VAIHAWMTE 5 - PATHIEN LEKHABU THIENGTHO (BSI)

Deborah leh Barak La

¹ Khutichun, zie ni chun Deborah leh Abinoam chapa Barak chun zie la hi a sau a;

² “Israel chate laka lawiupa haw chun ma a kai u a, Mipi haw chuh kiphal takin a hung kipie dawk u a, Israel chate phuba a lâk sak tâk ziekin, Lalpa chuh pakchau un,” ti’n.

³ Aw nanguh lengte haw, a na ngaithau inla; Aw nanguh lawiupate haw, na bil uh a na dawh un. Keimah ngêi in Lalpa pahchakna la sa’ng ka ting, Lalpa Israel te Pathien pakcha’n la sa’ng ka.

⁴ Lalpa, Seir tâng akipat a na hung pawtdawk lai leh, Edom gam apat a na hung pawt lai khan; Leichung a kilîng dul dul a, van le a kie niem hiel a. Ahi, meipi te chun guoh a hun zuk sak u a.

⁵ Tang haw chuh Lalpa masang achun a hung chim u a, Israel Pathien Lalpa masang achun; Sinai tâng nasan le.

⁶ Anath chapa Shamgar damlai leh Jael damlai nite khan, Jael damlai nite khan lamlien haw chuh tawhvan loh in a um a, Khuolzinte chun kawitan a hawh sek u a.

⁷ Israel gama khuo te chuh luoh loh in a chulzo ta a, zie khuo a mite chuh a um ta puou a, kei Deborah ka hung kipat a; Israel te nu banga ka hung ma chun.

⁸ Israel te chun pathien dang a hun neih phet un, Gamsung achun kidona a hung um ta a; Israel mi sang sawmli lak achun phaw leh tiengcha chawi a um mawng um?

⁹ Ka lunggil chuh Israel te vaihawmpa kawmah a um zing a, Mipi kiphal taka kipie dawk te kawm achun a um a; Lalpa chuh pahchak in um hen.

¹⁰ Nang haw sabiltung vam chunga chute haw, Nang haw vaihawmna chutphah a chute haw; Nang haw lampi a chieh vielte haw, Zie thu chuh phuong un.

¹¹ Ngaiin, tuisutdawk kimvela mipi husa gi vengvung te chuh, Lalpa zawhna lopi phuongdawk ahiu hi. Israel gamsung a thil dik hihte ngêi chuh; Khutichun Lalpa mite chuh kawtkhak lam achun a chieh suk u a.

¹² Tho in, tho in Deborah, tho in, tho inla lasa’n: Tho in Barak, nang Ahinoam chapa, Na mi matte chuh sal in pui in.

¹³ Tichun, mi ginumte chuh a lawiupa teu kawm achun a hungsuk u a, Lalpa mite chuh kido dinga kisa sa’n a hung u a, Lalpa’n kei chuh mihatte chunga thunei in ei siem a,

¹⁴ Ephraim a kipat chuh Amalek zung zam a hungsuk u a, Benjamin, nang leh na mite ngêi chuh a hun zui u a; Makir akipat in gam vaihawmte a hungsuk u a, Chun, Zebulun akipat in lehkhazikte chuh a hung pawt u a.

¹⁵ Issakar miliente chuh Deborah kawmah a um u a, Issakar mah bangin Barak le; Phaicham lam achun amah tawh a taisuk u a, Mahleh Reuben te vang a kikhen u a, Ngaihtuohna nasatak a um hi.

¹⁶ Bang zieka belam huong kimvela um zing na him? Belam chingpa’n belam a sap ngaitha ding mai in; Reuben te laka kikhenna a um ziek chun, Kingaihtuohna nasatak mai a um hi.

¹⁷ Gilead te chuh Jordan saklam ah a um zing u a, Bangati a Dân te chuh kuong sunga um zing ahiu u? Aser te chuh tuisuohgiet pang ah a chu hiet hiet u a; A sehpho haw achun a chu zing u a,

¹⁸ Zebulun te leh Naphtali te chuh Thih ngama galdo dinga kipie zing mi ahiu hi.

¹⁹ Lengte’n a hun do u a, Tichun Kanaan lengte chun Megiddo lui panga; Taanak khuo a do u a, Sum lak ah phatchuomna ding a nei puou hi.

²⁰ Van aksite chun a mun u apat Sisera chuh a hun do u a;

²¹ Kishon lui luong zel chun; Aw ka hinna, hattak in chieh zelin,

²² Chun, sakawlte chun a keng uh a tat gi dup dup u a; A keng tin u a leituol a tawh git u chuh,

²³ “Meroz chuh hansie lawh un, Zie taka umte chuh nasatak in hansie lawh un; Lalpa panpih a, Sepaih banga amah dinga do dinga a hung loh ziekun.”

²⁴ Numei laka vangpha pên nu Jael, Ken mi Heber zi chuh; Puon-In a cheng numei lak ah vangpha pên hen.

²⁵ Sisera chun tui a ngên a, bâwngnawi a na pie a; Leng khawn in bâwngnawi khal a hun dawm a,

²⁶ A khut in thikzum a chawi a; A changlam in nasem mi sek a chawi a, Chun, sek chun Sisera chuh a khên a, a luchang a khên let a; Ahi, a ngeiphe a a kilhden lai chun,

²⁷ A kengbul ah a bawkkhup a, a pûk a, a kuol tha suk a; a kengbul achun a bawkkhup a, a kuolna mun achun a thi den tai.

²⁸ Sisera nu chun tukvan ah a thil zinga, Vathangkalh âwng apat in a sama; Bang zieka kangtalai hung tung vaigei a, Bangti dana sakawlte chuh hung khuti vaigeih ahi ta? a ti a.

²⁹ A numei pil haw chun a dâwng u a, Ahi, amah leh amah a kithembih kit a;

³⁰ “A hung kinawh puou a ahim? A gâllâk teu kihawm zo nailo a hiding um? Mitin in nungak khat le nih ahim bêk; Sisera chan ding chuh gâllâk puon zie chuom chuom, Gâllâk puon khuta kiphan, a lang tuok kikhui zie chuom chuom te chuh, Lengnu’n a ngâwng a a awh theih ding te chuh, ti’n.

³¹ Khutibang chun, Aw Lalpa, na melmate chengcheng chuh mangthai vek u hen la, Amah hehpihte vang chuh hattak a chieh, nisa bang hi hitau hen,” ti’n la a sau a. Chun, gamsung chuh kum sawmli sung gâlmuong in a um tai.