THUPHUON 16 - PATHIEN LEKHABU THIENGTHO (BSI)

Pathien Lungnatna Belhbu

¹ Pathien Lungnatna Belhbu chuh Ho-In sung apat chun aw ngeih tak in, vânsâwlchâk sagihte kawm achun, “Chieh unla, Pathien lungnatna belhbu chuh lei chungah sung thau in,” a tih ka za a.

² Tichun, vânsâwlchâk khatna chuh a chieh a, belhbu chuh lei chungah a sung tha ta a, tichun, sahang tiemtehna neite leh a lim hote chung achun meimasie na takin a hung suok ta a.

³ Chun, vânsâwlchâk nihna chun a belhbu chuh tuipi ah a sung tha ta a, tichun, tui chuh mithi thisan guolin a hung um ta a, khutichun, ganhing tin cheng, tuipi a umte chuh a hung thi suok vek tau a.

⁴ Vânsâwlchâk thumna chun a belhbu chuh luipi haw leh, tuinak haw achun a sung tha a, tichun, thisan a hung suok vek ta a.

⁵ Vânsâwlchâk chun, “Nang Mi Thiengtho Umzingpa leh Umsapa, na vaihawmnate chuh a dik ie!

⁶ Amau haw chun mi thiengthote leh thiemgaute thisan kha a na suoh uh a, nangin thisan dâwn dinga na piek thuk hi, dâwn tak him ahiu ie!” a tih uh ka za a.

⁷ Chun, maichâm apat in, “A hii, Aw Lalpa Pathien, Bangakai hihthei, na vaihawm haw hi a diktat in a dik ahi,” tih aw hile ka za a.

⁸ Chun, vânsâwlchâk lina chun a belhbu chuh nisa chungah a sung tha a; tichun, a lumna nasa taka mihiemte hai kang dingin thilhih theihna a pieu a.

⁹ Khutichun, mite chuh sa taka haih in a um tau a, tichun, zie gawtna chunga thuneitu Pathien min chuh a gensie tau a. Himahlele, a lopina pakcha dingin, a gitlohnau apat chun a lunghei nuom diek puou hi.

¹⁰ Chun, vânsâwlchâk ngana chun a belhbu chuh sahang lalchutphah chung achun a sungtha a, tichun, sahang lenggam chung cheng achun thimna a hung um ta a, chun, mipite chun a natnau ziek chun a lei uh a pet uh a.

¹¹ A natnau leh a meimasieu ziek chun van Pathien chuh a gensieu a; a thilhih teu chuh a kisik diek puou hi.

¹² Chun, vânsâwlchâk gupna chun a belhbu chuh Luipi lien, Euphrates chung achun a sung tha a, tichun, suohlam apat a leng hung kuon dingte lampi chuh hawn a hih theihna dingin, luipi chuh a kang tan ta a.

¹³ Chun, dragon kam apat leh sahang kam apat leh, thiemgau lêm kam apat, thagau buok thum, ukeng tawbang hung pawt hi ka mu a.

¹⁴ Ziete chuh thitha thagau, melchikna hih sekte chuh ahiu hi. Zie thagau thum te chuh, Bang cheng hihthei Pathien Ni lopi a kidona dinga mi pui khawm dingin, khawvel lengte kawm achun a kuon dawk tau a.

¹⁵ “Ngaiin! gucha guola hung vak ding ka hi ie! Kiging a, puontum chengsa a um zingte chuh a hamphau ui; khutilochun, sangawn a vakin, mite mitmuh in zahhuoi takin um kha’n au ie!” ti’n.

¹⁶ Khutichun, Thagau chun, lengte chuh mun khat, Hebrai pau a, “Armageddon,” a tihnau achun a puikhawm ta a.

¹⁷ Chun, vânsâwlchâk sagihna chun a belhbu chuh vanthamzawl ah a sung tha a. tichun, Pathien Ho-In a lalchutphah apat chun, “A kichai tai!” ti’n aw ngeih tak a hung pawt a.

¹⁸ Tichun, kawlphe leh, aw gi leh, vangi a hung uma, chun, leiling nasatak le a hung um ta a! Leichung a mihiem siem a thak, khuti hiela leiling nasa chuh a um kha ngei puoi; zie chuh leiling nasa pên ahi!

¹⁹ Khawpi lopi tak chuh mun thum in a hung kikhen a, gam chengcheng khawpite chuh sukmangthai in a hung um vek ta a. A lungnatna uain dâwn ding. a lungnatna tâwp khawk khawn a kipata uain dâwn sak dingin, Pathien in Babulon khuo lopitak chuh a hezing ngâl a.

²⁰ Tuikuol tin cheng chuh a mang zo ta a, tângte haw le a um ta puou hi.

²¹ Giel lien tak, talent tawh kibang hiela gik hi van apat in mihiemte chungah a hung kie a, zie giel a gawtna ziek chun; mihiemte chun Pathien chuh a gensie tau a; zie gawtna chuh a nasa mah mah ngâl a.