THUPHUON 9 - PATHIEN LEKHABU THIENGTHO (BSI)

¹ Chun, vânsâwlchâk ngana chun a pengkun chuh a vak mût a, tichun, aksi, leia kie sa hi ka mu a, thampikuo-âwng chabi chuh a kawmah a pieu a.

² Zie aksi chun thampikuo-âwng chuh a hawng a, tichun, kawkhuk apat chun meikhu, pummei nasatak khu tawbang a hung pawt a; zie meikhu ziek chun nisa leh vanthamzawl cheng chuh a hung thim ta a.

³ Meikhu lak apat chun lei chungah khaupepi a hung pawt uh a, aikawmte’n thilhih theihna a neih tawbang uh hi, thilhih theihna a pieu a.

⁴ A chalpâng uh a Pathien melchikna kinam nei lote ngâllo chuh, leia hampa le, thilhing himhim le, thing himhim le, susie lo dingin a hilh u a.

⁵ Khaupepite kawm achun, zie mite chuh that pai hiel lo a, tha nga sung chuh sugimthei zaw dingin thu a pieu, a. A sukgimtheih zieu chuh, aikawm in mi a peh a, a sukgimtheih tawbang hi ahi.

⁶ Zie ni tieng chuleh mi’n thihna hawl un tin uh, himahleh, mu hiel puo’n au, thih ut un tin uh, himahleh, thihna chun amau haw taihsan ina.

⁷ Khaupepihaw chuh sakawl kido dinga kiguo zosa tawbang ahiu a, a luchang uh achun sana lallukhuk tawbang a nei uh a, a maichang uh chuh mihiem mai tawbang ahi.

⁸ A sam hawu chuh numei sam tawbang a hi a, a hau haw chule, sakeibaknei ha tawbang ahi.

⁹ Chun, thik awmphaw tawbang hi a nei uh a, a tha zap git uh chuh kidona kangtalai gi, sakawl tamtak, kido dinga tai gi dup dup tawbang ahi.

¹⁰ Chun, aikawm mei tawbang leh mi dehna a nei uh a, zie meite chun a hii. tha nga sunga mi suknat theihna a neih uh chuh.

¹¹ Chun, Thampikuo-âwng sawlchak chuh a chunguh a lalpen in a nei uh a, a min chuh Hebrai pau in Abaddona ahi a, Grik pau in, Apolluona ahi. (A umzie chuh, “Sumangthaipa,” tihna ahii.)

¹² Chunggikna masapen chuh a kichai ta a, ngaitie! tunung leh chunggikna nih hung um kit ina.

¹³ Chun, vânsâwlchâk gupna chun a pengkun chuh a vak mût a; tichun, Pathien ânga sana maichâm ning zum li a kipat chun aw ka za a.

¹⁴ Zie aw chun vânsâwlchâk gupna, pengkun chawipa kawm achun, “Euphrates luipi a vânsâwlchâk li, kikante khah phel ta’n,” a ti a.

¹⁵ Tichun, zie dâkkâl leh ni leh, tha leh kum a ding chun, mihiem mun thuma khena mun khat sulum dinga guonggalh sa, vânsâwlchâk lite chuh a phel tau a.

¹⁶ Chun, sepaih sakawl chung chute lawi a tam lam uh a singa sima-mun singnih ahiu a, a tam zieu chuh mi gen ka zak ahi.

¹⁷ Ka thilmuh achun, sakawl leh a chunga chute chuh zie tawbang hin ka mu a; awmbelh mei guola san a nei uh a, sapphire guola dum leh kât guola eng hi le a nei uh a. Sakawl luchang haw chuh sakeibaknei luchang tawbang a hi a, a kam uh apan chun mei leh meikhu leh kât a pawt a.

¹⁸ Zie gawtna chi thum: mei, meikhu leh kât chun, mihiem mun thuma khena mun khat chuh a sulum ta a.

¹⁹ Zie sakawlte thilhih theihna chuh a kam uh leh a meiteu a chuh um ahi. A mei uh chuh gûl tawbang a hi a, luchang le a nei uh a; zie chun ahi, mi a suknat sek uh chuh.

²⁰ Chun, mihiem, zie gawtna a suklup mâwkte chun, thithate leh, sana milimte, dangka milim te, sumeng milimte, suong milim te, thing milim te, bangmah mu thei lote leh za theilo, chieh thei diek lote a ho tâk lohna dingun, amau haw khut mâwnga a thil siemteu chuh a tâng diek puou hi.

²¹ A tuolthah uh leh, a dawi mat uh leh, a kideihchak uh leh a gukchaknateu chule a haihsan diek puou hi.