VAIHAWMTE 6 - PATHIEN LEKHABU THIENGTHO (BSI)

Gideon Vaihawmna

¹ Chun, Israel chate chun Lalpa mitmuh in thil gilo a hun hih kit tau a, tichun Lalpa’n Midian te khut ah kum sagih a pie dawk kita.

² Chun, Midian te chuh Israel te sang chun a hung hatzaw tau a, tichun, Midian te lauh ziekin Israel chate chuh tânga kawkhukhaw leh kawlpuk haw achun a kisel tau a.

³ Chun, hiti hi ahi a, Israel chate chun thaichi a chîn phat u leh Midian te, Amalek te leh suohlam a mite’n a hung do sek u a;

⁴ simlam a Gaza tiengin giehmun a va khuol sek u a, a thaichi teu a suksiet sak u a; Israel gam ah nek ding himhim a hâwi puou, belam, bâwng leh sabiltung haw chanin a thah sak vek u a.

⁵ Amau chuh a ganguol hawu leh a puon-In teu tawh khaupe hawn bang hielin a hung kuon sek u a: amau haw leh a sabiltung hawu chuh simsen ahi puou hi, tichun gam susie ding mawng in a hung lut sek ui.

⁶ Khutichun, Israel chate chuh Midian te ziek chun a hung gimthei mah mah tau a; Israel chate chun Lalpa a sam tau a.

⁷ Chun, hiti hi a hung hi a, Midian te zieka Israel chate’n Lalpa a hun sap phet u chun,

⁸ Lalpa’n Israel chate lak achun thiemgau a hun sawl a; amah chun a kawm u ah, Lalpa Israel te Pathien in hitihin a tii, “Aigupta gam apat chuh ka hun puidawk a, saltanna mun apat a ka hun puihdawk na hiu hi.

⁹ Aigupta mite khuta kipat leh, a hun sugimthei te cheng khut apat in ka hun hukdawk a, na masang u ah amau haw chuh ka hun nawhdawk saka, a gam u chuh ka hun pie a.

¹⁰ Chun, kei hi Lalpa na Pathien uh ka hi, zie a na umnau gama Amor Pathien te hi na ho loh dinguh ahi, ka ti a; himahlele, ka thugen chuh na zawp ngâl puou a, a ti ie,” ti’n.

¹¹ Chun, Lalpa vânsâwlchâk khat a hunga, Ophrah a um Abiezrite mi Joash kiti chuh gangpi thing nuoi ah a chu a; chun, a chapa Gideon chun Midian mite muh theih loh dinga kisel in grep thawkna khuk ah buh a na khena.

¹² Chun, Lalpa vânsâwlchâk a kawmah a hung kilak a, a kawmah, “Nang mihat hangsan, Lalpa chuh na kawmah a um hi,” a ti a.

¹³ Chun, Gideon chun a kawmah, “Aw hepu, ka kawm u a Lalpa a um chun bangti dana zie bangpi hi ka chung u a hungtung ahim? a ti a. Ka pileputeu in, Lalpa’n Aigupta gam apat nei puidawk a, thilmak taktak a hih sek hi ti a ei hilh u haw kha bangti ahi ta’m? Tuhin chuh Lalpa’n ei kinungheisan a, Midian te khut ah ei pie ta hi,” a ti a.

¹⁴ Chun, Lalpa chun amah chuh a en a, a kawmah, “Na tha hât lai ahi a, chieh inla Israel chate hi Midian te khut apat in va hukdawk in; ka hun sawl hilo ahim?” a ti a.

¹⁵ Chun, amah chun a kawmah, “Aw Lalpa, bangti’n ahim Israel chate hi ka va hukdawk theih maizen ding? ngaitie, Manasseh suon a nam gimthei pên ka hi ngâl a,” a ti a.

¹⁶ Chun, Lalpa chun a kawmah, “Na kawma um zel ding ka hi, tichun Midian mite chuh mi khat bangmai in baihlam takin zo vek ding na hi,” a ti a.

¹⁷ Chun, amah chun a kawmah, “Na mittung ka hih chun, nangmah ngêi in nei hopih hi tih hetna ding tiemtehna ei muhsak in,” a ti a.

¹⁸ “Na masanga thilpiek ding ka va laka, na kawma ka hungkit macheng chuh, lungsiet takin zie apat hin a na chieh mang hiel ki’n,” a ti a. Chun amah chun, “Na hungkit macheng chuh ana um zing ing ka,” a ti a.

¹⁹ Khutichun, Gideon chuh insung achun a va luta, kelno leh changbuong epha khat chawl sawhloh a va guonggalh a; a sa chuh bawm ah a kawih a, a tui chuh bel ah a kawih a, gangpi thing nuoi a a kawm achun a hun chawia, a kawm achun a lân ta a.

²⁰ Chun, Pathien vânsâwlchâk chun a kawmah, “Sa leh chângthâk chawl sawhloh kha la’n la, zie suong chung ahin kawih inla, a tui kha sungtha’n,” a ti a.

²¹ Khutichun a hih ta a, chun, Lalpa vânsâwlchâk chun a mawlh chawih chun sa leh chângthâk chawl sawhloh chuh a vak sukha a, tichun, suong apat chun mei a hung pawt a, sa leh chângthâk chawl sawhloh chuh a ka-tum suok ta a.

²² Khutichun, Gideon chun Lalpa vânsâwlchâk ahi tih a he ta a; “E khai, Lalpa Pathien! Lalpa vânsâwlchâk chuh kimaichangtuoh in ka mu ta hi,” a ti a.

²³ Chun, Lalpa’n a kawmah “Thamuong takin um inla, lau ki’n, thi puo’n la,” a ti a.

²⁴ Khutichun, Gideon in zie mun achun Lalpa a dingin maichâm a siem a, Jehovah-Shalom a sa a; tuni tieng hin Abiezrite mite gam a Ophrah mun ah a um zing hi.

²⁵ Chun, hiti hi ahi a, zie zan mah chun Lalpa’n a kawmah, “Na pa bâwngchal tuoi a nihna kum sagih a upa chuh hun kai inla, na pa siem Baal maichâm hi hihchim in la, a chunga pathien te tiemtehna haw chuh phuk ah;

²⁶ Chun, zie suongpi chung ahin phatak in suong tieng inla, Lalpa na Pathien a dingin maichâm siem in la; bâwngchal nih na chuh kai in la, Asher dawikhuom na phuk ding chuh mang in hâlmang thillat lân in,” a ti a.

²⁷ Khutichun, Gideon in a suokte mi sawm a pui a, Lalpa’n a kawma a gen bang chun a hih ta a; chun hiti hi ahi a, a pa inkawte leh khawpi a mite chuh a kihchak ziekin sun in a hih ngam puoh a, zan in a hih ta a.

²⁸ Chun, khawpi a mite chuh zingkal mataka a hung thawh dawk phat un, ngaitie, Baal maichâm chuh sukchip in a um ta a; achung a Asher chuh phukpaih in a na um ta a, maichâm kisiem thak chunga bâwngchal nihna kilân leh kihalvam sa chuh a na um zaw ta a.

²⁹ “Ziehi kuo hih ahi die aw?” ti’n a kidawp u a. Chun, a kidawt u a, a kidawp tuok viel nung u chun “Joash chapa Gideon hih ahi,” a tiu a.

³⁰ Tichun, khawpi a mihaw chun Joash kawmah, “Na chapa chuh hun puidawk in a thih tei ding ahi; Baal maichâm a hih chip ziekin leh a chunga Asherah a phuk ziekin,” a tiu a.

³¹ Chun, Joash chun amah kilanpih ding chengcheng te kawm achun, “Baal chuh na panpih dinguh ahi maw? amah panpih taphawt chuh zingkal ahih ma a thah ding ahi; pathien a hih chun a maichâm a hih chip mau in amah leh amah kipanpih na ven ti,” a ti a.

³² Zie ni akipat chun Gideon chuh Jerubaal ti a het in a um tai, a ziek chuh Baal maichâm a suchim a, amah leh amah kipanpih hen a tih ziekin.

³³ Ziephet chun Midian te chengcheng, Amalek mite cheng tawh, khawsak chate haw chuh a kikhawm u a, luipi a kân u a, Jezreel phaizawl ah a kikulh uh a.

³⁴ Himahleh, Lalpa thagau chuh Gideon chungah a hung tunga, tichun pengkun a mût a, Abiezer te chuh hung pungkhawm in a zui tau a.

³⁵ Chun, Manasseh te kawm achun palai a sawl a, zie te chun le a hun zuon khawm u a; Aser te leh Naphtali te haw kawm achun palai a sawl a, amau chule a hungkhawm vek u a.

³⁶ Chun, Gideon in Pathien kawmah, “Na gen bang ngêi a kei khut a Israel chate hukdawk ding na hih chun,

³⁷ Ngaitie, leituol ah belam mul kawih ing ka ting, belam mul chung a chuh dâitui a hung um a, a kimvel cheng chuh a na hul chun, na gen bangin keimah khut in Israel chate hi hukdawk ding na hi nai tih he’ng ka,” a ti a.

³⁸ Khutibang chun a hung um ta a, zingkal vaima takin a tho a, belam mul chuh a hêk leh, belam mul a chun dâitui belhbu dim khat a hektha a.

³⁹ Chun, Gideon chun Pathien kawmah, “Ka chungah lungna ki’n la, khatvei mai hun dawng kit ing ka. Lungsiet takin khatvei chauh belam mul in tiemtehna ei muhsak kit in; tuchung hin chuh belam mul chauh a na hul henla, leituol dang ah dâitui a na um zaw hen,” a ti a.

⁴⁰ Chun, khutibang chun zie zan chun Pathien in a hun hih a, belam mul chauh chuh a hul a, a kimvel cheng chuh dâitui in a na chek zaw ta a.