THUPHUON 6 - PATHIEN LEKHABU THIENGTHO (BSI)

Tiemtehna te

¹ Chun, Belamno chun, tiemtehna sagihte laka khat a hihsiet a, a phel lai tak chuh ka mu a, chun, ganhing lite laka khat chun vangi tawbang hielin, “Hung ah,” a tih ka za a.

² Ziephet chun ka vak en a, ngaitie! sakawl kâng ka mu a; a chunga chu pa chun thalphel a chawi a, a kawm achun lallukhuk a pieu a. Tichun, gâl zotu bang takin, zo zel dingin a pawtdawk ta a.

³ Chun, tiemtehna nihna chuh Belamno chun a vak phel leh, ganhing nihna chun, “Hung ah,” a tih ka za a.

⁴ Tichun, sakawl dang, a san zat a hung pawt kit a; a chunga chu pa kawm achun, lei chunga kidona um sak a, mite kithah tuoh sak theihna thilhih theihna a pieu a; chemzâm hiem tak khat hile a pieu a.

⁵ Chun, Belamno chun tiemtehna thumna chuh a vak phel leh, ganhing thumna chun, “Hung ah,” a tih ka za a. Tichun, ka vak en a, ngaitie! sakawl vawm ka mu a; a chunga chu pa chun thil tehna a chawi a.

⁶ Chun, ganhing lite lak apat chun aw tawbang hin, “Makhai in suk loh buh dan khat, makhai in sakawlbuh dan thum; thau leh uain vang chuh susie ki’n.” a tih hi ka vak za a.

⁷ Chun, Belamno chun tiemtehna lina chuh a vak phel leh, ganhing lina aw chun, “Hung ah,” a tih ka za a.

⁸ Tichun ka vak en a, ngaitie! sakawl dang ka mu a, a chunga chu pa min chuh “Thihna” a hi a, Mithi khuo’n a hun zui a. Ziete haw chuh lei mun li a khena mun khat chungah, kidona te kiel te hilegau te leh gamsate manga mi thah theihna thuneihna piek ahiu hi.

⁹ Chun, Belamno chun tiemtehna ngana chuh a vak phel leh, Pathien thu a gen ziekuh leh, hetpihtu taksanum taka a pan ziekuh a thaha umte thagau haw chuh ka mu a.

¹⁰ Amau chun aw ngeih tak in, “Aw Lalpa, mi thiengtho leh diktak, bang chana lei chunga mite chunga vaihawm lo a, ka thisan phubau chuh la lo a na um ding?” ti’n a kiko u a.

¹¹ A kawmuh achun puon vam a pie chiet uh a. Chun, a sawntawlawi chanpihteu leh, a suohpihteu, amau haw bang mah a thaha um dingte chuh a kim masang sieh uh, chawmkhat a na ngak tadih dingin a hilh uh a.

¹² Chun. Belamno, tiemtehna gupna hihsie a a phel chuh ka vak mu a. Ziephet chun, lei nasatak in a hung kilîng a, nisa chuh samul puon vawm bang mai in a hung vawm tha ta a, chun, tha chuh thisan bang mai in a hung san ta a.

¹³ Aksite chuh, theipi kung huih in a mût a, a gah siel a pulh tawbang hielin, lei ah a kie ta a.

¹⁴ Van chuh lehkhaziel. kiziel mang bangin a mang ta a. chun tângte leh tuikuol tin chengte chuh a umnau apat, chawn mang in a um tau hi.

¹⁵ Chun, leia lengte, milien te. sepaih lawiupa te, mi neizote, mihat te, insung suok leh suok lo tin cheng te, chuh kawlpûk leh, tânga suongpi nuoi haw achun a kisel tau a.

¹⁶ Tichun, tângte leh suongpite kawm achun. “Ei delh khum unla, Lalchutphah a chu pa maikawk apat leh Belamno lungnatna apat ei lieh u!

¹⁷ A lungnatna ni lopi tak chuh a hungtung ta hi, tichun kuo a ding thei ding?” a tiu a.