THUPHUON 3 - PATHIEN LEKHABU THIENGTHO (BSI)

Sardis Sapchuom

¹ “Chun, Sardis khuo a sapchuom haw lawi vânsâwlchâk kawm achun hiti hin zik ah: “Pathien Thagau sagih leh, aksi sagih neipa khan zie thu haw hi a gen a hii: Na thilhih ziete ka hêi, thi zing ngâla, hing min na put hi.

² Kiveng inla, na thil neih naklaite khah, a thih suok kêi ma’n suhat in. Na thil hihhaw himhim, ka Pathien mit tung zo in ka mu puoi.

³ Khutichun, a tûngin bangti sinsak a um na him, bang na ti zak ahim gel zing ah; zie chuh zawp inla, na gitlohna apat in kihei kit in. Na kiven loh le vang, gucha bangin hung ing ka ting, bangtik phata ka hung ding tih nasan le he puo’n la.

⁴ Himahlele, Sardis khuo akhan, a puon uh sawp ngim, mi tawmcha mai na um uh khah. Amau haw chuh puon vam silh in ka kawmah hung khawlaileng sek un au; khutibang hih hâwi chuh a hi ngâl uh a.

⁵ A zo tacheng khutibang chun, puon vam silh sak in um un au, chun, Hinna Lehkhabu apat, a min u chuh thai mang lo hiel ding ka hi, ka Pa masang leh, a vânsâwlchâkte masang achun a min uh ka phuon ding ahi.

⁶ “Thagau in sapchuom haw lawite kawma thu a gen hi, bil nei chun zau hen! a ti ie,” ti’n.

Philadelphia Sapchuom

⁷ “Chun, Philadelphia khuo a sapchuom haw lawi vânsâwlchâk kawm achun hiti hin zik ah: “Mi thiengthopa, mi dik pa, David chabi neipa, kuomah khâk loh dinga hawng a, kuomah hawn loh dinga khakpa khan, zie thu haw hi a gen a hii:

⁸ Na thilhih ziete ka hêi. Thilhih theihna tawmcha na nei a, ka thu sinsak te na zawp a, keia dingin na ginum hi tih ka hêi. Kuomah khâk theih loh, kawtkhak hawn sa na masangah ka kawih hi.

⁹ Ngaitie, Setan lawi laka tel, Juda tak hilo a, lepchieh gena Juda ka hi, kitite chuh sawl in, na keng bul ah hun ho sak ing ka ting, chun, ka hun hehpih hi tih le hetsak ing ka.

¹⁰ Thuokhat dinga ka hun thupiek chuh na vawp zing ziekin, ken le khawvel a patepna, leia mi chengcheng chunga hungtung ding buoina lak apat chun hun humbit ing ka.

¹¹ Hung vak zieng ding ka hi, kuoma’n na lallukhuk chuh a hun lâksak lohna dingin, na thil neihsa khah vawp bit ah.

¹² A zo ta cheng chuh ka Pathien Ho-In ah banin siem ing ka ting, tak apat chun pawtdawk ta puo’n au. A chung achun ka Pathien min tawh, ka Pathien khawpi, Jerusalem thak, van a ka Pathien apat a hung suk ding min chu tawh zik ing ka. A chung achun ka min thak le zik ing ka.

¹³ “Thagau in sapchuom haw lawite kawma thu a gen hi bil nei chun zau hen! a ti ie,” ti’n.

Laodikei Sapchuom

¹⁴ “Chun, Laodikei khuo a sapchuom haw lawi vânsâwlchâk kawm achun hiti hin zik ah: “Amen, taksanum leh hetpih dik, Pathien thilsiem haw bul khan, zie thu haw hi a gen ahi;

¹⁵ Na thilhih ziete ka hêi, vawt la na vawt puo’n, lum la na lum puo’n; na vawt ahim, na lum ahim ka deih ahi!

¹⁶ Khutichun, lumla-lumlo, vawtla-vawtlo, lum pelhpulh a na um ziekin, ka kam apat hun siet dawk ding ka hi!

¹⁷ ‘Ka neizo in, sum ka hau in, bangmah ka tasam puoi,’ na tih ziek leh, nang mi gimthei, ngaihtuoh-um, neilah, mitdûk, sangawn chuh na hi tih na kihet loh ziekin!

¹⁸ Na hung neihzawh theihna dingin, ka kawm apat sana, sana thieng tak hung kichâwk dingin thu ka hun piek na hi. Chun, na sangawnna zahchâk um tak chuh na khuh theihna dingin, puon vam le hung kichâwk dingin ka hun tih na hii. Na muh theihna dingin, mita nuh ding mitlo le ka kawm apat hung kichâwk dingin ka hun thumawp na hi.

¹⁹ Ka hehpih tak cheng chuh ka hilhgaih a, ka thunun sek hi. Khutichun. gunchuh inla, lunghei ah.

²⁰ Ngaitie! kawtkhak bula dingin ka kiu hi, kuo’nle ka aw a zak a, kawt a hawn chun, a kawmah lut ing ka ting, a kawmah nitâk an ne’ng ka ting, ama’n le ka kawmah ne’na.

²¹ A zo tacheng ka lalchutphah chungah ka changlam ah chut sak ing ka, ken le ka zawh a, ka Pa kawma lalchutphah a ka chut guol khan.

²² “Thagau in sapchuom haw lawite kawma thu a gen hi bil nei chun zau hen! a ti ie ti’n” a ti a.