TITA 2 - PATHIEN LEKHABU THIENGTHO (BSI)

Thugin Diktak

¹ Nangin chuh Thugin diktak tawh kituokte chauh sinsak ah.

² Upate chuh kidêk thei, zahum, lungthim diktak, taksanna leh hehpihna leh thuokhatna nei hi dingin tîlkhoh ah.

³ Nupite’n le Pathien thu chuh gensieta a um lohna’n, numei thiengtho taka hingte guola um dingin tîl ah. Mi hêk hat leh, uain hehte hilo ding ahiu.

⁴ Numei naupang zaw deuhte chuh a pasalteu leh a chateu lungsiet a, thilpha hih kisin dingin tîl ah.

⁵ Chun, amah kithunun thiem leh thiengtho leh, a pasalteu thunuoi a kitulut a, a umdan him uh a Pathien zah mi, mi hêk hatte leh uain hehte hilo a, apha lam sinte hiding in tîl ah.

⁶ Khutibang mah in, tangvalte chuh lungthim diktak pu dingin tîl ah.

⁷ Langkhat a pang te laka mi’n I chunguh a thu phalo himhim gen ding a neih loh ziekuh a a zahchâk theihna dingun,

⁸ Bangakai ah thilpha hih lam ah a tatmuh dingin kisulang inla, na kihilhnau achun nathutak zie leh, zah na umzie leh, na thugen dik zie awihmawh guol loh haw chuh sulang ah.

⁹ Suokte chuh a puteu nuoia kitulut in, nielkalh lo in thil bangakai ah sukipak chiet uh henla; khutthem neilo in um u hen.

¹⁰ Chun, a thilhih teu a chuh, Pathien, I Hukdampau chanchin sinsakna lam thu a chuh minphatna a tun theihna dingin, phatna leh taksanumna chuh sulang zing zing zawu hen.

¹¹ Mi chengcheng kawma hukdamna a tun theihna dingin, Pathien in a hehpihna chuh a hun phuongdawk ta ngâl a.

¹² Kinepna thatnawp-um, I Pathien uh lopitak Hukdampa Isu Krista lopi hung kilâkna chuh ngak in,

¹³ Pathien khawksaklohna leh, khawvel thil utchakna haw chuh haihsan in, tulai khang ahin pilkieu leh, diktat leh Pathien khawksa a I um dinguh ahi, tih zie hehpihna chun ei hilh ta ngâl a.

¹⁴ Amah chuh sukkhelhna chengcheng lak apat ei hukdawk ding leh, amah a mai hi a, a mi thiengthote I hih theihna dingun leh, thilpha hih a phachuom ngai dingin I sik un a hung kipie ta a.

¹⁵ Zie thil haw hi sinsak inla, na thu ngaithate na tîlkhohna leh gaihna achun, thunei takin hilh inla. Kuoma’n hun musit kiu hen.