VAIHAWMTE 10 - PATHIEN LEKHABU THIENGTHO (BSI)

Tola Vaihawmna

¹ Chun, Abimelek thih nung chun Israel chate hukdawk dingin Issakar phung a mi Dodo chapa Puah chapa Tola chuh a hung ding dawk a, amah chuh Ephraim tânggama Shamir khuo a um ahi.

² Kum sawmnih leh thum Israel te chung ah vaihawm in a panga, chun a thi a, Shamir khuo ah a vui tau hi.

Jair Vaihawmna

³ Zie nung chun Gilead mi Jair a hung hi a, kum sawmnih leh nih Israel te vaihawm in a pang a.

⁴ Chun, zie pa chun chapa sawmthum, sabiltung no sawmthum chunga chu sek te chuh a nei a; Gilead gam ah khuo sawmthum a nei u a, ziehaw chuh tuni tieng hin Havoth-jair a kitii.

⁵ Chun, Jair chuh a thi a, Kamon khuo ah a vui tau hi.

Jeptha Vaihawmna

⁶ Chun, Israel chate chun Lalpa mitmuh in thil gilo a hun hih kit tau a, Baal te, Ashtaroth te, Suria pathien te, Zidon pathien te, Moab pathien te, Amon suon pathiente, Philistia pathiente na a sem u a; tichun Lalpa a kiheisan tau a, a na a sem ta puou hi.

⁷ Khutichun, Lalpa chuh Israel te chung ah chun a lungna ta a, Philistia te leh Amon suonte khut achun a pie ta a.

⁸ Chun, zie kum chun Israel chate a sulungkham un, a sugimthei mah mah tau a; Jordan gâl Gilead gama um Amor te gama cheng Israel suonte chuh kum sawm leh kum giet hiel a sugimthei tau a.

⁹ Chun, Amon suonte chun Judate, Benjamin te, Ephraim suonte do dingin Jordan gâl a va kai u a; tichun Israel chate chuh a lungkham mah mah tau a.

¹⁰ Chun, Israel chate chun, “Ka Pathien u chuh ka na kihei mang san u a, Baal te na chuh ka nasep tâk ziekun na chungah thil ka hihkhiel tau hi,” ti’n Lalpa a sam u a.

¹¹ Chun, Lalpa’n Israel chate kawmah, “Aigupta te, Amor te, Amon suonte, Philistia te, khut apat a ka hun hukdawk hilo na hiu hi?

¹² Zidon te, Amalek te, Maon te’n le a hun sugimthei u a, chun, nei sam u a, tichun, a khut u apat a ka hukdawk na hiu hi.

¹³ Himahlele, nangun nei kihei mang san u a, pathien dangte na na sem zaw tau a; zieziekchun hun hukdawk ta puo’ng ka.

¹⁴ Na tel zawk uh pathiente chuh sam unla, amau chun na lungzînnau apat in hun hukdawk tau hen,” a ti a.

¹⁵ Chun, Israel chate chun Lalpa kawmah, “Thil ka na hihkhiel tau hi; pha na sak bang in ka chung u ah hih mai in; ahi’n, tuni hin chuh lungsiet tak in kei uh ei hun hukdawk tei in,” a tiu a.

¹⁶ Tichun, a lak u a nam dang pathiente chuh a kawihmang u a, Lalpa na a sem tau a. Chun, Israel chate lungkham ziek chun a lungthim chuh a lungkham mah mah ta a.

¹⁷ Chun, Amon suonte chuh a kikhawm u a, Gilead gam achun a va kikulh tau a. Chun, Israel chate chuh a kisam khawm u a, Mizpah khuo ah a kikulh tau a.

¹⁸ Chun, Gilead gama mite leh a milien teu chuh a kiho u a, “Amon suonte va do masapen ding hi kuo a um em? Zie tawbang mi chuh Gilead gama um chengcheng te chungah vaihawm in pang in a,” a tiu a.