VAIHAWMTE 16 - PATHIEN LEKHABU THIENGTHO (BSI)

Samson Gaza ah

¹ Chun Samson chuh Gaza khuo achun a chieh a, zie taka chun nawhchizuok hi a mu a, a pawl ta a.

² Chun, Samson zie hin a hung hi ti’n Gaza mite chuh a hilh u a. Tichun a ûmkimvel tau a, khawpi kulh kawtkhak bul achun zan khuo’n a châng tau hi. Zan khawvak in thipkêi in a châng u a, “Khuo hung vak kit phawt leh, tichun, amah chuh that hitiu,” a kitiu a.

³ Chun, Samson chuh zankhang tiengin a ip a, chun zankhang lai tak chun a tho a, khawpi kulh kawtkhak leh a khuom nih chuh a tu a, kawt kamna haw pum in a bawt dawk vek a a liengko in a pu a, Hebron zawna tângsip achun a pu to ta a.

Samson leh Delilah

⁴ Chun, hiti hi ahi a, chawmkhat zawh chun Sorek phaicham a numei khat hih a deihcha ta a, a min chuh Delilah ahi.

⁵ Chun, Philistia milien haw chuh a kawmah a chieh to u a, “Amah chuh a gûk in hun thêm inla, a thahatna hi khawi a um ahim tih hun hedawk in. Khutichun, amah chuh ka zawh u a, ka kantawm u a, ka sukgimtheih theihna dingun. Chun, ti a chuh na hun hih theih chun, ka bawn u hin dangka sangkhat leh zakhat chiet hun pie ding ka hiu hi,” a tiu a.

⁶ Khutichun Delilah chun Samson kawm achun, “Na thahat mah mah na ziek hih ei hilh tie, bangti leh sukgim theih dinga kantawm in na um thei die? Lungsiet takin ei hilh tie,” a ti a.

⁷ Chun, Samson in a kawmah, “Khauhuol thak vilvel sagih in ei kân leu chin, tichun hât ta puo’ng ka ting, mi dang te tawbang hung hi ta’ng ka,” a ti a.

⁸ Khutichun, Philistia miliente chun khauhuol thak vilvel sagih a hun chawi u a, tichun, amah chun a na kân ta a.

⁹ Insung pindan a chun a chânggu ding a kawih a, tichun amahnu chun a kawmah, “Samson Philistia te’n a hun delh u ie,” a vak ti a. Chun, amah chun khauhuol haw chuh patzang mei in a kâk tan bang mai in a hih tan zung zung mai ta a, khutichun, a hatna ziek chuh a hedawk puou hi.

¹⁰ Ziephet chun, Delilah chun Samson kawmah, “Ngaitie, nei thêm a, lepchieh nei hilh ahi; bangtia kantawm theih ding na him? Lungsiet takin ei hilh tie,” a ti a.

¹¹ Chun, amah chun a kawmah, “Khauhuol thak mat khak nailoh in ei kân leu; tieng chuleh ka tha chau in tin, midang tawbang hung hi ding ka hi,” a ti a.

¹² Khutichun, Delilah chun khauhuol thak a la a, a kân kit a, chun a kawm achun, “Philistia te’n a hun delh u ie, Samson,” a vak ti a. Pindan sung achun a chânggu te chuh a pang zing u a. Mahleh a khut kânna chuh patzang bawhtan bang mai in a tan tai.

¹³ Ziephet chun Delilah chun Samson kawm achun, “Nei thêm nalai a, lepchieh nei hilh nalai ahi: Bangti a kantawm theih ding na him? ei vak hilh tie,” a ti kita. Chun, amah chun a kawmah, “Ka samphek sagih hi puon ah gân khawm leh chin, midang te tawbang hung hiding ka hi,” a ti a.

¹⁴ Khutichun, Delilah chun a ihmut saka, a samphek sagih chuh puon ah a gan khawm a, a kilhna’n a kilhchak kêi a; a kawmah, “Samson, Philistia te a hung u ie” a ti a. Tichun, a ipmu chuh a hung tho a, thiembu kilhmatna leh puonkawl chuh a bawttan vek ta a.

¹⁵ Ziephet chun, a kawma chun, “Na lunggil ei pie lo hiel in, bangti dana ‘Ka hun lungsiet hi,’ ei ti thei na him? Thumvei hiel lepchieh in nei thêm ta a, na hatna thuguk hi nei hilh nuom nai diek puoh a,” a ti a.

¹⁶ Chun, hiti hi ahi a, nichenga a nget a nget ziek leh a thep a thep sek ziekin thihna kham hielin a lungthim a hung lungzîng ta a.

¹⁷ Khutichun, a lungthim chengcheng chuh a hilh suok kêi ta a, kawmah, “Ka luchang ahin sakawlbakcheh himhim mat ahi puoh a, ka nu sûl a ka um lai apat a Pathien a dinga Nazarit mi ka hi a: tuhin ka sam hi met ta leng, ka hatna hih bei kêi ding ahi, tichun, hât ta puo’ng ka ting, midang tawbang hung hi ta’ng ka,” a ti a.

¹⁸ Chun, a lungthim chengcheng a hilh suok tai tih Delilah chun a het phetin, “A lungthim, chengcheng ei hilh tai. Hung to kit tadih un,” ti’n a thuthak a. Khutichun, Philistia milien haw chuh a khut u a dangka chawi kawmin a kawm achun a hung tau a.

¹⁹ Ziephet chun Delilah chun a pheichung khap in a ihmut sak a, a samphek sagih chuh a met thâk sak ta a; tichun, a sugimthei pan ta a, a hatna chun amah chuh a nusieh tai.

²⁰ Ziephet chun, amah chun “Samson, Philistia te’n a hun delh u ie,” a vak ti a. Tichun, a ipmu chuh a hung khanglo a; ni dang guol mah khan kitawm dawk ing ka ting, pawt kit zieng ing ka, ti’n a ngaihtuoh a. Himahlele, Lalpa’n a nutsieh ahi tai tih himhim a kihe puoh a.

²¹ Tichun, Philistia te chun a man tau a, a mit a kheuhdawk u a, tichun Gaza khawpi achun a pui tau a, sumeng hâtkawl a buhsak u a; suongkul achun buh gawigawp in a mang tau hi.

²² Himahlele, a sam kimet kha a hung khang dawk kit ta a.

Samson Thihna

²³ Tichun, Philistia milien haw chuh a pathien uh Dagon kawma kithawihna thupi tak a bawl ding leh kipâk taka um ding in a kikhawm u a “I pathien un I melmau Samson I khut u ah ei pie tai,” a tiu a.

²⁴ Chun, mipite chun a vak muh un, a pathien u a pakchau a, “I pathien un I melma pau, I gam uh susie pa leh mi tamtak thatpa chuh I khut u ah ei pie tai,” a tih ziek uh ahi.

²⁵ Chun, hiti hi a hung hi a, a lungthim uh a hung kipâk lai tak chun, “Samson chuh etnawp bawlna ding in vak sam tiem u,” a tiu a. Tichun, Samson chuh suongkul apat chun a va sam dawk u a; tichun, a masang u a chun etnawp bawlna dingin a mang tau a: khuom leh khuom kikal achun a din sak u a.

²⁶ Chun, Samson chun amah kai chapang kawm a chun, “In do kâng pên khuom hi ei vak tuk sak tie, vak kinel ing ka,” a ti a.

²⁷ Zie In chuh numei leh pasal in a dim set u a; Philistia milien haw chule zie chun a um u a; chun, Samson etnawp bawlnaa a mat u chuh en nuom in, inchung a chun numei leh pasal sangthum vel a um u a.

²⁸ Chun, Samson chun Lalpa a sama, “Aw Lalpa Pathien, lungsiet takin ei hun hezing inla, lungsiet takin khatvei mai ei hun hihhat kit in, ti’n ka hun ngên hi. Aw Pathien, Philistia te chung ahin ka mitchangte nih phuba hih ka lak theih na dingin,” a ti a.

²⁹ Chun, Samson chun, zie In do pên sutpi nih chuh a vak tu a, a khut changlam in khat a sawn a, a khut veilam in khat a sawn a.

³⁰ Chun, Samson chun, “Philistia te haw hi tawh thi khawm ing kau,” a ti a. Tichun, a khun a, theihtawp in khuom chuh a khut nih tuok in a sawn a, tichun, milien, mi lal haw leh a insung a um chengcheng chuh in chun a delhlum tai. Khutichun, a damsung a a thah sangin a thih khawm pih chuh a tam zawi.

³¹ Tichun, a suohpih te leh pa inkawte chengcheng chuh a hung suk u a, a luong chuh a pawto u a; Zorah leh Eshtaol kal a a pa Manoah kivuihna mun achun a vui tau hi. Tichun, Israel chate chung achun kum sawmnih sung chuh vai a hawm hi.