tichun, amah chun mi zathumte chuh hawn thum in a khen a, abawn u chun pengkun khat leh leibel hawm khat chiet a pie a; leibel hawm sung a chun meisel det kuongsa a chawih sak chiet a.

¹⁷ Chun, amah chun, “Ei en unla, ka hih dân dân hin hih zel un; chun, ngaitiem u, kulh pawnung pên ka tun tieng leh ka hih bang bang a hih na hun hih dinguh ahi,” ti’n a hilh a.

¹⁸ “Kei leh ka kawma um te hin pengkun ka mût tieng u leh, kulh kimvela um chengcheng te chun le pengkun mût un na tin uh, ‘Lalpa leh Gideon chemzâm’ na tih chiet dinguh ahi,” a ti a.

¹⁹ Khutichun, Gideon leh mi zakhat te chuh zan ven laita, gâlveng a kithen lai tak u chun kulh pawnung pên chuh a tung u a, chun, pengkun chuh a vak mût u a, a leibel chawih u chuh a khên kek vek u a.

²⁰ Chun, a pawl thum u chun pengkun chuh a mût u a, bel chuh a khen kek u a, a veilam un meisel a chawi u a; a changlam chiet un pengkun mût ding a chawi u a; chun; “Lalpa leh Gideon chemzâm,” ti’n a kiko u a.

²¹ Chun, kulh kimvel a chun mitin amau dinna mun chiet ah a ding u a; tichun melmate sepaih haw chuh a taisie vek tau hi.

²² Chun, mi zathum te chun pengkun a vak mût phet u chun, Lalpa’n a melmateu sepaih haw chuh amau leh amau chemzâm in a kisattuoh sak ta a; tichun, sepaihte chuh Zerara lama Beth-shita tiengin, Tabath kienga Abel-meholah gamgi tiengin a taisie tau hi.

²³ Chun, Israel te chuh Naphtali apat leh Aser apat in a hung khawm u a, Midian te chuh a delhzui tau a,

²⁴ Chun, Gideon in Ephraim tânggam chengcheng achun, “Midian te hih hun do un; Beth-barah tiengin luipi haw chuh hun lak sak un, Jordan lui tawh,” ti’n mi a taih viel sak ta a. Khutichun, Ephraim mite chengcheng chuh a kipunkhawm u a, Beth-barah tiengin luipi haw chuh Jordan lui chuh tawh a lâksak tau a.

²⁵ Chun, Midian te leng nih Oreb leh Zeeb chuh a man u a; chun Oreb chuh Oreb suongpi a chun a that u a, chun Zeeb chuh Zeeb grep thawkna khuk ah a that u a; Midian te chuh a delhzui zel u a, tichun, Oreb leh Zeeb luchang chuh Jordan luigal a Gideon kawmah a hun puo tau hi.