THUPHUON 19 - PATHIEN LEKHABU THIENGTHO (BSI)

¹ Ziehaw cheng zawh chun, van ah mipi nasa tak aw tawbang ngêi ngêi hin, “Halleluia, hukdamna le, lopina le, thilhih theihna le I Pathien uh a ahi!

² A vaihawmna haw chuh a dik in, a diktat a hi! Amah chun nawhchizuok lopi tak nu, a mi deihchak nawpna zieka leisiet supawlhcheh nu chuh thiemmawh a chan sak a. Pathien in a suokte thisan phuba chuh a la ta ngâla!” a tih ka za a.

³ Chun, “Halleluia! Zie khawpi lopi tak kangtum, meikuong apat meikhu chuh kumkhuo’n chieh to ina!” ti’n a kiko kit uh a.

⁴ Khutichun, upa sawmnih leh lite leh, ganhing lite chun khupbawk in, “Amen, Halleluia,” ti’n, Pathien, Lalchutphah a chu pa chuh a ho uh a.

Belamno Zineih Guolvakna

⁵ Chun, lalchutphah apat in aw a hung pawt a, “Nanguh, a sawntawlawi chengcheng te leh, a mipite, a lien leh a neu, amah ho chengcheng te haw, I Pathien uh chuh pakchau in!” a ti a.

⁶ Chun, mipi nasa tak aw tawbang leh, tui tamtak gi tawbang leh. van nasa taka gi tawbang in, “Halleluia, Lalpa I Pathien uh, Bangkim hihtheipa chun vai a hawm tai!

⁷ Lawp takin kipâk hi tingun, amah pakchai tiu, Belamno zi neih chuh a phat ta ngâl a; mo le a kisazo tai!” a tih ka za a.

⁸ Patngatpuon ngim tak, vam tak silh a phal sak uh a, (patngat puon chuh mi thiengthote thilhih diktat ahi ngâla.)

⁹ Chun, vânsâwlchâk chun ka kawmah, “Belamno zi neihna guolvakna a chiela umte chuh a hamphau ui, ti’n zik ah,” ei ti a. Vânsâwlchâk mah chun, “Zie thu haw hi Pathien Thutak ahi,” a ti a.

¹⁰ Tichun, amah ho dingin a keng bul achun ka khupbawk a, himahleh amah chun, “Khutichun hih ki’n khai! Kei chuh nangmah leh na suohpihte, Isu thu hettuoksak haw sawntawlawi chanpih ka hi a puo; Pathien ho zaw ta’n! Isu thu hettuoksak thudik khah, thiemgaute hatkhum sek khah a hi ngâl a!” a ti a.

Sakawl Kang chunga Chu pa

¹¹ Chun, van kihawng ka mu a; ngaitie! sakawl kâng leh, a chunga chu, “Taksanum leh Diktak,” a tih uh chule ka mu a; amah chun diktat takin vai a hawm a, a do sek hi.

¹² A mit haw chuh meikuong tawbang a hi a, lallukhuk tamtak a khu a, chun, min zik, amah ngâllo chun kuoma’n a het loh uh, a nei a.

¹³ Chun, amah chuh thisana kidieh puon-In a kithuom a; a min chuh, “Pathien Thu,” a tiu a.

¹⁴ Vana sepaihte chun patngat puon ngim tak, vam tak silh in, sakawl kâng chunghaw a chuh chu’n a zui uh a.

¹⁵ Chun, a kam apat in chemzâm hiem tak a hung pawt a, zie chuh namtin a satna ding ahi. A chunguh achun thik tiengin vaihawm intin; Pathien, Bangakai hihtheipa lungnatna nasatak grep thawkna khuk achun chilgawp ina.

¹⁶ A puon leh a malpi achun, “LENGTE LENG, LALTE LAL,” ti a min kizik a um a.

¹⁷ Chun, nisa akhun vânsâwlchâk ding ka mu a. Amah chun, vanlaizawl a vacha leng chengcheng te kawm achun, aw ngeih tak in,

¹⁸ “Lengte sa, sepaih lawiupate sa, mihatte sa, sakawl leh a chunga chute sa, mi chengcheng, suok leh suok lo, a lien a neu le a sau na nek theihna dingun, Pathien guolvakna ankuong nasa tak siemna achun hung kikhawm un!” ti’n a kiko a.

¹⁹ Chun, sahang te, leia leng te, a sepaihteu chuh, sakawl chunga chu pa leh, a sepaihte do dinga kikhawp uh ka mu a.

²⁰ Tichun, sahang chuh a man uh a, thiemgau lêm, sahang melchikna nei leh, a lim note a lepbawl theihna dinga thilmak a mitmuh uh a hihpa khale a man tel uh a. A nih uh chun, mei leh kât a kâng dil achun a hingsan in a paih lut tau a.

²¹ A sepaihteu chuh, chemzâm, sakawl chunga chu pa kam apat a pawt khan satlup a hi tau a; tichun, vacha chengcheng te chun a sau chuh a neu a, a vah suok tau hi.