THUPHUON 5 - PATHIEN LEKHABU THIENGTHO (BSI)

Lehkhabu ziel leh Belamno

¹ Chun, lalchutphah a chu pa khut changlam achun lehkhabu a sung leh a paw kizik, tiemtehna sagih a kitiemteh khum chuh ka mu a.

² Chun, vânsâwlchâk hât tak aw ngeih tak a, “Kuo a zie lehkhabu a tiemtehna haw hi hihsie a, phel tâk um?” ti a kiko le ka mu a.

³ Khutichun, van a le, lei chunga le, lei nuoia le kuomah, lehkhabu phel thei chuh a um puou, achung en thei nasan le a um diek puou hi.

⁴ Khutichun, kuoma’n lehkhabuziel chuh phel tak leh, a chung en thei nasan le a um loh phat uh chun, hah kah in ka kap ta a.

⁵ Ziephet chun, upa laka khat chun ka kawmah, “Kap kih, ngaitie! Keipi bakkai, Juda nam a um, David phung guipi khan, lehkhabuziel chuh phel ding leh, a tiemtehna sagihte chuh phel dingin a zo ta ie,” ei ti a.

⁶ Chun, lalchutphah lailung a ding, Belamno, ganhing lite leh upate um kimvela um chuh ka mu a. Zie Belamno chuh a kithat sa hi leh kilawm tak hin a kilang a. Ki sagih leh mit sagih hi a nei a, ziete chuh Pathien Thagau, khawvel pumpi chunga sawl dawka umte chuh ahiu hi.

⁷ Tichun, Belamno chuh a chieh a, lalchutphah a chu pa khut changlam apat chun, lehkhabuziel chuh a la ta a.

⁸ Ziephet chun, ganhing lite leh, upa sawmnih leh lite chuh Belamno ma achun a bawkkhup tau a. Amau haw chun kingkang leh sana belhbu, gimlima dim a kichawih chiet uh a, zie chuh Pathien mite pauchamna chuh a hii.

⁹ Chun, amau haw chun, “Nang, lehkhabu chuh laa, A tiemtehna te phel tâk na hi ie; Thah in na um ta a, Chitin a mite, namtin a mite, Pathien dingin na thisan in na chaw a,

¹⁰ Ka Pathien dingun khuoletui leh thiempu’n na siem ta a; Amau haw chun lei chung achun vaihawm un au,” ti’n la thak a sau a.

¹¹ Chun, ka vak et kit leh, lalchutphah leh, ganhing lite leh upate kimvel achun, vânsâwlchâk sang tamtak aw hi ka vak za a! Amau haw chuh lalchutphah kimvel leh, ganhing lite leh upate kimvel achun a dinguh a,

¹² chun, aw ngeih tak in, “Belamno thahsa pa hih Thilhih theihna te, neihzawhna te, chitna te, Hatna te leh limbawlna te, lopina te, vangpiekna te mu tâk a hi ie,” a tiu a.

¹³ Chun, van leh, lei chung leh, lei nuoi leh, tuisuohgiet a thilsiem tin cheng umte leh, vankhupsin nuoia um chengcheng te chun: “Lalchutphah a chu pa leh, Belamno kawm achun, Vangpiekna leh, limbawlna le, Lopina le, vaihawmna le, Kumkhawtuong in um hen,” a tih uh le ka za a.

¹⁴ Chun, ganhing lite chun, “Amen,” a tiu a. Upate chun le khupbawk in a ho uh a.