TITA 1 - PATHIEN LEKHABU THIENGTHO (BSI)

¹ Paul, Pathien suokbilvih leh, Isu Krista sawlchak apat, Pathien mi telte chuh Pathien khawksakna lam thudika pui ding leh, taksanna lama panpih dinga teldawk leh sawl ka hi a,

² Zie chuh kumsawt a hinna kinepna thu a kinga ahi. Zie hinna chuh leisiet kisiem ma pek a Pathien lepchieh ngei lo pa chun ei tiem a,

³ A hun cha chun a thu achun a hun sulang ta a. Zie a thu chuh kei kawma vawp saka um in, Pathien, I Hukdampau thupiek dungzui zel chun ka phuong dawk ta a.

⁴ I kikawp uh taksanna dungzuia ka cha tak tak Tita kawmah ziehi ka zik ahi. Pa Pathien leh Krista Isu I Hukdampau chun hehpihna leh chamna hun pie hen.

Kret Tuikuol a Nasepna

⁵ Thilhih bangkhaihaw chuh na hih tup zel na ding leh, ka hun thupiek banga khuo tina upate na guot zel na dingin, Kret tuikuol a ka hun nutsieh ahi. Ka hun thuhilhna kha hezing in:

⁶ upa chuh dem umlo, zi khat nei; chate Pathien thu taksang, gilo leh thumang lo a het hilo ding ahiu hi.

⁷ Sapchuom lamkai chuh Pathien nasep enkawl pên a hih ziekin dem umlo a hih ding ahi. Amah kithusak, lungna vak, zungawlvei nuom, mivelh nuom, lepna diklo a huoiham mi hi lo ding ahi.

⁸ Mi lawpdan thiem, a phalam deih mi hi ding ahi. Amah kithunun thei, diktaka um, thiengtho leh kisawizawi mi a hih ding ahi.

⁹ Thugin tawh kituok thute chuh vawp sak theih leh, dettaka tuchak mi a hih ding ahi. Khutibanga hih chun, mi dangte chuh thu dik sinsakna lam achun tîlkhoh thei intin, chun, mi nielkalhte diklohna chule sulang thei ina.

¹⁰ Dan bang lo a um, thu gen mai maite leh, milem hatte mi tamtak a um ngâl u a; a diek in zektan haw laka mi ahi deuh pên ui.

¹¹ Ziehaw kam chuh hup sak ding ahi, lepna diklo deih ziekin, thu sinsak loh ding pi sinsak in, mi a inkuon kuon un a chawk chavai sek ngâl u a.

¹² Kret mi ngêi, a thiemgauteu laka khat chun, “Kret tuikuol a umte chuh lepchieh te, sahang gilo, thadah an nek hatte ahiu hi,” ti’n a gen hi.

¹³ Zie thuhetsak chuh a dik ahi. Zieziekchun, Judate thusim holimna haw, thutak nungngat a,

¹⁴ taksanna hisel tak chuh a neih theihna dingun natak in hilhgaih ah.

¹⁵ Mi thiengte ding chun bangakai hi a thieng sek a; himahlele, mi thanghuoi leh gingcha lote ding chun bangmah a thieng a um sek puoi, a lungthimteu leh a sielephahetnau le sukbuok a a um tâk ziekin.

¹⁶ “Pathien ka heu ui,” ti’n a pang sek u a, himahleh, a thilhih teu chun a haw sek ui. Muhdah um leh thu awilote ahiu a, thilpha hih dinga titna nei lo hielte ahiu ui.