THUPHUON 14 - PATHIEN LEKHABU THIENGTHO (BSI)

Belamno leh a Mite

¹ Chun, ka vak et leh, ngaitie! Belamno, Zion tânga ding leh, a chalpâng uh a a min leh a Pa min kizik, mi nuoi khat leh singli leh sangli a kawma umte chuh ka mu a.

² Chun, van a pan a thil gi, tui tamtak gi tawbang leh, vangi nasa tak gi tawbang ka za a. A git chuh thil tumgit thiemte’n kingkang a nawt git uh gihawih tawbang hi ahi.

³ Lalchutphah mai leh, ganhing li leh, upate masang achun la thak a sau a. Lei apat a tatdawksa mi, nuoi khat leh singli leh sang lite ngâllo khan kuoma’n zie la chuh a hethei puou hi.

⁴ Ziete haw chuh numei tawh kisubuok lote, nungak thiengtho bang a hi ngâl uh a. Ziete haw chun Belamno chuh a chiehna lam chengah a zui uh a. Ziete haw chuh Pathien a ding leh, Belamno a dinga gah masa hi dinga lei apat a tatdawkte chuh ahiu hi.

⁵ A kam uh apat lepchieh a pawt lam him het khâk a hi puou a, demna ding him um lote ahiu hi.

Vânsâwlchâk Thum te

⁶ Chun, lei chunga mite kawma leh, namtin chengte, chitin chengte, pautin chengte, mitin chengte kawma tângsappih dinga, kumsawt a Chanchin Pha nei, vânsâwlchâk dang vanlaizawl a leng ka mu a.

⁷ Chun, Pathien chuh aw ngeih tak in, “A vaihawm phat chuh a hungtun tâk ziekin, Pathien chuh lau unla, a lopina chuh pakchau un! Vante, leisiet te leh tuinakte siempa chuh ho un!” a ti a.

⁸ Chun, vânsâwlchâk nihna chun. “Babulon khuo lopi, a mi deihchak nawp zieka. namtin kawma a lungnatna uain dâwnsaknu chuh, a chim tai! a chim tai!” ti’n a kiko a.

⁹ Chun, vânsâwlchâk thumna chun aw ngeih tak in, “Kuo’n le, sahang leh a lim chuh he a, a chalpâng u ah ahim, a khut uh a him a tiemtehna nei taphawtte chun,

¹⁰ Pathien lungnatna uain, a thangtawmna khawn bangmah tawh helloh a hun sundawk chuh dâwn untin, chun, vânsâwlchâk thiengthote leh Belam No mitmuh ah mei leh kât a gawt a um ding ahi, ti’n aw ngeih tak in a kiko a.

¹¹ Tichun zie sukgimtheihna meikhu chuh kumkhuotuong in chieh to ina. Sahang leh a lim ho a, a min tiemtehna nei taphawtte chun, sun leh zan in chawlhdam tik him nei ta puo’n au!” ti’n a masate nih chuh a hun zui a.

¹² Zie ahin, mi thiengthote, Pathien thupiek haw leh, Isu taksanna zieka thuokhatte kihet theihna a um hi.

¹³ Chun, van apat a aw khat in, “Hiti hin zik ah: Tu a kipat hin, mi thi, Lalpa a thite chuh mi hampha ahiu hi! Thagau in, A hii, a sep gimnateu chuh chawlhsan in, a thilhih teu chun hun zui ding ahi ngâl a, a ti ie,” a tih ka za a.

Lei Buh-ât hun ding

¹⁴ Chun, ka vak et leh, ngaitie! meitang vam hi ka mu a, meitang chung achun mihiem chapa tawbang hi, sana lallukhuk kikhuk a, kawite hiem tak chawia chu le ka mu a.

¹⁵ Chun, vânsâwlchâk dang khat, Pathien Ho-In apat hin a hung pawtdawk a, meitang chunga chu pa kawm achun aw ngeih tak in, “Na kawite khah la dawk inla, ât ah; ât a phat ta ngâl a, lei buh haw khuh a kuoi zo ta khu,” a ti a.

¹⁶ Tichun meitang chunga chu pa chun a kawite chuh lei chungah a pei viel a, lei buh chuh a ât ta a.

¹⁷ Chun, vânsâwlchâk dang, van a Pathien Ho-In apat in a hung pawt kit a, amah chun le kawite hiem tak a chawi a,

¹⁸ Vânsâwlchâk dang, mei chunga thuneipa chuh maichâm apat chun a hung pawt kit a. Kawite hiem tak chawi, vânsâwlchâk kawm achun, “Na kawite hiem tak khah la dawk inla, leia grep gui gah bawkhaw khuh ât ah; grep gahte khuh amin-nguoi zo ta khu,” ti’n aw ngeih tak in a kikokhum a.

¹⁹ Tichun, vânsâwlchâk chun a kawite chuh lei chung achun a pei viel a, leia grep gah chuh a ât a, grep khuk za tak, Pathien lungnatna grep thawkna khuk achun a paih lut ta a.

²⁰ Khutichun, daikieng lama grep thawkna khuk achun a chilgawp uh a, tichun, grep thawkna khuk apan chun thisan a hung pawt a, chîng sang khat leh chîng zagup sung chuh, sakawl kamdal gei hiela thuk in a luong ta a.