THUPHUON 22 - PATHIEN LEKHABU THIENGTHO (BSI)

Hinna Luipi

¹ Chun, amah chun hinna luipi chîm tak, krustal suong tawbanga val, Pathien leh Belam No Lalchutphah apat hung luong dawk chuh ei etsak a.

² Zie khawpi kawtthêl lailung leh a lui pang tuok achun Hinna thinggah chichuom chuom sawmlenih nei, tha chenga khatvei gah a um a; chun, zie thing nah haw chuh namtin sukdamna ding ahi.

³ Chun, zie khawpi sung achun hansie him um ta puo’n tin, Pathien leh Belamno lalchutphah chuh um zaw ta’n tin; tichun, a suokte chun amah chuh zenviel un au.

⁴ Chun, amau chun a mel chuh muu un tin uh; a min u chuh a chalpâng u ah kizik ina.

⁵ Zie tak achun zan um ta puo’n tin, thaumei vak leh nisa ngai ta puo’n tin uh; Lalpa Pathien chun amau salhvak ding ahi ngâla; tichun, kumkhuotuong in vaihawm ta’n au.

Isu Hungkit na Ding

⁶ Chun, vânsâwlchâk chun ka kawmah, “Zie thu haw hi taksan a um in, a dik ahi; tichun, Lalpa, thiemgaute kawma a Thagau piepa Pathien chun, thil hungtung vak dingte chuh, a sawntawlawite kawma etsak dingin, a vânsâwlchâk a sawl ahi.

⁷ Ngaitie! hung vak zieng ding ka hi, Zie lehkhabu a hilhlawkna thu pawm taphawt chuh a hamphau ie!” a ti a.

⁸ Chun, kei, Johan hih, zie thil chengcheng mu pa leh za pa chuh ka hi. Chun, ka zak a, ka muh phet chun, zie thil haw ei etsak vânsâwlchâk keng bul achun, Pathien ho tawbanga ho dingin ka khupbawk ta a.

⁹ Himahleh, amah chun ka kawmah, “Khutichun hih ki’n khai! Kei hile, nangmah leh na suohpih thiemgaute leh, zie lehkhabu thu pawmte sawntawlawi chanpih ka hi a puo. Pathien ho zaw ta’n,” a ti a.

¹⁰ Chun, amah chun ka kawmah, “Zie lehkhabu a hilhlawkna thu haw hi îm ki’n; zie thil haw hung tunna ding chuh a nai ta ngai a.

¹¹ “Mi diktatlo chuh, diktat lo in um zing hen la, mi diktat chuh, mi diktat in um zing hen; mi thienglo chuh, a thieng lo in um zing hen la, mi thiengtho chuh, a thiengtho in um zing ta hen!” a ti a.

¹² “Ngaitie! hung vak zieng ding ka hi ie! mitin, a thilhih dungzui chiet uh a piek dingin, ka kipahman ka kawmah a um hi.

¹³ Kei, Alpha leh Omega, a masapen leh a nunung pên, a Bul leh a Tawp ka hi.”

¹⁴ Hinna thing chung achun thu a neih theihna ding u leh, khawpi kawtkhak a a lut theihna dinguh a, a puon uh sawp ngim te chuh a hamphau ui.

¹⁵ Himahlele, khawpi pawlam achun, uichate, dawithiemte, kideihchak nuomte, tuolthatte, milim hote leh, a thu leh a thilhih uh a lepchiehte um un au.

¹⁶ “Kei, Isu hin, sapchuom haw kawmah, zie thu hi hettuoksak dingin, na kawm u ah ka vânsâwlchâk chuh ka hun sawl ahi. David bulpi leh a suon, aksi vak tak chuh ka hi,” a ti a.

¹⁷ Thagau leh mo chun, “Hung ah,” a tiu a. Kuole, a za ta cheng chun, “Hung ah,” tiu hen. Dangchâk ta cheng hung uh hen; a nuom ta chengin Hinna tui hi a thawn in hung kilak u hen.

Thutawpna

¹⁸ Kei, Johan hin, kuole, zie lehkhabu a hilhlawkna thu za taphawt chuh ka hilh masak diem ahi: Kuo’n le, zie thu haw hi a behlap chun, zie lehkhabu a gawtna kizikhaw hi Pathien in a chungah behlap thuk ina.

¹⁹ Kuo’n le, zie lehkhabu a hilhlawkna thu hi a lâkmang chun, zie lehkhabu a kizik, Hinna thing leh, Khawpi thiengtho a a chan chuh, Pathien in a kawm apat la mang ina.

²⁰ Zie thu haw hettuok sak pa hin, “A hii, hung vak zieng ding ka hi,” a ti a. Amen, hung ta’n la, Lalpa Isu!

²¹ Lalpa Isu lungsietna chuh, mi thiengthote kawmah um hen. Amen!