THUPHUON 18 - PATHIEN LEKHABU THIENGTHO (BSI)

Babulon Puksietna

¹ Zie thil haw nung chun, vânsâwlchâk dang, thuneihna nasatak nei a, van apat a hung kum ka mu a, a lopina chun lei pumpi hi a salhvak suok a.

² Amah chun aw ngeih tak in, “Babulon khawpi lopi chuh a chim tai! a chim tai! Thithate umna leh, thagau buok leh muhdahum tin chengte umna a hung hi tai!

³ A mi deihchak nawpna zieka lungnatna uain chuh nam chengcheng in a dâwn ta ngâl uh a: leia lengte chun amah nawptalna ziek chun a hauhsak lawh tau hi” ti’n a kiko a.

⁴ Chun, van apat in aw dang khatin hiti a hi a gen ka za a, “Ka mite haw! amahnu apat chun hung pawt unla! A kigawtna a chuh na tel lohna ding un, a gitlohna haw achun tel kiu in!

⁵ A gitlohna chun van a su hiel ta a, a gitlohna chuh Pathien in a hezing ngâl a.

⁶ Ama’n a hun bawl guol khan, bawl thuk unla; A thilhih dungzui zelin, a lehnih in dinthuk un! Dâwn ding hat taka chawhhelna khawn achun, amah dingin a lehnih in hel sak un.

⁷ A kisuklopi leh a kinuomsak zie dungzui khan, sugim in, sulungkham thuk un. A lunggil chun, ‘Lengnu banga chu ka hi a; meithai mai ka hi puoh a, Lungkhamna he kha hiel puo’ng ka!’ a ti ngâl a.

⁸ Zieziekchun, ni khat thu’n natna te, gawtna, thihleman, thûmlemauna te leh kiellechâkte chun hun pha phut ina. Khutichun, mei in kangtum ina, Lalpa Pathien, a chunga vaihawmpa chuh a hât ngâl a.”

⁹ Chun, leia lengte, a kideihchakpih sekte leh, a nuomsak bawlpih sekte chun, a kang khu chuh a muh tiengu le chuh,

¹⁰ “Babulon khuo lopi, khuo det chuh a chung a gik ie! a gik ie! Dâkkâl khat sungin na chungah vaihawmna chuh a hungtung ta ngâl in,” ti’n, a sukgim lauh zieka gamla taka dingin. kahcham kawmin, a âwm uh kichup un au.

¹¹ Chun, leia sumkawlveite chun amahnu chuh kah in, a sûn uh a, kuoma’n a thuomphuo teu a châwk tâk loh ziek un;

¹² Kuoma’n a sanateu, a dangkaguoteu, a suong mantamteu; a tuikawkchang teu a châwksak ta puou a; chun, a patngatpuonteu, a puonsandupteu, a lungpuonteu, leh a puonsan a ute le a châwk sak puou a; thing gimlim tin cheng le, saiha umlebelte cheng le, thing mantam tak leh sumeng leh, thik leh suonggiel a kisiem ûmlebel tin cheng tawh.

¹³ Chun, thingthal le, thil gimlim le, gimlim hâl zat le, thau gimlim le, begaw le, uain le, olive thau le, changbuong nêl tak le, buh le, bâwng le, belam haw tawh; sakawl leh a kangtalai te, suokte haw leh mihiemte hinna nasan tawh ahi.

¹⁴ Sumkawlvei mite chun amahnu kawm achun, “Thil pha na utchak chengcheng te chuh a mangthai zo ta a, na hauhsakna leh na deihum na chengcheng chuh a bei zo tai, ziehaw chuh mu kit ngei ta puo’n la!” a tiu a.

¹⁵ Zie thil haw a sumkawlveite, amah vanga hung neizote chun,

¹⁶ “Khawpi lopi tak, patngat puon silh leh, puonsandup leh puon san-au silh a, sana leh khi suongmantam leh, tuikawkchang a kivan nu chuh, a chung a gik ie! a gik ie!

¹⁷ Dâkkâl khat sung mai in, sum khuti zozai chuh bangmahlo a hung suok ta ngâl a!” ti’n, kap leh mau kawmin, a sukgim theih thuokna a chuh tel khâk ding lau kawm in, gamla tak ah ding un au. Kuongpute cheng leh, kuong a chute cheng leh a tawlte leh, tui chunga nek hawlte cheng, mi danghaw chun le gamla taka dingin,

¹⁸ a kâng khu chuh en kawmin, “Zie khawpi tawbang a lopi hi khawpi dang a um ding a ahim?” ti’n a kiko uh a.

¹⁹ Chun, kap leh mau kawmin, “Khawpi lopi tak nu, a neihzawhna zieka tuipi a kuong neite chengcheng hung neihzawhna chuh a chung a gik ie! a gik ie! Dâkkâl khat sung mai in, bangmahlo mai a hung suok mai tâk hi!” ti a kiko in, a lu chung u ah leivui a buok uh a.

²⁰ “Vante haw, amahnu sietna ziek chun kipâk un! Mi Thiengthote leh, sawlchakte leh thiemgaute haw, kipâk un! Nang haw chunga a thilhihte ziek chun Pathien in amahnu chung achun a vaihawm thuk ta ngâl a!” ti’n.

²¹ Chun, vânsâwlchâk hât tak khat hin, suong sumhei tawbang lientak khat hi a la a, tuisuohgiet ah a paih lut a, “Babulon khawpi lopi chuh hitibang taka nasa hin paih in um intin, kuoma’n mu kit ta hiel puo’n au.

²² Kingkang nawthaw le, phenglawng mût githaw le, pengkun mût git husa haw le, thil gihawih git leh, mihing husa himhim, na sung achun zak hi ta puo’n a! Sumkawlvei a nasem mawng mawngte le na sung achun muh hi ta puo’n tin; suong sumhei git le zak hi diek ta puo’n a!

²³ Thaumei vak le na sung ah vak ta puo’n tin; mo leh moneipa husa himhim le, na sung ah zak hi diek ta puo’n a. Na sumkawlveite chuh khawvel a mi thilhih thei pente ahiu a; na dawi thilhih in khawvel a mi chengcheng chuh na thêm sek ngâl a!

²⁴ A sunga thiemgau haw leh mi thiengthote leh, leia thaha umte chengcheng thisan haw chuh muh ahi ngâl a,” ti’n.