THUPHUON 13 - PATHIEN LEKHABU THIENGTHO (BSI)

Sahang nih te

¹ Chun, a chieh a, tuisuohgiet sehpho achun a dinga, sahang, tuisuohgiet apat a hung pawt hi ka mu a. Zie chun ki sawm leh luchang sagih a nei a; a kihaw chung achun lallukhuk a um chiet a, a luchang haw achun, Pathien gensietna min haw le a um chiet hi.

² Chun, ka sahang muh chuh keite tawbang a hi a, a kênghaw chuh savawm keng tawbang a hi a, a kam chuh sakeibaknei kam tawbang ahi. Dragon chun sahang kawm achun a thilhih-theihna leh, a lallukhuk leh thuneihna nasa tak a pie a.

³ Chun, sahang luchang khat chuh, thih pih kham hiela liem tawbang hin ka mu a, himahlele, a thih pih kham hiel dinga a liemna chuh a dam ta a. Tichun, leichung a micheng in zie chuh mak a sau a, sahang chuh a zui tau a.

⁴ Chun, dragon chun sahang kawma a thuneihna a piek ziek chun, dragon chuh mi chengcheng chun Pathien bangin a ho tau a. “Sahang tawbang hi kuo a um? Kuo a do thei ding?” ti’n, sahang chule a ho uh a.

⁵ Tichun, sahang chuh, uong taka Pathien gensietna thu gen chuh phalsak ahi ta a, tha sawmli leh tha nih sung chuh thuneihna piek ahi tai.

⁶ Tichun, Pathien leh, a min leh, a chênna leh, van a um chengcheng te chuh hansie a buok khum pan ta a.

⁷ Chun, mi thiengthote a do leh a zawh chuh phal ahi ta a, chun, chitin leh namtin, pautin leh, phung tin chengte chunga thuneihna chuh piek in a um ta a.

⁸ Tichun, lei chunga um chengcheng, lei kisiem tunga thahsa Belamno Hinna Lehkhabu a min zik loh taphawtte chun, Pathien ho tawbang in ho un au.

⁹ Mi kuo’n le, bil a neih uh chun zau hen!

¹⁰ Kuole, sala mat dingte chuh, sala mat in a um sek ui; kuole, chemzâma thah dinga umte chuh, chemzâm mah a thah in a um sek ui. Zie hin, mi thiengthote thuokhatna leh taksanna chuh a hung kilang dawk sek hi.

¹¹ Chun, sahang dang. leia hung pawt hi ka mu a. Zie chun belamno ki tawbang hi ki a nei a, dragon pau tawbang in a pau a.

¹² Sahang masa zaw thuneihna chengcheng khah, a mitmuh ah a mang a. Lei leh a chunga um chengcheng te chuh, sahang masa zaw. thihpih kham hiela liem, dam kit pa chuh a chibai sak a.

¹³ Mihiemte mitmuh achun. leia mei kiek sak thei hielin, melchikna a hih sek hi.

¹⁴ Sahang masa mitmuh a melchikna hih dinga phalsak a a umna kha mang in, mi chengcheng a thêm sek a. Sahang, chemzâma liemsa, hung dam kit pa limbawlna ding chun, amah lim a siem dinguh a hii, ti’n a hilh sek a.

¹⁵ Chemzâma sukliemsa, hung dam kit pa sahang lim chuh a hung pau theihna dingin leh, a mah ho taphawtte chuh a suklup theihna dingin, sahang nihna chun, sahang khatna chuh hinna hu a thah khum chuh a phal sak uh a.

¹⁶ Sahang chun mi chengcheng, a lien a neu, a hau a vai, suok leh suok lo le, a khut changlam uh ah ahim a chalpâng uh ah ahim ah, zie tiemtehna chuh a neihsak chiet a.

¹⁷ Zie tiemtehna sahang min ahim, a min nambar ahim neite ngâllo chun, kuoma’n bangmah a zuok uh a, a châwk theih lohna dingun.

¹⁸ Zie hin chitna a um hi. Kuole, hettheihna dinga pilna nei chun, sahang nambar chuh sut dawk uh he’n a nambar chuh mihiem nambar ahi ngâl a, a nambar chuh, zagup sawmgup leh gup ahi.