Biblia Todo Logo
အွန်လိုင်း သမ္မာကျမ်းစာ

- ကြော်ငြာတွေ -

VAIHAWMTE 18 - PATHIEN LEKHABU THIENGTHO (BSI)


Mika leh Dan Namte

1 Zie lai chun Israel gam ah leng a um puoh a, tichun, Dan namte chun gam luoh ding a hawl u a; zie hun tieng hin Israel chate lak ah gam luoh ding a chan loh ziekun.

2 Chun, Dan suonte chun a phung lak u apat pasal hangsan chiet nga Zorah leh Eshtaol a kipatin gam entha ding leh gam hawl dingin a sawl u a; a kawm u achun, “Va chieh unla, gam va hawl un,” a tiu a: tichun, Ephraim tânggam a Mika In chuh a va tung u a, zie chun a giek tau hi.

3 Mika In kawm a phâk lai u chun Levi chi tangval aw chuh a vak zau a; zie tak chuh a zuon tau a, a kawmah, “Zie taka hih kuo’n a hun puih ahim? Zie taka hih bang hih na hi? Zie taka hih bangti khawsak na him?” a tiu a.

4 Chun, amah chun a kawm u ah, “Mika hin hiti hin ei na siem ta a, ei guoi a, a thiempu a pang ka hi,” a ti a.

5 Chun, amau chun a kawmah, “Ka chieh na ding u a ka lamzan ding u leh ka lamzan loh dinguh hettheih na dingin Pathien ei dawt sak in,” a tiu a.

6 Chun, thiempu chun a kawm u ah, “Thamuong takin chieh unla, na chieh na ding u chuh Lalpa’n a hun hetpih zel hi,” a ti a.

7 Khutichun, mi ngate chuh a pawt u a, Laish khuo a va tung u a, zie gama mite khawsak dân te leh gâlmuong taka a khawsak dân uh, Zidon mite banga gâlmuong taka a um hiet hiet dân teu chuh a va muu a; zie gam achun a thilhih u a suzakcha ding vaihawmna a um puoh a; Zidon te tawh le a kinaih puou a, kuomah tawh kizawp matna himhim a nei puou hi.

8 Chun, Zorah leh Eshtaol a suohpih teu kawm achun a chieh kit tau a; a suohpih teu kawma a tun kit phet u chun, “Kei u kawm a gen theih ding bang na va muu hi le?” ti’n a na dâwng u a.

9 Khutichun, amau chun, “Kipan u le, amau chuh do dingin kintak in chieh to hitiu: gam chuh ka va muu a, ngaitiem u, a pha mah mah hi; muong kiu inla, kinawh un, va luoh vak hitiu,” a tiu a.

10 “Na valuoh u leh gâlmuong taka um thei ding na hiu hi, a gam letdan haw chule va mu ding na hiu a: Pathien in na khut u ah a hun pie tai. Gamsung a chun tâksap bangmah a um puoi,” a tiu a.

11 Tichun, Zorah leh Eshtaol khuo apat chun Dan nam te chuh kidona vana kithuom in mi zagup a chieh u a.

12 Tichun, a chiehto u a, Juda gama Kiriath-jearim mun ah a kikulh u a; zieziekchun tuni tieng hin zie mun chuh Mahanehdan a kitii; zie chuh Kiriath-jearim tum lama um ahi.

13 Zie apat chun Ephraim tâng lam a zuon u a, Mika In chuh a tung tau hi.

14 Khutichun, Laish gam entha dinga mi nga a sawl teu chun a suohpih teu kawm achun, “Zie In haw ahin Ephod te, milim te, milim siem kawm te leh milim kisung te chuh a um hi tih na heu hi? Khutichun, bang lawh ding ahim tih tuhin ngaihtuoh un,” a tiu a.

15 Tichun, zie apat chun a pawt u a, Levi chi tangval um na Mika In chuh a va tung tau a, tichun, amah chuh a chibai u a.

16 Chun, Dan nam a mi zagup te chuh kidona vana kivan in kelkawt bul achun a ding u a.

17 Chun, gam entha dinga a sawl teu mi nga chuh a chieh u a, a va lut u a, milim siemkawmte, ephod te, milimte leh milim kisung haw chuh a la tau a; thiempu chuh mi zagup kidona vana kivan te laka kelkawt bul achun a dinga.

18 Chun, ziehaw chuh Mika In a chun a lut u a, milim siemkawmte, Ephod te Terafim te leh milim sun kawm te chuh a vak lak lai un, thiempu chun a kawm u ah, “Banga na hih uh?” a ti a.

19 Chun, amau chun a kawmah, “Thip in, na khut in na kam him inla, kei uh ei zui inla, ka pa ding u leh ka thiempu ding un hung pang in; nang a dingin inkuon khat chauh thiempu a pan hi a phazaw’m, Israel nam laka phung khat thiempu a pan chuh phazaw lo ahim?” a tiu a.

20 Tichun, thiempu pa lunggil chuh a kipaka, tichun Ephod te, Terafim te, milim siemkawm te chuh a la a, amau a zui ta a.

21 Khutichun, a chiehdawk tau a, tichun, numei chapang leh gan guol haw leh thuomphuo te chuh a masang u ah a sawm u a.

22 Mika In apat gamla deuh a chieh nung un Mika invengte chuh a kisamkhawm u a; Dan suonte chuh a delh pha tau a.

23 Chun, Dan suonte chuh a vak sam u a, chun amau chuh a hung kihei u a, Mika kawma chun, “Bang thu ahi ta le, mi zie zahzah chuh na hun puih mai?” a tiu a.

24 Chun, amah chun, “Ka pathien lim siem te chuh na kilak u a, na chieh mang u a; banga ka neih naklai? ‘Bang thu ahi ta leh?’ Bangti a ti thei na him?” a ti a.

25 Chun, a kawmah, “Keihaw lak ahin pau maimai kitie, khutilochun mi lungchawm zaw ten hun zuon in, nang hinna leh na inkuon pih te hinna chan lawh kha’n la,” a tiu a.

26 Tichun, Dan suonte chuh a chieh zawm zel u a; Mika chun do ngam hi a a hetloh ziekin a In lam ah a vaikit tai.

27 Chun, Dan suonte chun Mika thilsiem haw leh a thiempu chuh a pui u a, Laish khuo gâlmuong taka um hiet hiet chuh a va tung u a, tichun, amau haw chuh chemzâm in a that u a, a khuou chuh mei in a hâltum tau hi.

28 Zidon apat a a gamlat ziekin a panpih thei ding kuomah a um puou a; kuomah kinaihpih a nei puoh ngâl u a; zie mun chuh Beth-herob phaicham a um ahi. Tichun, zie khuo chuh a siem thak u a, zie chun a cheng tau hi.

29 Chun, a khaw min ding chun Israel chapa, a suohpih pau Dan min apat in Dan a sau a; ahih ziekin zie khuo chuh atûng in Laish a tiu hi.

30 Chun, Dan suonte chun milim siem kawm chuh amau haw a dingin a hun tungdawk tau a; mipite suok a puih ahih macheng u chuh Mosi chapa Gershom chapa Jonathan leh a chapate chuh Dan suon te laka thiempu’n a pang tau hi.

31 Khutichun, Mika milim siem kawm chuh Shiloh khuo a Pathien Ho-In a din sung cheng chuh a um zing tai.

Gangte Holy Bible - PATHIEN LEKHABU THIENGTHO

Copyright © Bible Society of India, 2010.

Used by permission. All rights reserved worldwide.

Bible Society of India
ကြှနျုပျတို့နောကျလိုကျပါ:



ကြော်ငြာတွေ