VAIHAWMTE 1 - PATHIEN LEKHABU THIENGTHO (BSI)

Adonibezek a Zawh nau

¹ Chun, hiti hi a hung hi a, Joshua thih nung chun Israel chate chun, “Kanaan mite do dinga kei uh thasang a va kuon masapen ding kuo a?” ti’n Lalpa a dâwng u a.

² Lalpa chun “Juda kuon masapen hen, ngaitiem u, gam chuh a khut ah ka pie tai,” a ti a.

³ Chun, Juda chun a suohpihpa Simeon kawmah, “Kanaan mite do dingin gam ei piek na ahin hung to in; tichun, ken le nang gamsung ah hun zui ding ka hi,” a ti a,

⁴ Tichun, Juda chuh a va kuon ta a. Tichun, Kanaan mite leh Periz mite chuh Lalpa’n a khut ah a pie ta a; Bezek khuo ah mi singkhat a that u a.

⁵ Chun, Bezek khuo achun Adonibezek a kituokpih u a, tichun a do u a, Kanaan mite leh Periz mite chuh a that u a,

⁶ Chun, Adonibezek chuh a tai a, chun a delhzui u a, a man tau a, a khutpi zung leh a kengpi zung a tan sak u a.

⁷ Chun, Adonibezek chun, “Leng sawm sagih khutpi zung leh kengpi zung kitan te chun ka dawhkhâng nuoi ah anmal a luok sek u a, ka thilhih bang takin Pathien in ei dinthuk ahi ta hi,” a ti a. Tichun Jerusalem ah a pui u a, zie tak achun a thi ta a.

Jerusalem leh Hebron a Lâknau

⁸ Chun, Juda suonte chun Jerusalem khuo a vak do u a, a la tau a, chemzâm in a that u a, khawpi chuh mei in a hâl tum u a.

⁹ Chun, zie nung chun tânggam a um Kanaan mite, simlam a cheng te, phaicham a cheng te chuh do dingin a va kuon u a.

¹⁰ Chun, Juda te chun Kanaan mi Hebron a umte chuh a va do u a, (a masang chun Hebron chuh Kiriath-arba a kitii) tichun, Sheshai, Ahiman leh Talmai te chuh a that tau a.

Othniel in Debir a Lâkna

¹¹ Chun, zie apat chun Debir khuo a umte chuh a do u a, (masang in Debir chuh Kiriath-sepher a kitii).

¹² Chun, Kaleb in, “Kuole Kiriath-sepher khuo chuh do a, la thei taphawt chuh ka chanu Achsah hi zi’n neih sak ing ka,” a ti a.

¹³ Chun, Kaleb naupa Kenaz chapa Othniel chun a la ta a.

¹⁴ Chun, hiti hi a hung hi a, a kichên niu chun Othniel in a zi chuh a pa kawma gam ngên dingin a sawl a; sabiltung chung apat chun a kum tha a, chun, Kaleb chun a kawmah, “Bang a na deih?” a na ti a.

¹⁵ Chun, amah chun a kawmah, “Ei vangsak inla, simlam gam achun nei um sak ta ngâla, tuinaknei haw le ei pie tel in,” a ti a. Tichun, Kaleb in tuinaknei saknung zaw leh tuinaknei thangnung te chuh a pie a.

Juda leh Benjamin Gâl Zawhna

¹⁶ Chun, Mosi puzawnpa Ken suonte chuh Arad simlam a Juda thalek achun Juda suonte tawh tum khawpi apat chun a va chieh to u a; Amalek te lak achun a va cheng tau a.

¹⁷ Chun, Juda chuh a suohpihpa Simeon tawh a va chieh u a, Zephath khuo a um Kanaan mite chuh a that u a, khawpi chuh hansie a lawh u a, a hih chimit vek u a. Tichun, zie khawpi min ding chun Hormah a sa tau a.

¹⁸ Chun, Juda chun Gaza, Ashkelon, Ekron leh a kimvel a khuo te chuh a la a,

¹⁹ Tichun, Lalpa’n Juda mite chuh a panpih a, tânggam haw chuh a la vek u a, phaicham a cheng te vang chun thik kangtalai a neih ziekun a nawhdawk zo puou a.

²⁰ Chun, Mosi’n a na gensa bangin Hebron khuo chuh Kaleb a pieu a; zie muna Anak chapa thum te chuh a nawhdawk ta a.

²¹ Chun, Benjamin suonte chun Jebus mite Jerusalem a cheng te chuh a nawhdawk puou a; tichun, Jebus mite chuh Benjamin suonte tawh tuni tieng hin Jerusalem ah a cheng khawm zing tau hi.

Ephraim leh Manasseh ten Bethel a Lâknau

²² Chun, Ephraim leh Manasseh namte chule Bethel khuo do dingin a va kuon u a; Lalpa’n amau chuh a panpih a.

²³ Chun, Ephraim leh Manasseh te chun Bethel khuo achun entha ding a sawl u a, (zie masang chun Bethel khuo chuh Luz a kitii).

²⁴ Chun, enthate chun khaw sung apat a hung pawt mi khat a muu a, a kawmah, “Lungsiet takin khuo sung lutna ei hilh tie, tichun phataka hun bawl ding ka hiu hi,” a tiu a.

²⁵ Khutichun, khawpi sung lutna chuh a etsak a, tichun, Ephraim leh Manasseh nam te chun zie khawpi sunga cheng te chuh a that u a; khawpi sung lutna kawt hilhpa leh a inkuonte vang chuh a hing hawih u a.

²⁶ Zie nung chun Hit te gam ah a chieh u a, khuo a siem u a, zie khaw min ding chun Luz a sau a; tuni tieng hin zie min chuh a puo zing ta a.

Israel te’n a Nawhdawk lohteu

²⁷ Chun, Manasseh te chun Beth-shan khuo leh a khawpelte, Taanak khuo leh a khawpel a umte. Dor khuo leh a khawpel te, Ibleam khuo leh a khawpel a um te, Megiddo khuo leh a khawpel a umte chuh a nawhdawk puou a, zie gam achun Kanaan mite chuh a um den tau hi.

²⁸ Chun, hiti hi ahi a, Israel chate chuh a hung hât deuh deuh phet un Kanaan mite chuh a nasem u a gawih dingin a um sak u a, a nawhdawk suok ta puou hi.

²⁹ Chun, Ephraim chun le Gezer khuo a Kanaan mite chuh a nawhdawk diek puoh a, tichun, Kanaan mite chuh Gezer khuo achun a lak u ah a cheng zaw tau hi.

³⁰ Chun, Zebulun te chun le Kitron khawpi a umte leh Nahalol khawpi a umte chuh a nawhdawk puou a, tichun Kanaan mite chuh Gezer khuo achun a lak u ah a cheng zaw tau hi.

³¹ Chun, Aser namte chun le Ako khuo a um te, Ahalab khuo a umte, Akzib khuo a umte, Helbah khuo a um te, Aphek khuo a umte, Zido khuo a umte, Rehob khuo a umte haw chuh a nawhdawk diek ta puou hi.

³² Tichun, Aser suonte chuh zie gama um Kanaan mite lak achun a cheng zaw tau a; Kanaan mite chun a nawhdawk loh ziekun.

³³ Naphtali te chun le Bethsemesh khuo a umte, Beth-anath khuo a umte chuh a nawhdawk puou a; zie gama Kanaan mite lak achun a cheng zaw tau a, amahvang chuh Beth-shemesh khuo a umte leh Beth-anath khuo a umte chuh nasem a mat dingin a um den tau hi.

³⁴ Chun, Amor suonte chun Dan suonte chuh tânggam ah a nawh to u a, phaicham a a chen dinguh a phalsak loh ziek un.

³⁵ Amor te chuh Heres tâng haw leh Aijalon khuo haw leh Shalbim khuo haw achun a um zing tau a; Joseph suonte khut nuoi achun nasem dingin a um tau hi.

³⁶ Chun, Amor te gamgi chuh Akrabim kân in Sela mâllam zuon in a chieh hi.