VAIHAWMTE 12 - PATHIEN LEKHABU THIENGTHO (BSI)

Jeptha leh Ephraim te

¹ Chun, Ephraim mite chuh a kisam khawm u a, mâllam zuon in a chieh u a; Jeptha kawmah, “Bang a ti a Amon suonte do dinga na hung laia kei uh nei chiel loh ahim? Na In hun halkhum ding ka hiu,” a tiu a.

² Chun, Jeptha chun a kawm u ah, “Amon suonte chuh ka mite tawh theihtawp in ka do u a; ka hun thuthak lai khan a khut u apat nei hukdawk ngâl puou a.

³ Tichun, nangun nei hukdawk nuom puou hi tih ka het phetin thih khawksalo hiel in ka panga. Amon suonte do dingin ka va kuon a, tichun Lalpa’n amau chuh ka khut ah ei pie a, zieziekchun bangati a ei do dinga tuni a hi hung kipan na hiu hi?” a ti a.

⁴ Khutichun, Jeptha chun Gilead mite chuh a samkhawm a, Ephraim te chuh a do ta a: chun Gilead te chun Ephraim te chuh a that tau a, Nanguh Gilead mi, Ephraim apat taimang, Ephraim te leh Manasseh te laka tel maimai na hiu a tih ziekuh ahi.

⁵ Chun, Gilead te chuh Ephraim te Jordan lui kaihmun achun ana man u a, chun, hiti hi a hi a, Ephraim mi a hung suok chate chun, “Ei galkaih sak un,” a tih tieng u leh Gilead mite chun a kawm u ah, “Ephraim mi na him?” ti’n a dâwng u a. Amau chun, “Ka hi puou ui,” a tih tieng u leh.

⁶ A kawm u ah “ ‘Shiboleth’ vak ti tie,” a tiu a. Chun, amau chun a gen dik theih loh ziek un “Siboleth” a ti zel sek u a; zie tieng chuleh a man u a, Jordan lui kaihmun achun a na that zel u a; zie ni chun Ephraim mite chuh singli leh sangnih hiel a that u a.

⁷ Tichun, Jeptha chun Israel chate chung achun kum gup vai a hawm a. Zie nung chun Gilead mi Jeptha chuh a thi ta a, Gilead gam a khuo khat ah a vui tau hi.

Ibzan, Elon leh Abdon

⁸ Chun, amah nung chun Bethlehem mi Ibzan chun Israel te chungah vai a hawma.

⁹ Zie pa chun chapa sawmthum a nei a, chanu sawmthum gamdang ah a sawl a, chun, a chapate chuh gamdang numei zi’n a neih saka. Chun, Israel chate chung ah kum sagih vai a hawm a.

¹⁰ Chun, Ibzan chuh a thi a, Bethlehem khuo ah a vui tau hi.

¹¹ Chun, amah nung chun Zebulun mi Elon in Israel te chungah vai a hawma, kum sawm sung Israel chate chungah vai a hawm hi.

¹² Chun, Zebulun mi Elon chuh a thi a, Zebulun gama Aijalon khuo ah a vui tau hi.

¹³ Chun, zie nung chun Pirathon mi Hillel chapa Abdon in Israel te chungah vai a hawma.

¹⁴ Zie pa chun chapa sawmli leh tupa sawmthum sabiltungno chunga chu sek te chuh a nei a, amah chun Israel chate chungah kum giet vai a hawm hi.

¹⁵ Chun, Pirathon mi Hillel chapa Abdon chuh a thi ta a, Ephraim gam, Amalek tânga Pirathon khuo achun a vui tau hi.