VAIHAWMTE 2 - PATHIEN LEKHABU THIENGTHO (BSI)

Bokim a Lalpa Vânsâwlchâk Kilâkna

¹ Chun, Lalpa vânsâwlchâk Gilgal apat in Bokim ah a kilak a, Israel chate kawm achun, “Aigupta apat in ka hun puidawk a, ahun suonte kawma kipautiem a ka na piek gam akhan ka hun puilut a, na kawm u a ka thugawlh kha bawhsie hiel puo’ng ka.

² Tichun, zie gama cheng te haw hi tawh thugawlh siem kiu inla, a maichâm teu chuh sukchim sak un, ka ti a. Himahlele, ka thupiek na zawp puou a, bang ziekin ahim hitibang a hih na um uh?

³ Zieziekchun, amau haw chuh hun nawhdawk sak ta puo’ng ka ting, amau haw chuh na nak-uh a dingin ling tawbang hi zawn au, a pathien u chuh nanguh a dingin thâng hi’n a le ka ti a,” a ti a.

⁴ Chun, hiti hi a hi a, Lalpa vânsâwlchâk in Israel chate kawma zie thu chuh a va gen phet chun mipite chuh ngeih tak in a kap tau a.

⁵ Chun, hiti hi ahi a, zie mun min ding chun Bokim a sa tau a, zie tak achun Lalpa kawmah a kithawi tau hi.

Joshua Thihna

⁶ Chun, Joshua’n mipite a kikhen zak sak nung chun, Israel chate chuh amau chanvo chiet gam luoh dingin a chieh tau a.

⁷ Joshua damlai leh Joshua thih nung a dam nalai upate, Lalpa’n Israel chate a dinga thil lopitak a hih mu sek te damsung cheng chun mipite’n Lalpa na a sem sek u a.

⁸ Tichun, Nun chapa Joshua Lalpa suok chuh kum za leh kum sawmkhat ahih in a thi ta a.

⁹ Chun, Gash tâng, mâllam pang Ephraim tânggam, amah gamsung ngêi Timnath-Serah khuo achun a vui tau hi.

¹⁰ Chun, zie suonte chengcheng chuh a hung thi zo tau a, tichun, suon dang hung um te chun Lalpa’n Israel chate a dinga a thilhih haw chuh a hengilh tau hi.

Israel te’n Pathien Ho a Haihsannau

¹¹ Chun, Israel chate chun Lalpa mitmuh in thil gilo a hih u a, Baal na a sem u a.

¹² Chun, Lalpa a pileputeu Pathien, Aigupta gam apat a puidawkpa kha a kiheimang san u a, pathien dang, a kiengvêl u a umte pathien chuh a zui u a, chibai a bûk tau a; tichun, Lalpa chuh a sulungna tau a.

¹³ Tichun, Lalpa chuh a kiheimang san u a, Baal te leh Ashtaroth te na chuh a sem tau a.

¹⁴ Khutichun, Lalpa chuh Israel chate chung achun a lungna ta a, a melmateu khut achun a pie ta a; tichun a kimvel u a a melmateu khut apat chun a kivêng zo ta puou hi.

¹⁵ A galdo nau phawt achun Lalpa chuh amau kalh lam in a pang ta a, a na gen sa bang leh a na kitiemna bangin a gimthei mah mah tau a.

¹⁶ Tichun, Lalpa’n a sugimtheite apat a hukdawk dingin vaihawm ding a guot sak a.

¹⁷ Khutisa chun le a vaihawmteu thu chuh a pawm puou a, pathien dangte kawmah zawl a sai u a; a masang u ah a khun zaw tau a, a pileputeu in Lalpa thupiek te pawm a a hawh sek uh lampi chuh a petsan pai zieng tau a.

¹⁸ Chun, Lalpa’n amau puihuoi ding a siem saka, Lalpa chuh zie a vaihawmte kawm achun a um a, a damsung cheng u chun a melma teu khut apat in a hukdawk zela; hih gimtheih leh suklungkham a a um ziekun Lalpa’n amau chuh a lungsiet ta a.

¹⁹ Himahlele, hiti hi a hi a, amau puihuoi pên chuh a thih tieng leh a nungchawn kit sek u a, pathien dangte nasem in leh chibai bûk in, zie thu a hin a pileputeu sangin a hung sie zaw tau a; a thilhih sek teu leh a genhak nateu chuh a haihsan loh ziek un.

²⁰ Chun, Lalpa chuh Israel te chungah a lungna ta a, “Zie namte hin a suonteu thu ka piek, ka thugawlh chuh a bawhsieu a, ka thu a zawp ta puou hi,

²¹ Ken le tu a kipat chuh Joshua’n a nawhdawk loh, a thihsan namte chuh nawhdawk sak ta puo’ng ka.

²² A pilepu teu bang khan Lalpa thupiek a zawp u leh zawp loh Israel chate patep na’n amau haw chuh mang ing ka,” a ti a.

²³ Khutichun, Lalpa’n zie nam haw chuh nawhdawk zieng talo in a um sak ta a; Joshua khuta chun le ana pie diek puoi.