THUPHUON 8 - PATHIEN LEKHABU THIENGTHO (BSI)

Tiemtehna Sagihna

¹ Chun, tiemtehna sagihna chuh a vak phel phetin, van chuh dâkkâl kimkhat sung chuh a thip chut a.

² Chun, Pathien ma a vânsâwlchâk sagih ding sekte chuh ka mu a; chun, a kawm u ah pengkun sagih a pieu a.

³ Chun, vânsâwlchâk dang, gimlim hâlna sana bawm chawi kawmin a hung a, maichâm kieng achun a ding ta a. A kawm achun, gimlim tamtak, mi thiengthote pauchamna behlap ding leh, Lalchutphah maia sana maichâm a lat ding chun a pieu a.

⁴ Tichun, gimlim khu chuh, mi thiengthote pauchamna chu tawh, Pathien maa ding sek, vânsâwlchâk khut apat chun a chieh to a.

⁵ Chun, vânsâwlchâk chun, gimlim hâlna bawm chuh a la a. maichâm a mei chun a hih dim a, chun. lei chungah a paih ta a. Tichun, vangi le, aw le, kawlphe le, inling le a hung um ta a.

Pêngkun chuh

⁶ Chun, vânsâwlchâk sagih, pengkun sagih chawite chuh, mût dingin a kiguonggalh tau a.

⁷ Tichun, vânsâwlchâk khatna chun a pengkun chuh a hun mût a, chun, giel leh mei, thisan tawh kihel in lei chungah a hung zu tha zieng ta a. Zie chun lei, mun thuma khena mun khat chuh a kâng tum a, thing leh hampa hing le, mun thuma khena mun khat chuh a katum vek ta a.

⁸ Chun, vânsâwlchâk nihna chun a pengkun chuh a vak mût a; tichun, tâng lienpi meikâk lai tawbang hi tuisuohgiet ah a paih lut uh a. Tichun, tuisuohgiet, mun thuma khena mun khat chuh thisan a hung suok ta a,

⁹ Tuisuohgiet a thilsiem, hinna neite chule, mun thuma khena mun khat chuh a thi tau a; kuonghaw chule, mun thuma khena mun khat chuh suksiet ahi tau hi.

¹⁰ Chun, vânsâwlchâk thumna chun a pengkun chuh a vak mût a. Tichun, aksi lienpi, meisel tawbanga kuong, van apat in a hung kie a; zie chun luipi leh tuinakte chuh a delh khum ta a.

¹¹ (Zie aksi min chuh, “Gamsai, ahi,”). Tichun, luipi mun thuma khena mun khat chuh a hung kha ta a, zie tui chuh a dâwn uh a, mi tamtak a thiu a, a hung khat tâk ziekin.

¹² Chun, vânsâwlchâk lina chun a pengkun chuh a vak mût a. Zie chun ni sa, mun thuma khena mun khat, thapi, mun thuma khena mun khat, aksi le mun thuma khena mun khat chuh suksiet ahi ta a; tichun, ni, mun thuma khena mun khat, tha mun thuma khena mun khat chuh a hung thim ta a.

¹³ Tichun, ka vak en a, mupi vanlaizawl a leng in, aw ngeih tak in, “Vânsâwlchâk thum, pengkun hun mût ding, zie gi hung um dingte ziek chun leia umte chung a gik ie! a chunguh a gik ie! a chunguh a gik ie!” a tih ka za a.